تۇرعىن ۇيدەگى گاز جارىلىسى: قازا بولعاندار پوليتسيا قىزمەتكەرىنىڭ اكە-شەشەسى ەكەنى بەلگىلى بولدى

ايتا كەتەيىك، بۇگىن تۇندە قاراعاندى وبلىسىنىڭ بوتاقارا كەنتىندە كوپقاباتتى ۇيدە گاز بالونى جارىلىپ، ءۇيىندى استىندا مەرت بولعان ەكى ادام ەرلى-زايىپتى 50 جاستاعى تولەگەن جانە 49 جاستاعى الما راحمەتوۆتەر ەكەنى بەلگىلى بولدى.

قازا بولعاندار پوليتسيا قىزمەتكەرىنىڭ اكە-شەشەسى بولعان. وبلىستىڭ پوليتسيا دەپارتامەنتى باسشىلىعى ارىپتەسىنە كوڭىل ايتتى.

«قاراعاندى وبلىستىق پوليتسيا دەپارتامەنتىنىڭ باسشىلىعى، جەكە قۇرامى جانە ارداگەرلەر كەڭەسى، بۇقار جىراۋ اۋداندىق پوليتسيا باسقارماسىنىڭ جەدەل ۋاكىلى داۋرەن تولەگەن ۇلى تۇرسىنبەكوۆكە اتا-اناسى تولەگەن تۇرسىنبەك ۇلى مەن الما راحمەتوۆانىڭ مەزگىلسىز قايتىس بولۋىنا بايلانىستى قايعىسىنا ورتاقتاسىپ، كوڭىل ايتادى»، - دەپ جازىلعان جاريالانىمدا.

ەسكە سالساق، بوتاقارا كەنتىندە 30- قاڭتار كۇنى ساعات 00:07 دە ەكى قاباتتى 12 پاتەرلى ءۇيدىڭ ەكىنشى قاباتىنداعى پاتەردە تسيليندرلىك گاز جارىلدى. پاتەردىڭ ۇستىندەگى شاتىر، قابىرعالار مەن ەدەندەر، سونىڭ ىشىندە ءبىرىنشى قاباتتاعى پاتەر تولىعىمەن قيرادى. باسقا پاتەرلەر دە ءىشىنارا زاقىمدالعان.

ۇيدە تۇراتىن 46 تۇرعىننىڭ 35 ءى جارىلىس كەزىندە ۇيلەرىندە بولعان. توتەنشە جاعداي سالدارىنان ەكى ادام قازا تاۋىپ، بەسەۋى زارداپ شەكتى. زارداپ شەككەندەردىڭ اراسىندا ءۇش بالا بار. دارىگەرلەردىڭ تەكسەرىسىنەن كەيىن ەكى بالا ۇيىنە جىبەرىلدى. ءبىر بالا ەمحاناعا جەتكىزىلدى، سونىمەن قاتار اۋرۋحانادا ەكى ەرەسەك ادام بار، ولاردىڭ بىرەۋى وتە اۋىر جاعدايدا.

اۋدان باسشىلىعى زارداپ شەككەندەرگە قاجەتتى كومەك كورسەتىلەتىنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى