ۆەتنام پارلامەنتتىك دەلەگاتسياسى قازاقستانعا كەلەدى
ۆەتنام پارلامەنتتىك دەلەگاتسياسى قازاقستاننىڭ سەنات جانە ءماجىلىس توراعالارىمەن كەزدەسەدى. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«2023-جىلعى 25-28- قىركۇيەك ارالىعىندا ۆەتنام كوممۋنيستىك پارتياسى ورتالىق كوميتەتىنىڭ مۇشەسى جانە ۆ س ر ۇلتتىق جينالىسى ءتوراعاسىنىڭ ءبىرىنشى ورىنباسارى نگۋەن كحاك دين باسقاراتىن پارلامەنتتىك دەلەگاتسيا قازاقستانعا كەلەدى»، - دەدى ا. سمادياروۆ اپتالىق بريفينگىدە.
ونىڭ ايتۋىنشا، ساپار بارىسىندا ۆەتنام وكىلدەرىنىڭ ق ر پارلامەنتى سەناتىنىڭ ءتوراعاسى ماۋلەن اشىمبايەۆ، ق ر پارلامەنتى ءماجىلىسىنىڭ ءتوراعاسى ەرلان قوشانوۆ، ق ر پرەمەر-ءمينيسترىنىڭ ورىنباسارى سەرىك جۇمانعارين، الماتى قالاسى اكىمىنىڭ ورىنباسارى ارمان قىرىقبايەۆ پەن ق ر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعاليمەن ەكىجاقتى كەزدەسۋلەرى جوسپارلانعان.
بۇدان بولەك، 25-27- قىركۇيەكتە بۇكىلقىتايلىق حالىق وكىلدەرى جينالىسى تۇراقتى كوميتەتى (ءب ح و ج ت ك) سىرتقى ىستەر جونىندەگى كوميتەتى ءتوراعاسىنىڭ ورىنباسارى حاو پيننىڭ قازاقستانعا ساپارى وتەدى.
«اتالعان ساپار ەكى ەل اراسىنداعى پارلامەنتارالىق ءوزارا ءىس-قيمىلدى ودان ءارى جانداندىرۋعا باعىتتالعان. ساپار بارىسىندا ق ر پارلامەنتى ماجىلىسىندە، سىرتقى ىستەر مينيسترلىگىندە، قازاقستاننىڭ ستراتەگيالىق زەرتتەۋلەر ينستيتۋتىندا جانە ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە كەزدەسۋلەر ۇيىمداستىرىلادى»، - دەدى رەسمي وكىل.
