تۇرعىن ساتىپ العان تونى ۇناماي قالعان سوڭ تالاپ ارىز جازىپ، اقشاسىن قايتارىپ الدى

بۇل وقيعانىڭ وڭ شەشىم تابۋى تۇتىنۋشىنىڭ ماڭعىستاۋ وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە (س ت ق ق د) جۇگىنۋىنىڭ ارقاسىندا مۇمكىن بولدى.

وسى جىلدىڭ جەلتوقسان ايىندا ايەل ادام جەرگىلىكتى دۇكەندەردىڭ بىرىنەن سىرت كيىم ساتىپ العان. الايدا ساتىپ العاننان كەيىن ول تاۋار ءوزىنىڭ كۇتكەنىنە ساي كەلمەيتىنىن تۇسىنگەن. ساتۋشى جاعدايدى شەشۋگە قۇلىقسىزدىق تانىتقان سوڭ، تۇتىنۋشى ستققد ماماندارىنان كومەك سۇراۋدى ۇيعارادى.

- ءبىز جاعدايدى جىلدام قاراپ، تۇتىنۋشىعا قازاقستان رەسپۋبليكاسىنىڭ «تۇتىنۋشىلاردىڭ قۇقىقتارىن قورعاۋ تۋرالى» زاڭىنىڭ 42-4-بابىنا سايكەس قۇقىقتارىن ءتۇسىندىردى. ماماندارىمىز قۇقىقتىق كومەك كورسەتتى: تۇتىنۋشىعا كەڭەس بەرىپ، ساتۋشىعا جولداناتىن تالاپ ارىزدى دايىنداۋعا كومەكتەستى. دۇكەن زاڭدا كورسەتىلگەن مەرزىم ىشىندە ءوتىنىشتى قاراستىرىپ، تاۋاردىڭ تولىق قۇنىن قايتاردى، - دەيدى دەپارتامەنت باسشىسى راۋان مۋحايەۆ.

زاڭناماعا سايكەس، ءاربىر تۇتىنۋشى ءوز قۇقىقتارى بۇزىلعان جاعدايدا ساتۋشىعا تالاپ ارىزبەن جۇگىنۋگە قۇقىلى. دۇكەن ءوتىنىشتى 10 كۇنتىزبەلىك كۇن ىشىندە قاراستىرىپ، جازباشا جاۋاپ بەرۋى ءتيىس. ەگەر ساتۋشى باس تارتسا، تۇتىنۋشى س ت ق ق د سياقتى ۋاكىلەتتى ورگانعا جۇگىنۋىنە بولادى.

بۇل وقيعا ءوز قۇقىقتارىن ءبىلۋدىڭ جانە دەر كەزىندە كومەك سۇراۋدىڭ قانشالىقتى ماڭىزدى ەكەنىن كورسەتەدى. ماڭعىستاۋ وبلىسى بويىنشا ستققد تۇتىنۋشىلار اراسىنداعى داۋلاردى شەشۋگە بەلسەندى تۇردە ىقپال ەتىپ، ازاماتتاردىڭ مۇددەلەرىن قورعايدى.

- ەگەر ءسىز وسىنداي جاعدايعا تاپ بولساڭىز، دەپارتامەنت ماماندارى سىزگە كومەك كورسەتۋگە دايىن. ءسىز كەڭەس الۋ نەمەسە شاعىم بەرۋ ءۇشىن 87292431434، 430117 تەلەفوندارى ارقىلى حابارلاسا الاسىز، - دەپ اتاپ ءوتتى س ت ق ق د باسشىسى ر. مۋحايەۆ.

ماڭعىستاۋ وبلىسىندا ت ج م قۇتقارۋشىلارى 29 جۇك كولىگىن قار قۇرساۋىنان الىپ شىققانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى