تۇران جولبارىسىن قالپىنا كەلتىرۋ: كەلەر جىلى رەسەيدەن بالقاشقا 3-4 جولبارىس اكەلىنەدى
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ تۇران جولبارىسىن قالپىنا كەلتىرۋ جۇمىستارى جونىندە ايتىپ بەردى. وسىلايشا قازاقستان اۋماعىندا 70 جىلدان كەيىن العاشقى جابايى جولبارىستار پايدا بولماق.
ءمينيستردىڭ ايتۋىنشا، بيىل تۇران جولبارىسى مەن پرجيەۆالسكي جىلقىسىن تاريحي مەكەنىندە قالپىنا كەلتىرۋ بويىنشا ەكى ۇلكەن جوبا بەلسەندى جۇزەگە اسۋدا.
جولبارىستاردى تاريحي مەكەنىنە قايتا جەرسىندىرۋ باعدارلاماسى اياسىندا الماتى وبلىسىندا ىلە-بالقاش مەملەكەتتىك تابيعي رەزەرۆاتى قۇرىلدى.
− جولبارىستىڭ تابيعي ازىق قورىن قايتا قالپىنا كەلتىرۋ ءۇشىن 2018-2024 -جىلدارى رەزەرۆات اۋماعىنا 205 توعاي بۇعىسى اكەلىندى، 100-دەن استام قۇلان كوشىرىلدى، ەلىكتەر مەن قاباندار پوپۋلياتسياسى كوبەيتىلدى. بيىل كۇزدە ىلە-بالقاش رەزەرۆاتىندا ارنايى تورلى قورشاۋدا ءوسىرۋ ءۇشىن نيدەرلاندىدان 2 جولبارىس اكەلىندى، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.
سونداي-اق، 2025 -جىلى رەسەي فەدەراتسياسىنان 3-4 جولبارىس الىپ كەلۋ كۇتىلۋدە.
− اكەلىنگەن جولبارىستاردىڭ تۇقىمدارى قازاقستان اۋماعىندا 70 جىلدان كەيىن قايتا پايدا بولعان العاشقى جابايى جولبارىستار بولادى دەپ ۇمىتتەنەمىز، - دەدى ە. نىسانبايەۆ.
ەسكە سالا كەتسەك، بوگدانا جانە كۋما ەسىمدى قوس جولبارىستىڭ ەلگە كەلۋى دۇنيەجۇزىلىك جابايى تابيعات قورى (WWF) مەن ب ۇ ۇ- نىڭ دامۋ باعدارلاماسى اياسىندا جۇزەگە اسقان. كوشىرۋ پروتسەسى ورمان شارۋاشىلىعى جانە جانۋارلار دۇنيەسى كوميتەتى مەن نيدەرلاندى ورتالىعى اراسىنداعى مەموراندۋمعا قول قويۋدان باستالىپ، جولبارىستاردىڭ تۇقىمىن كوبەيتۋ ءۇشىن اقىسىز نەگىزدە اكەلىنگەن.
ايجان سەرىكجان قىزى
اۆتور
