تۇرعىلىقتى مەكەنجايدا قازاق مەكتەبى بولماسا، بالانى قايدا بەرۋ كەرەك - باسقارما باسشىسىنىڭ جاۋابى
استانا. KAZINFORM - استاناداعى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا قالالىق ءبىلىم باسقارماسىنىڭ باسشىسى قاسىمحان سەنعازيەۆ قازاق تىلدە ءبىلىم بەرەتىن مەكتەپتەردىڭ تاپشىلىعى تۋرالى پىكىر ءبىلدىردى.
«بىزدە قازىر ءۇش اۋىسىمدى 8 مەكتەپ بار. 16 مەكتەپ شامادان تىس جۇكتەمەمەن جۇمىس ىستەپ تۇر. تازا ورىس تىلىندە ءبىلىم بەرەتىن ءۇش اۋىسىمدى مەكتەپ جوق. سوندىقتان ءۇش اۋىسىمدى مەكتەپتەردىڭ ءبارى ارالاس مەكتەپ بولىپ ەسەپتەلەدى. ونىڭ بارىندە مەملەكەتتىك تىلدە ساباق بەرەتىن سىنىپتار بار. سوندىقتان ءۇش اۋىسىمدى بولسا دا، شامادان تىس جۇكتەمەمەن وقىتاتىن بولسا دا، ءوزىنىڭ مەكەنجايىنا قاراستى مەكتەپكە قۇجات تاپسىرا بەرسە بولادى»، - دەدى باسقارما باسشىسى.
سونداي- اق، ول ەلورداداعى BINOM- مەكتەپتەرگە قۇجات وتكىزۋ ءتاسىلى وزگەرگەنىن اتاپ ءوتتى.
«وسىعان دەيىن BINOM مەكتەپتەرى وزدەرىنىڭ پورتالى ارقىلى بالا قابىلدايتىن. ءبىراق بيىلدان باستاپ BINOM مەكتەپتەرىنە دە قۇجاتتى eGov پورتالى ارقىلى ونلاين تاپسىرۋعا بولادى»، - دەدى قاسىمحان سەنعازيەۆ.
اۆتور
ەسىمجان ناقتىباي
