ترامپ ا ق ش- تىڭ اسكەري جوسپارلارىن ماسكقا بەرۋگە قارسى شىقتى
استانا. KAZINFORM - ا ق ش پرەزيدەنتى دونالد ترامپ ميللياردەر يلون ماسكقا قىتايمەن ىقتيمال اسكەري قاقتىعىس جاعدايىنا ارنالعان قۇپيا اسكەري جوسپارلارعا قول جەتكىزۋگە رۇقسات بەرۋ يدەياسىن جوققا شىعاردى، دەپ حابارلايدى The New York Times.
- ءبىز قىتايمەن ىقتيمال سوعىستى قالامايمىز، ءبىراق ەگەر ونداي جاعداي بولىپ جاتسا، ءبىز وعان تولىق دايىنبىز. الايدا مەن بۇل تۋرالى ەشكىمگە كورسەتكىم كەلمەيدى، ال ونى بىزگە ۇلكەن كومەك كورسەتەتىن بيزنەسمەنگە مۇلدە اشىپ كورسەتۋگە بولمايدى، - دەدى دونالد ترامپ.
بۇل پىكىر يلون ماسكتىڭ جۇما كۇنى پەنتاگونعا بارىپ، ا ق ش-تىڭ قورعانىس ءمينيسترى پيت حەگسەتپەن جەكە كەزدەسۋىنەن كەيىن ايتىلدى.
ماسك پەن حەگسەتتىڭ كەزدەسۋى ءبىر ساعاتتان استام ۋاقىتقا سوزىلدى، بۇل قورعانىس مينيسترلىگىمەن كەلىسىمشارتتارى بار كومپانيا باسشىسى ءۇشىن ايتارلىقتاي ۇزاق ۋاقىت.
ترامپ قىتايدا ۇلكەن بيزنەسى بار ماسك قۇپيا اقپاراتتى بىلمەۋى كەرەك دەپ حابارلادى. بۇل پرەزيدەنتتىڭ ماسكتىڭ شتاتتان تىس مەملەكەتتىك قىزمەتكەر جانە كەڭەسشى بولا وتىرىپ، ىقتيمال مۇددەلەر قاقتىعىسى بولۋى مۇمكىن دەگەن العاشقى مالىمدەمەلەرىنىڭ ءبىرى بولدى.
كەيىن وۆال كابينەتىندە سويلەگەن سوزىندە ترامپ ماسكتىڭ پەنتاگونعا ساپارى ۇكىمەتتى قىسقارتۋ جونىندەگى كۇش-جىگەرىمەن بايلانىستى ەكەنىن ايتتى.
بۇعان دەيىن ا ق ش-تىڭ ف ب ر، مەملەكەتتىك دەپارتامەنت جانە پەنتاگون سياقتى نەگىزگى فەدەرالدىق قۇرىلىمدارى قىزمەتكەرلەرىنە يلون ماسكتىڭ ەلەكتروندىق حاتتارىنا جاۋاپ بەرمەۋدى تاپسىرعانى حابارلانعان.
ايتا كەتەلىك كانادادا يلون ماسكتى ازاماتتىقتان ايىرۋدى تالاپ ەتكەن پەتيتسيا باستالعانى تۋرالى جازعان ەدىك.
اۆتور
نازىم بولەسوۆا
