تۇركيا بيلىگى ىستامبۇل مەرى ۇستالعاننان كەيىن شەرۋگە شىعۋعا تىيىم سالدى

ازاماتتار اراسىنداعى تارتىپسىزدىككە پرەزيدەنت رەجەپ تايىپ ەردوعاننىڭ باستى ساياسي قارسىلاستارىنىڭ ءبىرى سانالاتىن ىستامبۇل مەرى ەكرەم يماموگلۋدىڭ ۇستالۋى سەبەپ بولدى. يماموگلۋ قىلمىستىق توپ قۇردى، پارا الدى، الاياقتىق جاسادى، تەندەرلەرگە ارالاستى، بيلىكتى اسىرا پايدالاندى، شەنەۋنىكتەرگە ءتىل تيگىزدى دەگەن ايىپتارمەن قاماۋعا الىندى، بۇل وپپوزيتسيا جاقتاستارى مەن قۇقىق قورعاۋشىلاردىڭ جاپپاي نارازىلىعىن تۋدىردى.

تۇركيانىڭ ادىلەت ءمينيسترى يىلماز تۋنچتىڭ ايتۋىنشا، ىستامبۇل باس پروكۋراتۋراسى جۇرگىزگەن تەرگەۋ اياسىندا ىستامبۇل مۋنيتسيپاليتەتىنىڭ باسشىسىن قوسا العاندا، 106 كۇدىكتىنى قاماۋعا الۋ تۋرالى سانكتسيا بەرىلگەن.

- تۇركيا رەسپۋبليكاسى - قۇقىقتىق مەملەكەت. كونستيتۋتسيامىزدىڭ 9-بابىندا سوت بيلىگىن تۇرىك ۇلتى اتىنان جۇزەگە اسىراتىن زاڭنىڭ ۇستەمدىگى بارىمىزگە تەڭ، جەكە ادامعا دا، قانداي ءدا بىر توپقا ارتىقشىلىق بەرىلمەيدى، - دەدى تۋنچ.

سونىمەن بىرگە وپپوزيتسيا باقىلاۋشىلارى 2024 -جىلدىڭ 31-ناۋرىزىندا مۋنيتسيپالدىق سايلاۋدا رەسپۋبليكالىق حالىق پارتياسىنان (ر ح پ) سايلانعان ىستامبۇل مەرى ەردوعان بيلىگىنە قارسى كۇرەستىڭ سيمۆولىنا اينالعانىن اتاپ ءوتتى. ونىڭ قاماۋعا الىنۋى ءىرى قالالاردا نارازىلىق شەرۋلەرىن تۋدىردى، وندا ادامدار يماموگلىنىڭ تەز ارادا بوساتىلۋىن تالاپ ەتىپ، قازىرگى ۇكىمەتكە نارازىلىقتارىن ءبىلدىرىپ كوشەلەرگە شىقتى.

نارازىلىق بىلدىرۋشىلەر قاماۋعا الىنعانى تۋرالى حابارلاعاننان كەيىن بىردەن جاياۋ مارش جاساعان، الايدا قۇقىق قورعاۋ كۇشتەرى حالىقتىڭ ىلگەرىلەۋىنە توسقاۋىل قويدى. بيلىك پەن قاۋىپسىزدىك كۇشتەرىنىڭ كۇش-جىگەرىنە قاراماستان، بەلگىلى ءبىر توپتاردىڭ نارازىلىقتارى جالعاسىپ، جاعداي شيەلەنىسكەن كۇيدە قالىپ وتىر.

ىستامبۇل ىقتيمال تارتىپسىزدىكتەردىڭ الدىن الۋ ءۇشىن ناۋرىزدىڭ 19 ى مەن 23- ارالىعىندا ميتينگىلەر، شەرۋلەر مەن باسپا ءسوز ءماسليحاتتارىن وتكىزۋگە تىيىم سالدى. كوپتەگەن كوشەلەر، داڭعىلدار مەن اللەيالار جابىلعان. قالا بويىنشا قوعامدىق كولىكتەرگە شەكتەۋ قويىلعان.

ەلدەگى ساياسي جاعدايعا كەلىسپەيتىندەرگە وپپوزيتسيالىق پارتيالاردىڭ وكىلدەرى، ەلدەگى ازاماتتاردىڭ قۇقىقتارى مەن بوستاندىقتارى بۇزىلدى دەپ مالىمدەگەن قۇقىق قورعاۋ ۇيىمدارى قولداۋ كورسەتىپ وتىر. كوپشىلىك يماموگلىنىڭ ۇستالۋىن ەردوعاننىڭ ساياسي وپپوزيتسيالىق قوزعالىستى باسىپ-جانشىپ، الداعى سايلاۋ الدىندا ءوز ۇستانىمىن نىعايتۋ ارەكەتى دەپ سانايدى.

تۇركيادا بولىپ جاتقان وقيعاعا حالىقارالىق قاۋىمداستىق تا وڭ قاباق تانىتپادى. گەرمانيا سىرتقى ىستەر مينيسترلىگى يماموگلىنىڭ ۇستالۋىن دەموكراتياعا اۋىر سوققى دەپ مالىمدەدى.

- ەۋروپالىق وداققا كىرۋدى قالايتىن ەل دەموكراتيالىق قۇقىقتىق مەملەكەت قاعيداتتارىنىڭ ساقتالۋىنا كەپىلدىك بەرۋى كەرەك، - دەلىنگەن مالىمدەمەدە.

تۇركيادا جاپپاي نارازىلىق بۇعان دەيىن دە بولعان، ءبىراق قازىرگى وقيعالار ەلدەگى ساياسي شيەلەنىستىڭ ءورشۋىن ءارى حالىق اراسىندا نارازىلىقتىڭ كۇشەيۋىن كورسەتەدى.

ەسكە سالا كەتەيىك، بۇعان دەيىن ىستامبۇل مەرى ەكرەم يماموگلۋ ارنايى وپەراتسيا كەزىندە ۇستالعانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى