تۇركى مەملەكەتتەرىنىڭ قاۋىپ- قاتەرلەرگە قارسى بىرىگۋى وتە ماڭىزدى - قاسىم-جومارت
استانادا وتكەن تۇركى مەملەكەتتەرى ۇيىمىنىڭ مەرەيتويلىق 10-سامميتىنىڭ قورىتىندىسى بويىنشا ءبىرقاتار شەشىم قابىلدانىپ، قۇجاتتارعا قول قويىلدى، دەپ حابارلايدى Kazinform.
«تۇركى مەملەكەتتەرىنىڭ قاۋىپ-قاتەرلەرگە قارسى بىرىگۋى، ءوزارا كومەك كورسەتىپ، ءتيىمدى ءىس-ارەكەت جاساۋى وتە ماڭىزدى. بابالارىمىز «تىرلىك باسقا بولسا دا - تىلەك ءبىر، بارماق باسقا بولسا دا - بىلەك ءبىر» دەگەن. ءبىزدىڭ تۇركى ىقپالداستىعىن نىعايتۋ جولىنداعى ورتاق تابىسىمىز - سونىڭ ايقىن كورىنىسى. سامميتتىڭ قورىتىندىسى بويىنشا ءبىرقاتار شەشىم قابىلدانادى، قۇجاتتارعا قول قويىلادى. ونىڭ ءبارى تۇركى الەمىن وركەندەتۋگە، ەلدەرىمىزدىڭ ىنتىماعىن ارتتىرۋعا ىقپال ەتەدى. سونداي-اق ايماقتاعى ىقپالداستىقتى دامىتۋعا جانە ۇيىمنىڭ بەدەلىن كۇشەيتۋگە زور ۇلەس قوسادى دەپ سەنەمىن»، - دەدى مەملەكەت باسشىسى.
ەسكە سالايىق، بۇگىن استانادا تۇركى مەملەكەتتەرى ۇيىمىنىڭ 10- سامميتى ءوتتى. جيىنعا تۇركيا، ازەربايجان، وزبەكستان، قىرعىزستان پرەزيدەنتتەرى ۇيىمعا مۇشە مەملەكەت باسشىلارى رەتىندە، ماجارستان پرەمەر-ءمينيسترى مەن تۇرىكمەن حالقىنىڭ ۇلتتىق كوشباسشىسى، تۇرىكمەنستان حالىق ءماسليحاتىنىڭ ءتوراعاسى گۋربانگۋلى بەردىمۇحامەدوۆ باقىلاۋشى ەلدىڭ وكىلى رەتىندە قاتىستى.
ت م ۇ سامميتى «تۇركى ءداۋىرى» ۇرانىمەن ءوتتى.
