تۇركى ينۆەستيتسيالىق قورىنىڭ كاپيتالى 600 ميلليون دوللارعا دەيىن ۇلعايادى
تاشكەنت. KAZINFORM - تۇركى ينۆەستيتسيالىق قورىن باسقارۋشى ەلدەر جارعىلىق كاپيتالدى 600 ميلليون دوللارعا دەيىن ۇلعايتۋعا نيەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستاننىڭ ساۋدا-ونەركاسىپ ءپالاتاسىنان مالىم ەتكەندەي، قوردىڭ كاپيتالىن %20 عا كوتەرۋ ۇسىنىسى باكۋدە وتكەن كونفەرەنسيا اياسىندا تالقىلاندى.
قورعا باعىتتالاتىن قوسىمشا قاراجات بيزنەستى دامىتۋ جانە تۇركى ەلدەرى اراسىنداعى تاۋار اينالىمىن ارتتىرۋ جوبالارىن ىسكە اسىرۋعا جۇمسالادى.
ەسكە سالايىق، تۇركى ينۆەستيتسيالىق قورى ءوز جۇمىسىن بىلتىر مامىردا باستادى. سول ۋاقىتتا ونىڭ كاپيتالى 500 ميلليون دوللار كولەمىندە بەلگىلەنگەن ەدى.
تۇركى ينۆەستيتسيالىق قورىن قۇرۋ تۋرالى كەلىسىمگە 2023-جىلدىڭ 16-ناۋرىزىندا انكارادا وتكەن تۇركى مەملەكەتتەرى ۇيىمىنىڭ كەزەكتەن تىس سامميتى اياسىندا قول قويىلعان بولاتىن. قۇرىلتايشى ەلدەر قاتارىندا قازاقستان، ازەربايجان، قىرعىزستان، وزبەكستان جانە تۇركيا بار.
