تۇركيا حالقى قارتايىپ بارا جاتىر

تۇركيا ستاتيستيكا ينستيتۋتىنىڭ (TÜİK) مالىمەتىنشە، تۇرىك حالقىنىڭ ورتاشا جاسى 2024 -جىلى 34,4 جاسقا جەتتى جانە 2026 -جىلعا قاراي 35 جاستان اسادى دەپ شامالانىپ وتىر. 2015 -جىلى بۇل كورسەتكىش 31 جىل بولدى. مۇنداي دەموگرافيالىق وزگەرىستەر حالىقتىڭ قارتايۋ پروتسەسىنىڭ جەدەلدەۋىن كورسەتەدى.

تۇركيادا ەگدە جاستاعى حالىق دەپ ەسەپتەلەتىن 65 جانە ودان جوعارى جاستاعى ادامداردىڭ سانى وتكەن جىلى 9 ميلليونعا جۋىقتاپ، سوڭعى بەس جىلدا 20 پايىزدان استام ءوستى. ەگەر 2018 -جىلى ەگدە جاستاعى حالىقتىڭ جالپى حالىق سانىنا قاتىناسى %8,8 دى قۇراسا، 2024 -جىلى ول %11 عا دەيىن ءوستى. 2024 -جىلى ەگدە جاستاعى حالىقتىڭ شامامەن %45 ى ەرلەر جانە %55 دان استامى ايەلدەر بولدى. دەموگرافيالىق بولجامعا سايكەس، ەگدە جاستاعى حالىقتىڭ ۇلەسى 2030 -جىلى %12,9، 2040 -جىلى %16,3، 2060 -جىلى %22,6 جانە 2080 -جىلى - %25,6 بولادى.

سينوپ، گيرەسۋن جانە كاستامونۋ پروۆينتسيالارىندا ورتاشا جاس ءقازىردىڭ وزىندە 43 كە جەتتى. قىسقا مەرزىمدى پەرسپەكتيۆادا ەڭبەككە قابىلەتتى جاستاعى ادامدار سانىنىڭ ءوسۋى جالعاسىپ جاتقانىمەن، ۇزاق مەرزىمدى پەرسپەكتيۆادا ونىڭ ازايۋى كۇتىلىپ وتىر، بۇل بولاشاقتا ەل ەكونوميكاسىنا ءوز اسەرىن تيگىزەتىنى انىق.

مامانداردىڭ بولجامىنشا، 2050 -جىلعا قاراي تۇركيا حالقىنىڭ ورتاشا جاسى 45 جاسقا دەيىن ءوسۋى مۇمكىن. وسىنداي دەموگرافيالىق وزگەرىس تۋۋ كورسەتكىشىنىڭ تومەندەۋىنە جانە ءومىر ءسۇرۋ ۇزاقتىعىنىڭ ارتۋىنا تىكەلەي بايلانىستى.

بۇعان دەيىن تۇركيادا 2025 -جىل «وتباسى جىلى» دەپ جاريالانعانىن جازعان بولاتىنبىز. بۇل باستاما اياسىنداعى جاڭالىقتار ەل جاستارى مەن دەموگرافياسىن قولداۋعا باعىتتالعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى