تۇركيا تۇرعىندارى ينتەرنەتكە كۇنىنە 7 ساعات ۋاقىتىن جۇمسايدى
استانا. KAZINFORM - تۇركيا تۇرعىندارى ينتەرنەتكە كۇنىنە ورتا ەسەپپەن 7 ساعات 13 مينۋت ۋاقىت جۇمسايدى، دەپ حابارلايدى Kazinform ءتىلشىسى.
تۇركيانىڭ كولىك جانە ينفراقۇرىلىم ءمينيسترى ابدۋلكادير ۋرالوگلۋ ەل ازاماتتارىنىڭ سيفرلىق ادەتتەرىنە قاتىستى قىزىقتى دەرەكتەرمەن ءبولىستى. «Digital 2025 Türkiye» ەسەبىنە سايكەس سوڭعى جىلدارى تۇرىك حالقىنىڭ ينتەرنەت بەلسەندىلىگى ايتارلىقتاي ارتقان.
ەسەپتەگى ەڭ ماڭىزدى كورسەتكىشتەردىڭ ءبىرى - پايدالانۋشىلاردىڭ %96,9 ينتەرنەتكە موبيلدى قۇرىلعىلار ارقىلى كىرەدى. بۇل سمارتفونداردىڭ تۇركيادا جەلىگە كىرۋدىڭ نەگىزگى قۇرالىنا اينالعانىن راستايدى. ورتاشا العاندا، ەل تۇرعىندارى كۇنىنە 7 ساعات 13 مينۋتتى ينتەرنەتتە وتكىزەدى. بۇل كورسەتكىش ازاماتتاردىڭ كومپيۋتەرلەر مەن پلانشەتتەردى پايدالانۋعا جۇمسايتىن ۋاقىتىنان، ياعني كۇنىنە 3 ساعات 9 مينۋتتان - بىرنەشە ەسە جوعارى.
تاعى ءبىر ايتا كەتەتىن جايت، موبيلدى قۇرىلعىلار تۇركياداعى ينتەرنەت- ترافيكتىڭ %73,1 قامتاماسىز ەتەدى. بۇل سمارتفونداردىڭ ينتەرنەت بەلسەندىلىگىنىڭ نەگىزگى كوزى رەتىندەگى ماڭىزدىلىعىن ايعاقتايدى.
بۇدان بولەك، ءمينيستردىڭ مالىمەتىنشە، قازىرگى ۋاقىتتا تۇركيادا 80,7 ميلليون ادامدا، ياعني حالىقتىڭ %92,1 ىندا موبيلدى تەلەفون بار، ال 77,3 ميلليونى ينتەرنەتتى بەلسەندى قولدانادى.
بۇل كورسەتكىشتەر سيفرلىق تەحنولوگيالاردىڭ كۇندەلىكتى ومىرگە قالاي اسەر ەتەتىنىن جانە موبيلدى ينتەرنەتتىڭ بايلانىس پەن اقپارات الۋدىڭ نەگىزگى قۇرالى رەتىندە قارقىندى دامىپ كەلە جاتقانىن كورسەتەدى.
ايتا كەتەيىك، تۇركيادا سمارتفوندار قازاقستاننان قاراعاندا ەكى ەسە قىمبات ساتىلادى. بيىل 1-قاڭتاردان باستاپ شەتەلدەن اكەلىنگەن تەلەفونداردىڭ IMEI تىركەۋ قۇنى 46 مىڭ تۇرىك ليراسىنا (شامامەن 645 مىڭ تەڭگە) دەيىن ءوستى.
بۇدان بۇرىن حابارلانعانداي، تۇركيالىقتار ۇيلەنۋ تويىنىڭ شىعىنىن ۇنەمدەۋگە كوشتى.
