تۇرعىن ءۇي داعدارىسى: ۇلى بريتانيادا باسپاناسى جوق ادامدار كوبەيدى
انگليادا ۇيسىزدەردىڭ سانى شامامەن 7 پروتسەنتكە ءوستى. جەرگىلىكتى بيلىك تۇرعىن ءۇي داعدارىسىن ەڭسەرە الماي كەلەدى. وتكەن جىلى باسپاناسىز قالعان وتباسىلار مەن دالادا قالۋ قاۋپى ءتونىپ تۇرعانداردىڭ سانى ءۇش ءجۇز مىڭعا جەتكەن. ولاردىڭ اراسىندا بالالارى بار ءجۇز مىڭنان استام وتباسى بار، دەيدى Kazinform ءتىلشىسى.
ۇلى بريتانيانىڭ پرەمەر- ءمينيسترى ريشي سۋناكتىڭ ءبىر جىل بۇرىن روجدەستۆو الدىندا ەرىكتى رەتىندە لوندونداعى ۇيسىزدەرگە تاڭعى اس تاراتقانى بار. ۇكىمەت باسشىسى دين ەسىمدى ازاماتتان بيزنەسپەن اينالىساسىز با دەپ سۇرادى. ول ءۇيسىز- كۇيسىز ەكەنىن، تەك امان قالۋدىڭ امالىن ىزدەپ جۇرگەنىن ايتتى.
وسى وقيعادان كەيىن حالىق بىرەۋ تويىپ سەكىرەدى، بىرەۋ توڭىپ سەكىرەدى، دەپ پرەمەردى ايىپتادى. ويتكەنى سۋناك ءۇشىنشى چارلز پاتشادان دا باي ادام ەكەنىن ءبارى بىلەدى.
«پرەمەر- مينيستر ەلدە ءبارى تاماشا دەپ جىلى جاۋىپ قويعىسى كەلەدى. ءبىراق ءبىز ءار اپتا سايىن ونىڭ شىنايى ومىردەن قانشالىقتى الشاق ەكەنىن اڭعارىپ ءجۇرمىز. سىرتقى قارىز 2010 -جىلدان بەرى ەكى ەسە ءوستى، ەكونوميكالىق ءوسىم باياۋلادى، سالىقتىڭ كولەمى كوبەيدى، ەكونوميكا قۇلدىرادى. اپتا سايىن باياعى جارتاس - ءبىر جارتاس، بۇرىنعى پروبلەمالاردى تالقىلايمىز دا وتىرامىز»، - دەيدى وپپوزيتسيالىق لەيبوريستەر پارتياسىنىڭ كوشباسشىسى كير ستارمەر.
وتكەن جىلى جاريالانعان باعدارلاماسىندا كونسەرۆاتورلار ۇكىمەتى تۇرعىن ءۇي داعدارىسىن ەڭسەرۋ ءۇشىن بۇل سالاعا الداعى ءۇش جىل ىشىندە ەكى ميلليارد ستەرلينگ فۋنتىن قۇيۋعا ۋادە ەتكەن بولاتىن. بۇدان بولەك پاتەر جالداۋشىلاردىڭ دالادا قالۋىنىڭ الدىن الۋ ءۇشىن ءۇي يەلەرىنە اقشا تولەۋگە، جاڭا باسپانا ىزدەۋگە كومەكتەسۋگە جانە باسقا جەرگە كوشۋىنە قارجىلىق كومەك بەرۋگە تاعى ءبىر ميلليارد فۋنت ينۆەستيتسيا سالاتىنىن ايتتى.
«ءبىز ءاربىر وتباسىن قاۋىپسىز جانە جايلى باسپانامەن قامتاماسىز ەتۋگە، سونداي- اق جاستاردىڭ ءۇيلى بولۋلارىنا مۇمكىندىك جاساۋعا تىرىسامىز. كونسەرۆاتورلار ميلليونداعان جاڭا تۇرعىن ءۇي نىساندارىن سالۋ ءۇشىن بەلسەندى جۇمىس ىستەپ جاتىر»، دەيدى ۇلى بريتانيانىڭ تۇرعىن ءۇي جانە كوممۋنالدىق شارۋاشىلىق ءمينيسترى مايكل گوۋۆ.
