تۇركى الەمىنىڭ مادەني استاناسى: اقتاۋدا 25 مىڭ ادام جينالاتىن عالامات شوۋ وتەدى
استانا. KAZINFORM - ەرتەڭ اقتاۋدا كاسپي تەڭىزىنىڭ جاعالاۋىندا «اقتاۋ - تۇركى الەمىنىڭ استاناسى» جىلىنىڭ اشىلۋ سالتاناتى وتەدى. Jibek Joly تەلەارناسىنىڭ ءتىلشىسى گۇلجازيرا ماتەنوۆا اقتاۋدان تىكەلەي كورسەتىلىمگە شىعىپ، دايىندىق جۇمىستارى قالاي ءجۇرىپ جاتقانىن ايتىپ بەردى.
اشىلۋ سالتاناتى تۇركسوي حالىقارالىق ۇيىمى، ق ر مادەنيەت جانە اقپارات مينيسترلىگى، ماڭعىستاۋ وبلىسىنىڭ اكىمدىگى جانە اقتاۋ قالاسىنىڭ اكىمدىگىنىڭ قولداۋىمەن ۇيىمداستىرىلعان.
- كەشەلى بەرى اقتاۋدا جاڭبىر، تەڭىز جاعاسى بولعاندىقتان جەل، ازداعان تۇمان، ىزعار دا بار. ءبىراق قالا اكىمى جاڭبىر شارانىڭ شىرقىن بۇزا المايدى دەيدى. ويتكەنى ناۋرىز مەرەكەسىندە ءدال وسى الاڭدا 12 مىڭ كورەرمەن وسى جەردە تاپجىلماي كونسەرت تاماشالاعان ەكەن. ال ەرتەڭ ودان ەكى ەسە كوپ ادام جينالادى دەپ بولجانىپ وتىر. كۇردەلى كونسترۋكتسيالاردان، LED- ەكرانداردان ەرتەڭ وسى جەردە عالامات شوۋ بولاتىنى بايقالادى. ۇيىمداستىرۋشىلار كونە مۇرا مەن جاڭا سيفرلىق مۇمكىندىكتەردى ۇشتاستىرامىز دەپ ۋادە بەرىپ وتىر، - دەدى جۋرناليست «Bugin Live» باعدارلاماسىندا.
ۇيىمداستىرۋشىلار كونسەرت حەدلاينەرلەرىن ازىرگە قۇپيا ۇستاپ وتىر. دەگەنمەن، بىزگە بەلگىلى بولعانداي، گالا-كونسەرتكە تانىمال ءانشى ديماش قۇدايبەرگەن، «Kalifarniya»، ميربەك اتابەكوۆتىڭ حەدلاينەر رەتىندە ونەر كورسەتەدى دەپ جوسپارلانعان. سونداي-اق باعدارلامادا ازەربايجاندىق ءانشى روزا زەرگەرلي مەن ايگىلى «ياللا» توبى دا بار.
ايتا كەتەيىك، وسىمەن قازاقستاننىڭ ءۇشىنشى قالاسى «تۇركى الەمىنىڭ مادەني استاناسى» مارتەبەسىن الىپ وتىر. 2012-جىلى تۇركى الەمىنىڭ ءتاجىن كيگەن العاشقى قالا - استانا ەدى، ودان كەيىن ءتىزىمدى تۇركيانىڭ ەسكى شاھارى، رەسەيدىڭ قازان قالاسى، تۇرىكمەنستاننىڭ مارى، ازەربايجاننىڭ شەكي قالالارى جالعاستىردى.
ال 2017-جىلى مادەني شەرۋ ءبىزدىڭ تۇركىستان قالاسىندا ءوتتى، كەيىنىرەك تۇركيانىڭ كاستامونۋ، بۋرسا، قىرعىزستاننىڭ وش، وزبەكستاننىڭ حيۋا، ازەربايجاننىڭ شۋشا، تۇرىكمەنستاننىڭ انەۋ قالالارى مادەني استانا بولدى.
ايتا كەتەيىك، «اقتاۋ - تۇركى الەمىنىڭ مادەني استاناسى» جوباسىنىڭ ءىس-شارالارى 5-ساۋىردە باستالىپ، كۇزگە دەيىن جالعاسادى. 7-9-ءساۋىر كۇندەرى «تۇركى ىرعاعىندا ءبي» حالىقارالىق ءبي بايقاۋى، 29-مامىردا «تۇركى حالىقتارىنىڭ وركەنيەتى جانە ونىڭ الەمدىك مادەنيەت تاريحىنداعى ورنى» اتتى حالىقارالىق عىلىمي-پراكتيكالىق كونفەرەنسيا وتەدى دەپ جوسپارلانعان.
ودان كەيىن «تۇركى الەمىنىڭ توتەمى» حالىقارالىق كونفەرەنتسياسى، «قىرىمنىڭ قىرىق باتىرى» جىرىنا ارنالعان تۇركى ەپوستارىنىڭ شەرۋ-فەستيۆالى، «كاسپي - دوستىق تەڭىزى» ۆوكالدى-ينسترۋمەنتالدى انسامبلدەرى فەستيۆالى مەن تۇركى ەلدەرىنىڭ فولكلورلىق انسامبلدەرى جانە اسپاپتا ورىنداۋشىلارىنىڭ فەستيۆالى بولادى.
ال 15-ماۋسىمدا نۇرعيسا تىلەنديەۆتىڭ 100 جىلدىعىنا ارنالعان «ماڭعىستاۋ ماقامدارى» تۇركى الەمى سازگەرلەرىنىڭ فەستيۆالى وتەدى. XXVI «تۇركسوي وپەرا كۇندەرى» تۇركى ەلدەرىنىڭ وپەرا جۇلدىزدارىنىڭ فەستيۆالى، «MODEL CUP» مودەلدەر بايقاۋى، «دالامەن ۇندەس - بابا ونەر» تۇركى الەمى قولونەر شەبەرلەرىنىڭ فەستيۆالى جانە VIII «تۇركى الەمى ەتنو-مودا ءسان كورسەتىلىمى» جوسپارلانعان.
سونىمەن بىرگە، «اق مايا FEST» شۇبات فەستيۆالى، «جۇمباق بوياۋلار» حالىقارالىق سۋرەتشىلەر مەن مۇسىنشىلەر سيمپوزيۋمى جانە XXV «تۇركسوي سۋرەتشىلەرىنىڭ ءماجىلىسى»، اباي قۇنانباي ۇلىنىڭ 180 جىلدىعى اياسىندا جاس اقىندار اراسىنداعى «تۇركى شايىرلارى» 1-حالىقارالىق پوەزيا فەستيۆالى بولادى. «ونەرلى ورەن» حالىقارالىق بالالار شىعارماشىلىعى فەستيۆالى، «مەيىرىمدى تۇركى الەمى» حالىقارالىق مۇمكىندىگى شەكتەۋلى بالالاردىڭ ونەر فەستيۆالى سياقتى بالالارعا ارنالعان ءىس-شارالار، فوتو سۋرەتشىلەر فەستيۆالى، كينو جانە تەاتر فەستيۆالدەرى وتەدى.
ال 13-14-قاراشا كۇندەرى XXXXII «تۇركسوي حالىقارالىق ۇيىمىنا مۇشە ەلدەرى مادەنيەت مينيسترلەرىنىڭ تۇراقتى كەڭەسىنىڭ وتىرىسى» مەن «اقتاۋ - تۇركى الەمىنىڭ مادەني استاناسى-2025» شاراسىنىڭ جابىلۋ سالتاناتى جوسپارلانعان.
