ترامپ رەسپۋبليكاشىلدار اراسىندا كوش باستاپ تۇر. ونى بايدەن دە مويىندادى
ا ق ش- تىڭ بۇرىنعى پرەزيدەنتى دونالد ترامپ پرەزيدەنتتىككە ۇمىتكەر رەسپۋبليكاشىلدار اراسىندا كوش باستاپ تۇر.
مۇنى اق ءۇيدىڭ قازىرگى باسشىسى دجو بايدەن دە مويىندادى. Kazinform بۇل جايىندا euronews-كە سىلتەمە جاساپ حابارلايدى.
دونالد ترامپ سەيسەنبى كۇنى نيۋ- يوركتە سەكسۋالدى زورلىق- زومبىلىق پەن جالا جابۋ ءىسى بويىنشا جۋرناليسكە قوسىمشا وتەماقى تولەۋگە قاتىستى سوت ىسىنە قاتىسۋى كەرەك.
- بۇل بۇرىنعى پرەزيدەنت ءۇشىن رەكورد ورناتقان سەنىمدى جەڭىس بولدى. دونالد ترامپتىڭ ايوۆا سايلاۋىنداعى جەڭىسى ونىڭ رەسپۋبليكاشىلدار پارتياسىن باقىلايتىنىن راستايدى جانە 2024-جىلعى پرەزيدەنتتىككە ۇمىتكەرلىك وعان تيەسىلى بولۋى ابدەن مۇمكىن ەكەنىن كورسەتەدى. ارينە، وسى ساتتەن باستاپ قاراشاداعى پرەزيدەنت سايلاۋىنا دەيىن كوپ نارسە وزگەرۋى مۇمكىن. ال ترامپتىڭ جاعدايىندا ونى بىرنەشە سوت پروتسەسى كۇتىپ تۇر، اقىر سوڭىندا ول سوت ۇكىمى شىعارىلعان قىلمىسكەر بولىپ شىعۋى دا مۇمكىن، - دەيدى ايوۆا شتاتىنداعى Euronews ءتىلشىسى فيليپ كروۋتەر.
ءبىراق بۇل ترامپتىڭ قىزۋ جاقتاستارىنا كەلەسى اپتادا نيۋ-گەمپشيردە باستالاتىن كەلەسى پرايمەريزدە جەڭىسكە جەتۋگە سەرپىن بەرۋىنە كەدەرگى كەلتىرمەدى.
جەڭىس سوزىندە بۇرىنعى پرەزيدەنت ۋكرايناداعى سوعىستى، گازاداعى سوعىستى شەشۋگە جانە ءبىر قىزىعى قايتا سايلانعان جاعدايدا دەموكراتتارمەن جۇمىس ىستەۋگە ۋادە بەردى.
ونىڭ نەگىزگى قارسىلاستارى رون دەسانتيس پەن نيككي حەيلي ءوز ناتيجەسىن وڭ باعالادى، ءبىراق سوڭىندا ترامپتان الدەقايدا ارتتا قالدى.