ۇكىمەت ءوز ۋادەسىن تولىق ورىنداي الدى ما؟ جوق، ارينە. ويتكەنى بيۋدجەتتە قاراجات تاپشى. تەك لوندوندا ۇيسىزدەرگە قول ۇشىن سوزۋ ءۇشىن جارتى ميلليارد ستەرلينگ فۋنتى جەتىسپەيدى.
باسپاناسىزداردىڭ سانى بويىنشا مانچەستەر كوش باستاپ تۇر. جەرگىلىكتى قايىرىمدىلىق ۇيىمدارىنىڭ مالىمەتى بويىنشا، قالانىڭ ءاربىر سەكسەنىنشى تۇرعىنىنىڭ تۇراقتى مەكەن- جايى جوق.
«تۇندە وتە سۋىق، دالادا ۇيىقتاۋ قيىن. كۇن سايىن تاڭەرتەڭ دەنەمدى ءسال جىلىتۋ ءۇشىن ەرتە تۇرىپ، جاياۋ جۇرەمىن. كەشە تۇندە قاتتى جاڭبىر جاۋدى. دۇكەننىڭ الدىنداعى شاتىردىڭ ارقاسىندا عانا قۇرعاق قالۋىم مۇمكىن بولدى»، دەيدى مانچەستەردىڭ ءۇيسىز تۇرعىنى مارك.
ءومىر ءسۇرۋ قۇنىنىڭ وسۋىنە بايلانىستى جەكە سەكتورداعى پاتەر جالداۋ اقىسى دا كۇرت ءوستى. ءتىپتى جۇمىس ىستەيتىن ادامدار دا ءۇي- ءجاي جالداي الماي قينالۋدا. ارزان باعاداعى مۋنيتسيپالدى تۇرعىن ءۇي جالداعىسى كەلەتىندەر وتە كوپ بولعاندىقتان كەزەكتى ۇزاق ۋاقىت كۇتۋ كەرەك.
«مەن پاتەردى ءبىر تاۋلىككە جالعا الدىم. ەندى لوندوندا زاتتارىمدى ارقالاپ ءجۇرمىن جانە وسى تۇندە قايدا قوناتىنىمدى بىلمەيمىن»، دەيدى لوندوننىڭ ءۇيسىز تۇرعىنى نيكول ۋيليامس.
ۇيسىزدەر تۋرالى جاعا ۇستارلىق دەرەكتەر جاريالانعاننان كەيىن، بۇكىل ەل بويىنشا ءبىرقاتار قايىرىمدىلىق ۇيىمدارى تۇرعىن ءۇي جاردەماقىسىنىڭ كولەمىن ۇلعايتۋ قاجەتتىگىن ايتتى.
«تۇرعىن ءۇي جاردەماقىلارىن وسىرۋگە تىيىم سالىپ تاستادى. ينفلياتسياعا بايلانىستى پاتەر جالداۋ اقىسى ءوستى، ءبىراق جاردەماقى وزگەرىسسىز قالىپ وتىر. ولار باسپاناسىزداردى قولداۋعا ارنالعان ەدى. ءبىراق ءقازىر كولەمى از. ۇكىمەت جاردەماقىنى مۇمكىندىگىنشە تەزىرەك كوتەرۋى كەرەك»، دەيدى ۇلى بريتانيانىڭ باسپاناسىزداردى قولداۋعا ارنالعان قايىرىمدىلىق ۇيىمىنىڭ اتقارۋشى ديرەكتورى پوللي نيت.
قالالىق كەڭەستەردىڭ باسشىلىعى لەيبوريستەردىڭ بيلىككە كەلىپ، جاعدايدى وزگەرتكەندەرىن اسىعا كۇتىپ ءجۇر.
ساراپشىلاردىڭ بولجاۋىنشا، كەلەسى ۇكىمەتتى وپپوزيتسيا باسقارۋى ابدەن مۇمكىن. ويتكەنى توريلەردەن قادىر كەتتى، حالىق ولارعا سەنۋدەن قالدى.
اۆتور
عالىمجان قارامان ۇلى
