تۇنگى كلۋبتاعى كىسى ءولىمى: 16 ادامعا سوت ۇكىمى شىقتى
اقتوبەدە «ميللياردەر» تۇنگى كلۋبىنداعى كىسى ولىمىنە كىنالى دەپ تانىلعان 16 سوتتالۋشىعا ۇكىم شىقتى.
الدى 17 جىلعا باس بوستاندىعىنان ايىرىلىپ، كامەلەت جاسقا تولماعان ءبىر سوتتالۋشى باس بوستاندىعىنان شەكتەلدى، دەپ حابارلايدى Kazinform.
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا سوتتالۋشىلاردىڭ ءبارى قىلمىستىق كودەكستىڭ «ادام ۇرلاۋ» بابى بويىنشا اقتالدى. سونىمەن بىرگە سۋديا نۇرلان باقتىعاليەۆتىڭ ايتۋىنشا، كوبى قىلمىستىق كودەكستىڭ «ادام ءولتىرۋ» بابى بويىنشا ەمەس، «بۇزاقىلىق» بابى بويىنشا قايتا سارالاندى.
سوتتالۋشى س. تۇكتىباي 17 جىلعا، ءو. حاسەنوۆ 15 جىلعا باس بوستاندىعىنان ايىرىلدى. ال ە. سەرىك ۇلى 4 جىل 6 اي جازاسىن وتەيدى. سوتتالۋشىلار باقىتوۆ 4، تۋكەنوۆ 4، يشانوۆ 4، قاراتايەۆ 4، ۋرستەموۆ 4 جىلعا سوتتالدى. ال ەرمانوۆ 3، مۇحانبەتشارىپ، يسەنگارين، جاڭبىربايەۆ، قوسانوۆ، مىرزابايەۆ، جيەنالينگە 2 جىل 6 اي باس بوستاندىعىنان ايىرۋ جازاسى تاعايىندالدى. ال ايىپ تاعىلعان كەزدە كامەلەت جاسقا تولماعان مۋكانبەتجانوۆ 2 جىلعا باس بوستاندىعىنان شەكتەلدى.
«ادام ولتىرۋگە وقتالۋ، ادام ۇرلاۋ ايىبى تاعىلعانىمەن، سوت ءبارىن نەگىزسىز دەپ سانادى. بۇل باپتار بويىنشا بارلىق سوتتالۋشى اقتالىپ وتىر. دالەلدەنگەن جوق. بۇل جەردە ادام ۇرلاۋ دەرەگى مۇلدە جوق. الدىن الا ءسوز بايلاسۋ دا دۇرىس ەمەس. جابىرلەنۋشىلەر وزدەرى كەلگەن، الدىن الا كەلىسكەن ەشكىم جوق. سول ساتتە توبەلەس باستالعان. سوتتالۋشىلاردىڭ بۇرىن قىلمىسقا تارتىلماعانىن، كەشىرىم سۇراعانىن، بالالارىن ەسكەردى. سوت جازانىڭ ءتۇرى مەن مولشەرىن انىقتاعان كەزدە جابىرلەنۋشىلەردىڭ كەشىرىم بەرمەگەنىن دە نەگىزگە الدى»، - دەدى سۋديا نۇرلان باقتىعاليەۆ.
ەسكە سالساق، بۇرىن سوتتالىپ، جازاسىن وتەپ شىققان حانگەلدى مۇحانبەتشارىپ، قىلمىستىق ورتادا «سارى جاسيك» اتىمەن تانىمال جانسەرىك يشانوۆ زاڭسىز «كۇزەت قىزمەتىن» مىندەتىنە الادى. ول ءۇشىن جانىنا سپورتقا بەيىم بىرنەشە ادامدى جينايدى. اراسىندا كامەلەت جاسقا تولماعانى دا بار. 2022-جىلدىڭ اقپان ايىنان باستاپ يشانوۆ اقتوبە قالاسى استانا اۋدانىندا ورنالاسقان تۇنگى كلۋبتى جالعا الۋشى قاراتايەۆپەن اۋىزشا كەلىسىپ، «كۇزەت قىزمەتىن» ۇيىمداستىردى. كۇزەتشىلەر رەتىندە قىزمەت اتقارۋعا مۇحانبەتشارىپ، تۇكتىباي، يسەنگارين، جاڭبىربايەۆ، قوسانوۆ، مىرزابايەۆ، ەرمانوۆ، جيەنالين، سەرىك ۇلى، باقىتوۆ، تۋكەنوۆ، كامەلەتكە تولماعان مۋكانبەتجانوۆتى جيناقتاعان. كۇزەتشى مەن تۇنگى كلۋبقا كەلگەن ادامدار اراسىنداعى توبەلەس الدىمەن دالادا بولعان.
كەيىن سوققىدان زارداپ شەككەن جابىرلەنۋشىلەردى ءبىر توپ ايىپتالۋشى ىشكە كىرگىزىپ ۇرادى. ادامداردىڭ سوققى العانىن سول كەزدە تۇنگى كلۋبتا بولعان دەمالۋشىلار كورگەن. وقيعا كوپشىلىك اراسىنا تاراپ كەتپەۋى ءۇشىن ايىپتالۋشىلار كولىكپەن ولاردى قالا سىرتىنا الىپ كەتۋدى ويلاستىرادى. ءسويتىپ، ءبىرىن كولىكتىڭ ىشىنە، ەكىنشىسىن جۇك سالعىشقا سالىپ، قالا ىشىمەن جۇرەدى. سول كەزدە جۇك سالعىشتا جاتقان جابىرلەنۋشى جاقىپوۆ قاشىپ كەتىپ، اسحاناعا جەتىپ ۇلگەرەدى، ادامداردان كومەك سۇرايدى. ال سوڭىنان قۋعان مۇحانبەتشارىپ پەن مىرزابايەۆ بىردەن بوي تاسالايدى. ەكىنشى كولىكتە وتىرعان جابىرلەنۋشى تەمىروۆ تە كولىك باعدارشامعا توقتاعان كەزدە قاشىپ، جان ساقتايدى. ال كولىك ىشىندەگى ايىپتالۋشىلار قالانىڭ نوكين داڭعىلىنداعى جاعاجاي ماڭىنا كوشكىنبايەۆتىڭ، تولەۋوۆتىڭ دەنەسىن تاستاپ كەتەدى.
سوت ۇكىمى كۇشىنە ەنگەن جوق. سوت ۇكىمى وقىلىپ بىتكەن سوڭ سوتتالۋشىلاردىڭ تۋىستارى ايقاي-شۋ شىعارىپ، ارنايى قىزمەت ءبارىن زالدان شىعارىپ جىبەردى.
