ۆەتنام قازاقشا وقۋعا كوشتى
استانا. قازاقپارات- ۆەتنام جۇرتى قازاقشا ۇيرەنىپ جاتىر، دەپ حابارلايدى 24KZ.
وقىتۋشى - قازاق ەمەس، سول جەردىڭ ازاماتى. ماي فام ەسىمدى بويجەتكەن قازاق ءتىلىن نەبارى 1 جىلدا ۇيرەنگەن. ەندى ءوزى قازاقشا بىلگەنىمەن قويماي، وزگەلەردى ۇيرەتىپ ءجۇر. ءتىپتى ۆەتنامدىقتاردان بولەك، وزگە ەلدىڭ ۇل-قىزدارىنا قاشىقتان ساباق بەرەدى.
ۆەتنام- وڭتۇستىك شىعىس ازيانىڭ الاقانداي جەرىن مەكەن ەتكەن ەڭبەكقور حالىق. بۇل ەلدە قازاق ءتىلىن ۇيرەنەتىندەرمەن قاتار ۇيرەتەتىندەر دە بار. ديماش قۇدايبەرگەننىڭ ونەرى ارقاسىندا قازاق مادەنيەتىنە قۇلاي عاشىق بولعان ماي فام بۇگىندە قازاقشاعا دەن قويعان. ماقساتى - ديماشتىڭ انا ءتىلىن ءتۇسىنۋ، ءتول مادەنيەتىنە تەرەڭ بويلاۋ. ونىسى جايلى ءانشىنىڭ الماتىداعى كونسەرتىندە، ءدۇيىم جۇرتتىڭ الدىندا قازاقشا مالىمدەگەن ەدى.
ماي قازاقشا ۇيرەنۋدى 2021-جىلى باستاپتى. قازاقستاننان قاشىقتان وقىتاتىن مۇعالىم تاپقان. مۇنى ۆەتنامداعى ديماشتىڭ باسقا جانكۇيەرلەرى دە كورىپ، ولار دا قولقا سالا باستاعان. ءسويتىپ، كەيىنگى ەكى جىلدا ماي تەك ۆەتنامدىقتار عانا ەمەس، الەمنىڭ وزگە دە ەلدەرىندەگى قازاق ءتىلىن ۇيرەنەم دەۋشىلەرگە ونلاين فورماتتا ساباق بەرىپ ءجۇر.
ماي فام، قازاق ءتىلىنىڭ وقىتۋشىسى:
- قازاق ءتىلىن ۇيرەنۋ مەنى كەرەمەت باقىتقا بولەيدى. وسى ءتىلدى ۇيرەتۋ بارىسىندا وقۋشىلارىم عانا ەمەس، مەن دە كوپ ۇيرەنەمىن. ولاردىڭ قويعان سۇراقتارى مەنى كوپ ىزدەنىپ، ولارعا تۇشىمدى جاۋاپ بەرۋگە ىنتالاندىرادى.
ۆەتنام ءالىپبيى لاتىنشا، ال قازاق ءالىپبيى كيريلشە بولسا دا، ەگەر بايقاپ وتىرساڭىز، ەكەۋى بىردەي-اق. ولاردىڭ نەگىزگى ايىرماشىلىعى ارىپتەردىڭ دىبىستالۋىندا. ەرەجەلەر، ارينە، باسقاشا، ءبىراق ءبىر جىلعا جۋىق ۋاقىت ۇيرەنگەننەن كەيىن قاتتى قيىن بولمايدى. اۆستروازيالىق تىلدەر توبىنا جاتاتىن ۆەتنام ءتىلى تۇركى تىلدەر توبىنداعى قازاقشاعا مۇلدەم ۇقسامايدى. تاريحي بايلانىسى دا جوق. الايدا ماي مەن ونىڭ وقۋشىلارى بۇل كەدەرگى ەمەس. باستىسى، ديماشتىڭ انا ءتىلىن تۇسىنسەك، قازاق تىلىندە سويلەسەك دەگەن نيەتتەرى بار.
ماي وقۋ قۇرالى رەتىندە ديماش تۋرالى جازاتىن جاڭالىقتار پورتالىن دا قولدانادى. سەبەبى وندا ءماتىننىڭ قازاق تىلىندەگى نۇسقاسىنان بولەك، اعىلشىنشاسى دا بار. سالىستىرا اۋدارىپ ۇيرەنگەنگە جاقسى. وعان قوسا قازاق تىلىندەگى سۋبتيترلارى بار بەينەماتەريالداردى كورسەتەدى. الايدا مۇندايلار كوپ ەمەس. الدا سونداي ۆيدەولار كوبىرەك بولسا دەگەن تىلەگى بار.
