تۇركيا ش ى ۇ تولىق مۇشەسى بولۋدى جوسپارلاپ وتىر
ۆاشينگتون. KAZINFORM - تۇركيا پرەزيدەنتى رەجەپ تايپ ەردوعان ناتو مۇشە مەملەكەتتەرى باسشىلارىنىڭ سامميتىنەن كەيىنگى باسپا ءسوز ءماسليحاتىندا وسىنداي مالىمدەمە جاسادى.
بۇل جايىندا پرەزيدەنت سوزىنەن تىكەلەي ترانسلياتسيا جاساعان TRT Haber حابارلادى.
ءسوز باسىندا مەملەكەت باسشىسى تەرروريزمگە قارسى كۇرەستە وداقتاستار اراسىنداعى ىنتىماقتاستىقتى نىعايتۋ قاجەتتىگىن اتاپ ءوتتى.
ونىڭ ايتۋىنشا، تۇركيا ناتو عا قاۋىپ توندىرەتىن ەكى نەگىزگى قاۋىپتىڭ ءبىرى - تەرروريزممەن كۇرەستە وداقتاستارىنان نيەتتەستىك كۇتەدى.
«بۇل وداق تۋرالى زاڭدا دا تالاپ ەتىلگەن»، - دەدى ول.
ەردوعان يزرايلدىڭ پالەستينا حالقىنا قارسى ۇزدىكسىز اگرەسسياسىنا نازار اۋداردى. ونىڭ ايتۋىنشا، پالەستينادا جان-جاقتى جانە تۇراقتى بەيبىتشىلىك ورنامايىنشا تۇركيا ناتو-نىڭ يزرايلمەن ىنتىماقتاستىق باستامالارىن ماقۇلدامايدى.
ءسوزىن اياقتاي كەلە ەردوعان تۇركيانىڭ شاڭحاي ىنتىماقتاستىق ۇيىمىنا تولىق مۇشە بولۋدى كوزدەپ وتىرعانىن تىلگە تيەك ەتتى.
«ەندى تۇركيا شاڭحاي ىنتىماقتاستىق ۇيىمىنا تولىق مۇشە رەتىندە قوسىلۋى كەرەك. مەن تۇراقتى مۇشەلەردەن وسى ماسەلە بويىنشا قولداۋ سۇرادىم»، - دەدى تۇركيا كوشباسشىسى.
ەسكە سالا كەتەيىك، وسى ايدىڭ باسىندا استانادا وتكەن شاڭحاي ىنتىماقتاستىق ۇيىمىنىڭ 24-سامميتىنە رەجەپ تايپ ەردوعان سەرىكتەس ەلدىڭ باسشىسى رەتىندە قاتىسقان بولاتىن.
ەردوعان تۇركيا تەرروريزمگە قارسى كۇرەستە ش ى ۇ- مەن ديالوگتى دامىتۋعا مۇددەلى ەكەنىن باسا ايتتى. ونىڭ اتاپ وتۋىنشە، وسىنداي تەرروريزم اكتىلەرىنىڭ سالدارىنان ميلليونداعان ادام بوسقىنعا اينالدى. تەك تۇركيانىڭ وزىندە 4 ميلليون بوسقىن بار.
«اتاجۇرتىمىز - ورتالىق ازيا ەلدەرىمەن ءار سالادا ورتاق پايدا نەگىزىندەگى ىنتىماقتاستىقتى دامىتۋعا دايىنبىز ءارى مۇددەلىمىز. ش ى ۇ ازيا ەلدەرىمەن ديالوگ ورناتۋعا وتە ىڭعايلى پلاتفورمالاردىڭ ءبىرى ەكەنىن اتاپ وتكىم كەلەدى»، - دەدى ول.
وسى جيىندا ەردوعان رەسەي پرەزيدەنتى ۆلاديمير پۋتينمەن كەلىسسوز جۇرگىزدى.
