تۇركى مەملەكەتتەرى اراسىنداعى تاۋار اينالىمى 22 ميلليارد دوللاردان استى
تۇركى مەملەكەتتەرى ۇيىمىنىڭ رەفەرەنتتىك ورتالىعىن قۇرعان ءجون. بۇل تۋرالى اقوردادا ءوتىپ جاتقان تۇركى مەملەكەتتەرى ۇيىمىنىڭ 10- سامميتىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى Kazinform.
«ەكىنشى باسىمدىق - بىرىزدەندىرۋ جۇمىسى (Unification). تۇركى مەملەكەتتەرىنىڭ قاتار دامۋى وتە ماڭىزدى. ءبىز مەملەكەتتەرىمىزدىڭ ستاندارتتارى جانە تەرمينولوگياسىن جۇيەلەگەن ءجون دەپ سانايمىز. وسىعان بايلانىستى مودەلدىك زاڭ جوباسىن قىسقا مەرزىم ىشىندە قاراپ، ونى ماقۇلداۋعا شاقىرامىن. بۇل باستاما تاۋارلارىمىزدى ورتاق نارىققا ەركىن شىعارۋعا جول اشادى. ال ءبىرىڭعاي ستاندارتتار ىشكى جالپى ءونىمدى جىل سايىن شامامەن 1 پايىزعا ارتتىرۋعا مۇمكىندىك بەرەدى»، - دەدى قاسىم-جومارت توقايەۆ.
پرەزيدەنتتىڭ دەرەگىنشە، قازىرگى ۋاقىتتا تۇركى مەملەكەتتەرىنىڭ ىشكى جالپى ءونىمى 1,4 تريلليون دوللارعا جۋىقتادى.
«بيىل ۇيىم مۇشەلەرى اراسىنداعى تاۋار اينالىمى 22 ميلليارد دوللاردان استى. ورتاق تالاپتار بەكىتىلسە، بۇل كورسەتكىشتى 1,5 ەسە ۇلعايتۋعا بولادى. بۇدان بولەك، تۇركى مەملەكەتتەرى ۇيىمىنىڭ رەفەرەنتتىك ورتالىعىن قۇرعان ءجون دەپ سانايمىن. بۇل ورتالىق ءونىمدى سىناۋ ناتيجەلەرىن ءوزارا تانۋعا، سونداي-اق حيميا جانە تاماق ونەركاسىبى سالالارىندا جاڭا زەرتتەۋ جۇرگىزۋگە مۇمكىندىك بەرەدى»، - دەدى مەملەكەت باسشىسى.
