تۇركى مەملەكەتتەرىنىڭ ورتاق الىپبيىنەن ورتاق ءتىل قالىپتاسا ما؟
تۇركى الەمىنىڭ ورتاق الىپبيىنە كوشۋ قازاقستاننىڭ لاتىن قارىپىنە اۋىسۋىنا تىكەلەي تاۋەلدى. ساياسات تانۋشى ريززات تاسىم تۇركى مەملەكەتتەرى ورتاق ءالىپبي جاساۋ رەفورماسى قانشا ۋاقىتتا جۇزەگە اساتىنىن جانە ەلدەرگە قانداي ارتىقشىلىق بەرەتىنىن ايتتى.
«تۇركى ەلدەرىنە ورتاق ءالىپبي ەنگىزۋ ماسەلەسى بۇرىن يدەيا جۇزىندە ايتىلاتىن بولسا، بۇگىنگى تاڭدا ناقتى قاعاز جۇزىندە بەكىتىلدى. كەيىنگى تۇركى مەملەكەتتەرىنىڭ 10-ءسامميتىنىڭ قورىتىندىسى بويىنشا قابىلدانعان استانا دەكلاراتسياسىندا 156 تارماقتىڭ تىكەلەي 2ەۋى ورتاق الفابيتتى ەنگىزۋگە قاتىستى بولدى. ياعني 121-122 تارماقتار تۇركى مەملەكەتتەرىنىڭ اقساقالدار كەڭەسىنىڭ ۇسىنىسى بويىنشا ورتاق ءالىپبيدى ەنگىزۋ ماقساتىندا كوميسسيا قۇرۋ تۋرالى شەشىم قابىلداندى. ءيا، بۇعان دەيىن الىپبيگە تۇركى عالىمدارىنىڭ تۇجىرىمدامالارى مەن ءتۇرلى يدەيالار ۇسىنىلىپ كەلدى، ءبىراق مەنىڭشە بۇل جاقىن ارادا شەشىمىن تابادى دەۋ قيىن»، - دەدى ريززات تاسىم.
ساياسات تانۋشىنىڭ ايتۋىنشا، تۇركى مەملەكەتتەرىنىڭ كوبى لاتىن ءالىپبيىن قولدانادى جانە ۇيىمعا باقىلاۋشى ەلدەردە وسى باعىتتا.
«ءبارى مۇمكىن. تۇركى الەمىنىڭ كەلەشەگى 2040 كونتسەپتۋال قۇجاتىنىڭ وزىندە تۇركى ءداۋىرىنىڭ نەگىزى ورتاق تۇركى بىرەگەيلىگىن قالىپتاستىرۋ ماسەلەسى كوتەرىلەدى. 100 جىلدىقتا بۇل شارۋا ىسكە اسپاسا دا، كەيىن كەلەشەكتە مىندەتتى تۇردە جۇزەگە اسا باستايتىن سەكىلدى. ويتكەنى بۇعان سەبەپ بار»، - دەدى تاسىم.
ول ورتاق تىلگە قاتىستى ماسەلەلەلەر ۇرپاقارالىق جوبا بولعاندىقتان، ءالى دە ءپىسىپ جەتىلۋى كەرەگىن اتاپ ءوتتى.
«جالپى تۇركى الەمىنىڭ ورتاق الفابيتىنە كوشۋ قازاقستاننىڭ لاتىن قارىپىنە اۋىسۋىنا تىكەلەي تاۋەلدى دەپ ويلايمىن. سوندىقتان بىزگە بۇل باعىتتاعى جۇمىستى جالعاسىتىرۋ كەرەك. كەلەشەكتە بۇل ەلدەردە «ورتاق ءتىل بولادى» دەگەن پىكىرلەردى ەستىپ جاتامىن. ءبىراق بۇعان وتە ۇزاق جىل قاجەت، ءتىپتى وسى عاسىردا مۇمكىن دەپ ايتۋ قيىن. الداعى 50 جىلدا تىكەلەي كوشۋ بويىنشا، قادامدار جاسالاتىنىنا كۇمانمەن قارايمىن. سەبەبى بۇل ماسەلە ءالى ايقىندالماعان. ال كەيىن بۇعان نەگىز بار. مۇنى قۇر اڭگىمە رەتىندە قاراستىرۋ - قاتە. ەكىنشى ءبىر ماسەلە، اقپاراتتىق قاۋىپسىزدىككە دە ۇلكەن قاتىستى. ءبىز بۇل ارقىلى ورتاق اقپاراتتىق كەڭەس قۇرۋ ارقىلى ءار مەملەكەت اقپاراتتىق قاۋىپسىزدىگىن دە قامتاماسىز ەتە الادى. الداعى ۋاقىتتا عالىمدار دا ۇلكەن جۇمىس اتقارۋى كەرەك. ويتكەنى ساياسي شەشىم قابىلداناردا مىندەتتى تۇردە ءار ەلدىڭ سپەتسيفيكاسى ەسكەرىلۋگە ءتيىس»، - دەپ تۇيەدى ريززات تاسىم.
Massaget.kz
