ترامپ ا ق ش اسكەرىنە يەمەندىك كوتەرىلىسشى حۋسيتتەرگە قارسى ارەكەتتى باستاۋدى تاپسىردى
استانا. KAZINFORM – ا ق ش پرەزيدەنتى دونالد ترامپ امەريكالىق قارۋلى كۇشتەرگە يەمەندىك كوتەرىلىسشى حۋسيەتتەرگە قارسى قۋاتتى سوققى بەرۋدى تاپسىردى، دەپ حابارلايدى BBC.
- مەن بۇگىن ا ق ش قارۋلى كۇشتەرىنە يەمەندىك تەرروريست حۋسيتتەرگە سەنىمدى دە قۋاتتى ارەكەت ەتۋگە بۇيرىق بەردىم، - دەپ جازدى ترامپ Truth Social الەۋمەتتىك جەلىسىندە.
ا ق ش پرەزيدەنتى بۇل شەشىمىن حۋسيتتەردىڭ امەريكالىق جانە وزگە دە كەمەلەردى، ۇشاقتار مەن ۇشقىشسىز ۇشاتىن اپپاراتتاردى اتقىلاۋدى توقتاتپاي جاتقانىمەن ءتۇسىندىردى.
- ترروريست حۋسيتتەرگە ايتارىم، ۋاقىتتارىڭ كەلدى، شابۋىلداردى بۇگىننەن باستاپ توقتاتۋلارىڭ كەرەك. ولاي بولماعان جاعدايدا سەندەردى وزدەرىڭ بۇرىن-سوڭدى كورمەگەن توزاق كۇتىپ تۇر، - دەپ جازدى ا ق ش پرەزيدەنتى.
- ءبىزدىڭ ەرجۇرەك اسكەرلەرىمىز امەريكالىق تەڭىز، اسكەري-تەڭىز اكتيۆتەرىن قورعاپ، كەمەلەردىڭ ەركىن قوزعالىسىن قامتاماسىز ەتۋ ءۇشىن تاپ قازىر تەرروريستەر، ولاردىڭ كوشباسشىلارى مەن زىمىرانعا قارسى جۇيەلەرىنە اۋەدەن سوققى بەرىپ جاتىر، - دەدى.
ول سونىمەن قاتار يراندى حۋسيتتەرگە قولداۋ كورسەتۋدى توقتاتۋعا شاقىردى.
- ا ق ش پەن ونىڭ حالقىنا، قوقان-لوقى جاساۋدى توقتاتىڭدار. ەگەر سىزدەر بۇل ارەكەتتى توقتاتپاساڭىزدار، ول ءۇشىن جاۋاپ بەرەتىن بولاسىزدار، - دەپ ەسكەرتتى ترامپ.
وسىعان دەيىن حۋسيتتەردىڭ قىزىل تەڭىزدە ا ق ش تانكەرى Madoعا شابۋىل جاساعانى تۋرالى جازدىق.
سونداي-اق ب ۇ ۇ ءوز قىزمەتكەرلەرىنىڭ حۋسيتتەر قولىنا تۇسۋىنە بايلانىستى يەمەندەگى كەيبىر وپەراتسيالارىن توقتاتقانى تۋرالى جازدىق.
