ترامپتىڭ تۋعان كۇنىندە ا ق ش- تا اۋقىمدى اسكەري پاراد وتەدى
استانا. قازاقپارات – 14-ماۋسىمدا ا ق ش پرەزيدەنتى دونالد ترامپتىڭ تۋعان كۇنىندە ارميانىڭ مەرەيتويى قۇرمەتىنە وتكىزىلەتىن پاراد 45 ميلليون دوللارعا ءتۇسۋى مۇمكىن، دەپ حابارلايدى CBS News.
اتالعان شارا 14-ماۋسىمدا ا ق ش ارمياسىنىڭ 250 جىلدىعىن تويلاۋ اياسىندا وتەدى، ول پرەزيدەنت ترامپتىڭ 79-تۋعان كۇنىمەن تۇسپا-تۇس كەلەدى جانە وعان 25 ميلليوننان 45 ميلليون دوللارعا دەيىن قاراجات جۇمسالادى دەپ بولجانىپ وتىر.
ۆاشينگتوندا كولۋمبيا وكرۋگىندە پارادقا 100 دەن استام كولىك پەن مىڭداعان سارباز، سونداي-اق ازاماتتىق اۆياتسيانىڭ فەدەرالدىق باسقارماسىمەن «كەڭىرەك ۇيلەستىرۋدى» قاجەت ەتەتىن 50 تىكۇشاق قاتىسادى دەپ كۇتىلىپ وتىر.
- پرەزيدەنت ترامپ ا ق ش ارمياسىنىڭ تۋعان كۇنىن 250 جىل بۇرىن ۇلى ەلىمىز قۇرىلعاننان بەرى قىزمەت ەتكەندەردىڭ بارلىعىنا قۇرمەت كورسەتەتىن اسكەري پارادپەن اتاپ وتەدى، - دەدى اق ءۇيدىڭ باسپا ءسوز وكىلى اننا كەللي.
ترامپ بۇل جوسپارلارىن وسى ايدىڭ باسىندا راستادى.
- بىزدە ۇلكەن، ادەمى پاراد وتەدى، - دەدى پرەزيدەنت NBC ارناسىنىڭ «باسپاسوزبەن كەزدەسۋ» باعدارلاماسىندا.
پرەزيدەنت سونداي-اق بۇل شارا ونىڭ تۋعان كۇنىنە بايلانىستى ەمەس ەكەنىن ايتتى. باعا تۋرالى ساۋالعا ترامپ بۇل «وقيعانىڭ قۇنىمەن سالىستىرعاندا از اقشا» بولاتىنىن حابارلادى.
- بىزدە الەمدەگى ەڭ جاقسى زىمىراندار بار. الەمدەگى ەڭ جاقسى سۋاستى قايىقتارى بىزدە. الەمدەگى ەڭ جاقسى تانكتەر بىزدە. بىزدە الەمدەگى ەڭ جاقسى قارۋ بار. ءبىز وسىنى تويلايمىز، - دەدى دونالد ترامپ NBC News كە بەرگەن سۇحباتىندا.
بۇل جوسپارلار دەموكراتتار تاراپىنان ءبىراز سىنعا ۇشىرادى. وسى ايدىڭ باسىندا تەننەسسي وكىلى ستيۆ كوەن جوسپاردى ىسىراپ دەپ اتادى جانە مالىمدەمەسىندە: «باس ەگويست سالىق تولەۋشىلەردەن ونىڭ تۋعان كۇنىندە اسكەري پاراد ءۇشىن اقشا تولەۋىن قالايدى» دەپ جازدى.
ترامپتىڭ اسكەري شەرۋلەرگە دەگەن قىزىعۋشىلىعى كوپ جىل بۇرىن باستاۋ الادى. ءوزىنىڭ ءبىرىنشى مەرزىمىندە 2017-جىلى فرانسياعا ساپارى كەزىندە پرەزيدەنت باستيليانى الۋ كۇنىنە ارنالعان جىل سايىنعى شەرۋدى جوعارى باعالاپ، 4-شىلدەدە (ا ق ش تاۋەلسىزدىگى كۇنى - رەد.) «ءبىز ودان اسىپ ءتۇسۋىمىز كەرەك» دەپ ۇسىندى.
ءبىر جىلدان كەيىن اكىمشىلىك ارداگەرلەر كۇنىنە ارنالعان شەرۋدى جوسپارلاۋدى باستادى، ءبىراق ءىس-شارانىڭ 92 ميلليون دوللارلىق قۇنى انىقتالىپ، دەموكراتتاردىڭ سىنىنان كەيىن شەرۋ كەيىنگە قالدىرىلدى.
بۇعان دەيىن دەموكراتتار ۇشاقتى سىيلىق رەتىندە قابىلداعان ترامپتى سىنعا الدى.
