ترانسكاسپي دالىزىنە سلوۆەنيانىڭ Luka Koper تەڭىز پورتى تارتىلماق
استانا. KAZINFORM - ترانسكاسپي حالىقارالىق كولىك ءدالىزى جوباسىنا سلوۆەنيانىڭ Luka Koper تەڭىز پورتى تارتىلماق. بۇل تۋرالى اقوردادا ەلىمىزگە رەسمي ساپارمەن كەلگەن سلوۆەنيا پرەزيدەنتى ناتاشا پيرتس-مۋسارمەن كەلىسسوزدەردەن كەيىنگى ب ا ق وكىلدەرىنە ارنالعان بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ اتتى.
- ەكى ەل بيزنەس وكىلدەرىنىڭ بايلانىسىن تەرەڭدەتۋ - ماڭىزدى مىندەتتەردىڭ ءبىرى. وسىعان وراي قازاقستان-سلوۆەنيا ىسكەرلىك كەڭەسىن قۇرۋ ماسەلەسىن تالقىلادىق. پرەزيدەنت پيرتس-مۋسارمەن بىرگە ەلىمىزگە سلوۆەنيانىڭ ءىرى كاسىپكەرلەرى دە كەلدى. ەرتەڭ ولاردىڭ قاتىسۋىمەن بيزنەس فورۋم وتەدى. بۇل شارا وسى باعىتتاعى جۇمىستى كۇشەيتۋگە ىقپال ەتەدى دەپ ويلايمىن. سونىمەن قاتار كولىك-لوگيستيكا سالاسىنداعى بايلانىس اياسىن كەڭەيتۋ قاجەتتىگىن تالقىلادىق. ترانسكاسپي حالىقارالىق كولىك ءدالىزى جوباسىنا سلوۆەنيانىڭ Luka Koper تەڭىز پورتىن تارتۋ ماسەلەسىن تالقىلادىق. ورتاق پىكىرگە كەلدىك دەپ ايتۋعا بولادى. ءوزارا الىس-بەرىستىڭ كولەمىن ارتتىرۋ ءۇشىن قۇزىرلى ورگاندارعا ناقتى شارالار قابىلداۋ جونىندە تاپسىرما بەردىك. بۇدان بولەك سۋ رەسۋرستارىن باسقارۋ ىسىنە سلوۆەن تاراپىنىڭ وزىق تاجىريبەسىن زەردەلەپ، بىرلەسە جۇمىس ىستەۋگە دايىن ەكەنىمىزدى جەتكىزدىم، - دەدى مەملەكەت باسشىسى.
پرەزيدەنت تاعى ءبىر ماڭىزدى باعىت - مادەني-گۋمانيتارلىق ىقپالداستىق جايىنا توقتالدى.
- ءبىلىم، عىلىم جانە مادەنيەت سالاسىنداعى قاتىناستى جانداندىرۋعا مول مۇمكىندىك بار. جالپى، سلوۆەنيانىڭ ءبىلىم بەرۋ جۇيەسى دۇنيەجۇزىندە وزىق جۇيە رەتىندە مويىندالعان. سوندىقتان ءبىز ەكى ەل ۋنيۆەرسيتەتتەرى اراسىندا بايلانىس ورناتۋعا مۇددەلىمىز. قازاقستان سلوۆەنيانىڭ جوعارى وقۋ ورىندارىمەن جانە زەرتتەۋ ورتالىقتارىمەن ىنتىماقتاستىقتى نىعايتۋعا دايىن، - دەدى قاسىم-جومارت توقايەۆ.
وسىعان دەيىن قاسىم-جومارت توقايەۆ سلوۆەنيامەن قانداي سالالاردا تىڭ جوبالارلار جۇزەگە اسىرىلاتىندىعىن اتادى.
