تەڭگەنىڭ السىرەۋىنە اسەر ەتكەن 3 فاكتور اتالدى
استانا. KAZINFORM - تەڭگە باعامىنىڭ السىرەۋىنە نەگىزگى ءۇش فاكتور اسەر ەتىپ وتىر. بۇل تۋرالى ۇكىمەتتە ءوتىپ جاتقان بريفينگتە پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
- سوڭعى بىرنەشە اپتادا ۆاليۋتا نارىعىندا بەلگىلى ءبىر قۇبىلۋلار بايقالىپ وتىر. بۇل ۇلتتىق ۆاليۋتا باعامىنىڭ السىرەۋىنەن كورىنىس تاپتى. وتكەن اپتادا ا ق ش دوللارىنىڭ باعامى 500 تەڭگەدەن استى. وسىعان بايلانىستى بيزنەس پەن ازاماتتارىمىزدىڭ الاڭداۋشىلىعىن تۇسىنە وتىرىپ، ۇكىمەت پەن ۇلتتىق بانك ۆاليۋتا نارىعىنداعى تۇراقتىلىقتى قامتاماسىز ەتۋ بويىنشا كەلىسىلگەن شارالاردى قابىلداۋدا، - دەدى ول.
وسى ورايدا ۆيتسە-پرەمەر ۇلتتىق ۆاليۋتا باعامىن تۇزەتۋ ىرگەلى سىرتقى فاكتورلاردىڭ اسەرىنەن عانا تۋىندايتىن قۇبىلىس ەكەنىن اتاپ ءوتتى.
- ولاردىڭ ىشىندە نەگىزگى ۇشەۋىن ءبولىپ كورسەتۋگە بولادى. ءبىرىنشى فاكتور - سوڭعى ايلاردا دوللار يندەكسىنىڭ جاھاندىق نىعايۋى. ەكىنشى فاكتور - الەمدىك مۇناي باعاسىنىڭ تومەندەۋى. ال سوڭعى ماڭىزدى فاكتور - رەسەي رۋبلىنىڭ السىرەۋى. رەسەي ءبىزدىڭ نەگىزگى ساۋدا سەرىكتەسىمىز ەكەنىن ەسكەرسەك، رۋبل باعامىنىڭ قۇبىلۋى تەڭگە باعامىنا اسەر ەتۋى مۇمكىن. ازاماتتارىمىزدىڭ الەۋمەتتىك جاعدايى مەن ءال-اۋقاتىنىڭ ناشارلاۋىنا جول بەرمەۋ جانە كاسىپكەرلەرگە تەرىس اسەرىن ازايتۋ ۇكىمەتتىڭ باستى مىندەتى. ەكونوميكا مەن حالىق ءۇشىن ىقتيمال تەرىس سالداردى تۇراقتاندىرۋ ءارى بارىنشا ازايتۋ ءۇشىن بارلىق قاجەتتى شارا قابىلدانادى. بۇل ءۇشىن ۇكىمەتتە رەسۋرستار مەن قۇرالدار جەتكىلىكتى»، - دەدى نۇرلان بايبازاروۆ.
اۆتور مارلان جيەمباي
