ترانسۇلتتىق ۇيىمداسقان توپتىڭ جەتەكشىسى پولشادان ەكستراديتسيالاندى
استانا. KAZINFORM - بۇگىن باس پروكۋراتۋرا مەن ىشكى ىستەر مينيسترلىگىنىڭ قىزمەتكەرلەرى قازاقستاننىڭ پولشاداعى ەلشىلىگىنىڭ كومەگىمەن پولشا رەسپۋبليكاسىنان ترانسۇلتتىق ۇيىمداسقان توپتى قۇرۋ جانە باسقارۋ ءۇشىن قىلمىستىق جاۋاپكەرشىلىككە تارتۋ ماقساتىندا ۋكراينا ازاماتىن ەكستراديتسيالادى.
بۇل تۋرالى باس پروكۋراتۋرانىڭ باسپا ءسوز قىزمەتى ءمالىم ەتتى.
«ول 2022-جىلى قۇرعان قىلمىستىق توپ قازاقستان اۋماعىندا اسا ءىرى كولەمدە پسيحوتروپتىق زاتتاردى وندىرۋمەن جانە ساتۋمەن اينالىسقان» - دەلىنگەن حابارلامادا.
باس پروكۋراتۋرانىڭ مالىمەتىنشە، تاركىلەنگەن زاڭسىز زاتتاردىڭ كولەمى 1 توننادان اسادى، ال ولاردىڭ زاڭسىز اينالىمداعى جالپى قۇنى 1,5 ميلليارد تەڭگەنى قۇراعان.
«كورسەتىلگەن قىلمىستاردى جاساعاننان كەيىن ۇيىمداسقان توپ مۇشەلەرى قۇرىقتالدى، ال ونىڭ جەتەكشىسى جاسىرىنىپ، وعان حالىقارالىق ىزدەستىرۋ جاريالانعان. 2023-جىلدىڭ تامىز ايىندا كۇدىكتى پولشانىڭ اۋماعىندا ۇستالدى. قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا ول ەكستراديتسيالانىپ، قازىرگى ۋاقىتتا استانا قالاسىنىڭ تەرگەۋ يزولياتورىنا قامالدى» - دەپ جازدى باس پروكۋراتۋرانىڭ باسپا ءسوز قىزمەتى.
ايىپتالعان قىلمىستاردى جاساعانى ءۇشىن مۇلكى تاركىلەنىپ، ون بەس جىلدان جيىرما جىلعا دەيىنگى مەرزىمگە باس بوستاندىعىنان ايىرۋ نە ءومىر بويىنا باس بوستاندىعىنان ايىرۋ تۇرىندەگى جازا كوزدەلگەن.
