تۇنگى كلۋبتا قىدىرعان - قىزىلوردادا ەكى مۇعالىم جۇمىستان بوساتىلدى

«كۇندەلىكتى قارىم-قاتىناستا ادەپ نورمالارىن ساقتاۋ مۇعالىمدەر ءۇشىن ۇيرەنشىكتى ادەتكە اينالۋى ءتيىس. وكىنىشكە وراي، عالامتوردا مۇعالىمدەردىڭ اتالعان پرينسيپتەردى ساقتامايتىندىعى تۋرالى اقپارات شىعىپ تۇرادى. بىرنەشە مىسال كەلتىرەيىن:

1. قىسقى دەمالىس ۋاقىتىندا تۇركيانىڭ تۇنگى كلۋبتارىنىڭ بىرىندە قىدىرىپ جۇرگەن قىزىلوردا وبلىسىنىڭ ەكى مۇعالىمىنىڭ الەۋمەتتىك جەلىلەردەگى جاريالانىمدارى اتا-انالار قاۋىمىنىڭ نارازىلىعىن تۋدىردى. پەداگوگتەر جۇمىستان بوساتىلدى.

2. وتكەن جىلى پاۆلودار وبلىسىنداعى №28-بالاباقشا- بوبەكجايدىڭ جاتىن بولمەسىنە ورناتىلعان باقىلاۋ كامەراسىنا تاربيەشىنىڭ بالاعا كورسەتكەن دورەكى ارەكەتى تۇسىرىلگەن. ق ر ەڭبەك كودەكسىنىڭ 52-بابىنىڭ 1-تارماعىنىڭ 14-تارماقشاسىنا سايكەس، پەداگوگ تەرىس سەبەپتەرمەن جۇمىستان بوساتىلدى»، - دەپ جازدى ەرنۇر داۋەنوۆ.

سونداي-اق، ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى مۇعالىمدەردىڭ جۇمىس ورنىندا جانە قوعامدىق جەرلەردە ءجۇرىس-تۇرىسىن، ءوزىن ۇستاۋ ادەبىن ايقىندايتىن زاڭ نورمالارىن اتاپ ءوتتى.

«پەداگوگ مارتەبەسى تۋرالى» زاڭ پەداگوگ مارتەبەسىن بەكىتىپ، پەداگوگتىڭ قۇقىقتارىن، الەۋمەتتىك كەپىلدىكتەرى مەن شەكتەۋلەرىن، مىندەتتەرى مەن جاۋاپكەرشىلىگىن بەلگىلەدى.

مينيسترلىكتىڭ 2020 -جىلعى 11-مامىرداعى № 190-بۇيرىعىمەن بەكىتىلگەن پەداگوگيكالىق ادەپ ەرەجەلەرىن ءاربىر مۇعالىم ۇستانۋى ءتيىس. قاعيدالارعا سايكەس مۇعالىمدەر قىزمەتتىك جانە قىزمەتتىك ەمەس ۋاقىتتا 7 قاعيدات پەن 19 مىنەز-قۇلىق نورماسىن ساقتاۋعا مىندەتتى.

«پەداگوگيكالىق ادەپ قاعيدالارىندا پەداگوگ الەۋمەتتىك جەلىلەردە دايەكسىز جانە (نەمەسە) ادەپسىز اقپاراتتى تاراتپايدى، قوعامدا پەداگوگتىڭ جوعارى اتاعىن نىعايتۋعا ىقپال ەتەدى، پەداگوگتىڭ جوعارى اتاعىنىڭ بەدەلىن تۇسىرۋگە مۇمكىندىك تۋعىزاتىن ءىس-ارەكەتتەردى جاساۋعا جول بەرمەيدى دەلىنگەن (قاعيدالاردىڭ 7-تارماعىنىڭ 4) جانە 17) تارماقشالارى)»، - دەپ جازدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى