ترامپ اليۋميني مەن بولات يمپورتىنا 25 پايىز باج سالىعىن ەنگىزدى
استانا. KAZINFORM – ا ق ش پرەزيدەنتى دونالد ترامپتىڭ جاڭا باج سالىقتارىنا ەۋرووداق ەلدەرى تاراپىنان جاۋاپ قايتارىلۋى مۇمكىن، دەپ حابارلايدى CBS News.
شەتەلدەن اكەلىنەتىن بولات پەن اليۋمينيدىڭ بارلىق يمپورتىنا، شىققان ەلىنە قاراماستان، باج سالىعى سالىنادى.
- بۇل - ۇلكەن ءىس، امەريكانىڭ قايتادان باي ەلگە اينالۋىنىڭ باسى، - دەدى دونالد ترامپ تاريفتەر جونىندەگى بۇيرىقتارعا قول قويۋ كەزىندە.
پرەزيدەنت ترامپتىڭ ارەكەتى امەريكانىڭ بولات پەن اليۋميني ونەركاسىبىنىڭ كۇشىن قالپىنا كەلتىرىپ، امەريكالىق جۇمىسشىلاردىڭ ءال-اۋقاتىن جاقسارتۋى ءتيىس.
دەمالىس كۇندەرى نيۋ-ورلەانعا 2025-جىلعى سۋپەركۋبوكقا بارا جاتقاندا Air Force One بورتىندا سۇحبات بەرگەن ترامپ امەريكالىق تاۋارلارعا باج سالىعىن ەنگىزەتىن ەلدەرگە دە «ءوزارا تاريفتەر» جاريالايتىنىن جەتكىزدى.
ەۋروپالىق كوميسسيا تاريفتەر تۋرالى رەسمي حابارلاما الماعانىن اتاپ ءوتتى. ءبىراق فرانسيا سىرتقى ىستەر ءمينيسترى جان-نوەل باررو ە و ەنگىزىلگەن كەز كەلگەن باج سالىقتارىن «قايتالايتىنىن» ايتتى.
گەرمانيانىڭ ەكونوميكا ءمينيسترى روبەرت حابەك «ۇزاق مەرزىمدى پەرسپەكتيۆادا تاريفتەر قاقتىعىسىندا تەك جەڭىلگەندەر بار» دەپ ەسكەرتتى.
اق ۇيدەگى العاشقى مەرزىمىندە ترامپ بىرنەشە ساۋدا سەرىكتەستەرىنە باج سالىعىنسىز كۆوتالاردى بەرمەس بۇرىن بولاتقا %25 جانە اليۋمينييگە %10 باج سالىعىن ەنگىزدى.
بۇعان دەيىن فرانسيا پرەزيدەنتى ەممانۋەل ماكرون ا ق ش- تىڭ ەۋروپاعا قاتىستى كەز كەلگەن باج سالىعىنا ارەكەت ەتۋگە دايىن ەكەنى حابارلانعان بولاتىن.
