تۇركيا ليۆاندىق بوسقىنداردى قابىلدايدى

رەجەپ تاييپ ەردوعان ىستامبۇلدا گەرمانيا كانسلەرى ولاف شولتسپەن كەلىسسوزدەن كەيىن وسىلاي دەپ مالىمدەدى. ءسويتىپ، تۇركيا پرەزيدەنتى بوسقان جۇرتتى قاناتىنىڭ استىنا الماق.

ەردوعان: «انادولى جەرى سوعىستان جاپا شەككەن حالىقتارعا 13 جىلدان استام ۋاقىتتان بەرى پانا بولىپ كەلەدى»، - دەيدى.

تۇركيا كومەككە مۇقتاج حالىقتارعا قول ۇشىن بەرۋگە اركەز دايىن. الەمدەگى ەڭ كوپ بوسقىن قابىلداعان ەلدەردىڭ ءبىرى رەتىندە حالىقارالىق قاۋىمداستىقپەن ىنتىماقتاسىپ، ماسەلەنى شەشۋدە بەلسەندى اتسالىسىپ كەلەدى.

پرەزيدەنت رەجەپ تاييپ ەردوعان نەمىس كانسلەرىمەن باس قوسۋى بارىسىنداي وسىلاي دەدى.

رەجەپ تاييپ ەردوعان، تۇركيا پرەزيدەنتى:

- سيريادان ءبىرىنشى بىزگە شامامەن 4 ميلليون بوسقىن كەلدى. قازىرگى ۋاقىتتا ەلدە 3,5 ميلليونعا جۋىق سيريالىق بوسقىن ءومىر سۇرەدى. ولار ءۇشىن ەسىگىمىز ءارقاشان اشىق جانە اشىق بولىپ قالا بەرەدى. ليۆاننان بوسقىندار كەلسە، ءبىز ولار ءۇشىن دە ەسىگىمىزدى اشىق ۇستايمىز. ليۆاندا تۇرىكمەن باۋىرلارىمىز دا تۇرادى، ولارعا دا ەسىگىمىز اشىق.

ليۆاننىڭ ءار بەسىنشى تۇرعىنى بوسقىنعا اينالدى يزرايلدىڭ ۇزدىكسىز شابۋىلى ەلدىڭ زارە قۇتىن الىپ ءبىتتى. قاراپايىم حالىق وققا ۇشىپ جاتىر. ەلدەگى 5 ميلليون ادامنىڭ ءاربىر بەسىنشى تۇرعىنى قازىردىڭ وزىندە بوسقىنعا ايناعان. ليۆاندا جاعداي كۇننەن- كۇنگە قيىنداپ بارادى. قاراپايىم حالىق تۇرماق ب ۇ ۇ- نىڭ بىتىمگەرلەرى دە شابۋىلعا ۇشىرادى. يزرايلدىڭ بۇل ارەكەتىنە باتىس ەلدەرى ءۇن قاتقان جوق.

فيليپپو گراندي، ب ۇ ۇ بوسقىندار ءىسى جونىندەگى جوعارعى كوميسسارى:

- مەن دونورلارعا وسى جاعدايعا كومەك بولۋ ءۇشىن قاراجات جيناۋ ناۋقانىن باستايمىن. بىزگە قازىرگى ۋاقىتتا جانە الداعى ايلاردا بۇل ماسەلەمەن اينالىسۋ ءۇشىن قوماقتى قاراجات قاجەت. ليۆاندىق بوسقىنداردىڭ كوبى سيريا مەن باسقا دا كورشىلەس ەلدەرگە قاشىپ جاتىر. قازىر اسىرەسە رەسمي داماسك بيلىگىنە قوسىمشا اۋىرتپالىق ءتۇسىرىپ تۇر.

سولاردىڭ ءبىرى 24 جاستاعى زايناب مۋراد وتباسىمەن بىرگە ليۆاننىڭ شىعىسىنا جاسالعان يزرايل شابۋىلدارىنان قاشىپ شىققان. زايناب سياقتى كوپتەگەن ليۆاندىقتار قازىر ۋاقىتشا داماسكىدەگى جاساقتالعان باسپانالاردا تۇرىپ جاتىر. وندا تەك شەكتەۋلى ازىق-تۇلىك پەن مەديتسينالىق كومەك قانا بەرىلەدى.

زايناب مۋراد، ليۆاندىق بوسقىن:

- ءبىز ءۇشىن قاراڭعى ءتۇن بولدى. بەيبەرەكەت بومبالاۋلار باستالدى. بىزدە بالالار بار، ولار قاتتى قورقادى، سوندىقتان ءۇيىمىزدى تاستاپ، قاۋىپسىز جەرگە بارۋعا ءماجبۇر بولدىق. ءبىز مۇندا تەك كيىم-كەشەك الىپ كەلدىك. بىزدە پەش تە، تاماق دايىندايتىن قۇرال دا جوق. كيىمدەرىمىزدى قولمەن جۋامىز، ال ازىق-تۇلىكتەن نە بەرىلسە، سونىمەن تاماقتانامىز.

ابدۇلناسەر حاتىب، باسپانا جەتەكشىسى:

- ءبىز 13 جىل بويى سانكسيالار استىندا كەلەمىز. سۋ، جانارماي، ازىق-تۇلىك جانە بالالارعا ارنالعان ءسۇت ۇنتاعىن قامتاماسىز ەتۋدە قيىندىقتارعا تاپ بولىپ وتىرمىز. مۇنداعى ادامدار ءالى دە جازعى كيىمدەرمەن ءجۇر، ال قىس جاقىنداپ كەلەدى. قىستىق كيىمدى قايدان الارىمىزدى بىلمەيمىز.

تاياۋ شىعىستاعى قاقتىعىستار باستالعاننان بەرى ءبىر ميلليوننان استام ادام ليۆانداعى ءۇيىن تاستاپ قاشىپ شىقتى. سوڭعى ءبىر ايدا سيرياعا 470 مىڭعا جۋىق ادام وتكەن. ليۆاندا قازىر قازا تاپقاندار سانى 2,5 مىڭ، ال جارالانعاندار سانى 11 مىڭنان استى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى