تەڭگەنىڭ جاڭا ءداۋىرى باستالدى - تيمۋر سۇلەيمەنوۆ
قازاقستاندا سەنىمدى قارجىلىق ينفراقۇرىلىم مەن نارىقتىق ەكونوميكاعا بەيىمدەلگەن بانك جۇيەسى قۇرىلدى. جوعارى ساپالى قارجىلىق قىزمەتتەر ەلىمىزدىڭ ءاربىر تۇرعىنىنا قولجەتىمدى.
بۇل تۋرالى ۇلتتىق بانك ءتوراعاسى تيمۋر سۇلەيمەنوۆ قازاقستان قارجىگەرلەرىنىڭ XI كونگرەسىندە ايتتى، دەپ حابارلايدى Kazinform.
«زايىرلى مەملەكەت قالىپتاسۋ كەزەڭىندە تەڭگەنىڭ ەنگىزىلۋى تولىققاندى قارجى جۇيەسىن قالىپتاستىرۋعا جانە ەلىمىزدىڭ مەملەكەتتىلىگىنىڭ ىرگەتاسىن نىعايتۋعا مۇمكىندىك بەردى. ول اقشا-نەسيە ساياساتى تاۋەلسىزدىگىنىڭ نەگىزىن قالادى»، - دەدى ۇلتتىق بانك ءتوراعاسى.
تيمۋر سۇلەيمەنوۆ سوڭعى بەس جىلدا قولما-قول اقشاسىز تولەمدەردى ىلگەرىلەتۋ جانە قارجىلىق قىزمەتتەردى سيفرلاندىرۋدى قامتاماسىز ەتۋدە جەتىستىكتەرگە قول جەتكىزىلگەنىن اتاپ ءوتتى.
«بۇگىن تەڭگەگە - 30 جىل. تەڭگەنىڭ جاڭا ءداۋىرى باستالدى. ءبىز ۇلتتىق ۆاليۋتانىڭ - سيفرلىق كەڭىستىكتەگى ءداۋىردىڭ كۋاسى بولدىق. سيفرلىق تەڭگە - قارجى جۇيەسىنىڭ جاھاندىق ترانسفورماتسياسىنا اسەر ەتەتىن ەڭ ماڭىزدى ترەند ەكەنىن بىلەسىزدەر»، - دەدى ول.
ۇلتتىق بانك ءتوراعاسىنىڭ سوزىنشە، بۇگىندە قازاقستاندا سەنىمدى قارجىلىق ينفراقۇرىلىم مەن نارىقتىق ەكونوميكاعا بەيىمدەلگەن بانك جۇيە قۇرىلدى. جوعارى ساپالى قارجىلىق قىزمەتتەر ەلىمىزدىڭ ءاربىر تۇرعىنىنا قولجەتىمدى.
