تۇركى ينۆەستيتسيالىق قورىن قۇرۋ تۋرالى كەلىسىم راتيفيكاتسيالاندى
ءماجىلىس «تۇركى ينۆەستيتسيالىق قورىن قۇرۋ تۋرالى» كەلىسىمدى راتيفيكاتسيالادى، دەپ حابارلايدى قازاقپارات ءتىلشىسى.
زاڭ جوباسىن دەپۋتاتتارعا تانىستىرعان ۇلتتىق ەكونوميكا ءمينيسترى الىبەك قۋانتىروۆ قوردىڭ ماقساتى وڭىرىشىلىك ساۋدانى كەڭەيتىپ، ۇيىمعا مۇشە مەملەكەتتەردىڭ ەكونوميكالىق دامۋىنا جاردەمدەسۋ ەكەنىن اتاپ ءوتتى.
«قور ينۆەستيتسيالىق قىزمەت ارقىلى شاعىن جانە ورتا كاسىپورىنداردىڭ جوبالارىن قارجىلاندىرۋ، فيزيكالىق جانە تسيفرلىق ينفراقۇرىلىمدى قۇرۋ، ونەركاسىپ ءوندىرىسىن، كولىك پەن اۋىل شارۋاشىلىعىن، تۋريزم مەن جاسىل ەكونوميكا سياقتى ءتۇرلى سالاداعى دامۋ جوبالارىن قولداۋ فۋنكتسيالارىن اتقارادى.
بۇل اتالعان جوبالار ەڭ الدىمەن، جاڭا جۇمىس ورىندارىن اشۋعا، قازاقستان ەكونوميكاسىن ءارتاراپتاندىرۋعا مۇمكىندىك بەرەتىنىن اتاپ ءوتۋ ماڭىزدى»، - دەدى مينيستر.
اتاپ وتۋىنشە، قوردىڭ جارعىلىق كاپيتالى 500 ميلليون دوللار كولەمىندە بولماق. ناقتى ايتساق، نومينالدى قۇنى 350 ميلليون دوللار كولەمىندەگى تولەنگەن اكتسيالاردان، قوسىمشا تارتىلاتىن 150 ميلليون دوللارلىق اكتسيالاردان قۇرالادى. ونىڭ ىشىندە ءاربىر مەملەكەتتىڭ ۇلەسىنە 70 ميلليون تولەنگەن اكسيالاردان كەلەدى.
«قوردىڭ ءاربىر مۇشەسى بىردەي داۋىس بەرۋ قۇقىعىنا يە. قوردىڭ ءبىرىنشى پرەزيدەنتى بولىپ تۇركى مەملەكەتتەرى ۇيىمىنىڭ بۇرىنعى باس حاتشىسى باعدات قۇلتاي ۇلى امىرەيەۆ تاعايىندالدى.
قوردىڭ ورنالاسقان جەرى، ياعني شتاب- پاتەرى رەتىندە تۇركى ەلدەرى كوشباسشىلارىنىڭ كەلىسۋىمەن ىستانبۇل قالاسى بولىپ بەلگىلەندى»، - دەدى ۆەدومستۆو باسشىسى.
