تەمىرتاۋدا جاستار ساياساتى جونىندەگى كەڭەستىڭ كوشپەلى وتىرىسى ءوتتى
استانا. KAZINFORM - ەرلان قارين ساپار اياسىندا ىشكى ساياسات ماسەلەلەرى بويىنشا جيىن وتكىزدى، دەپ حابارلايدى اقوردانىڭ باسپا ءسوز قىزمەتى.
باسقوسۋعا قاراعاندى وبلىسىنىڭ اكىمى ەرماعانبەت بولەكپايەۆ، قالا جانە اۋدان اكىمدەرى، ايماقتاعى مەملەكەتتىك ورگانداردىڭ باسشىلارى قاتىستى.
جيىندا مەملەكەت باسشىسى ۇلتتىق قۇرىلتايدىڭ IV وتىرىسىندا ايقىنداپ بەرگەن مىندەتتەردى جۇزەگە اسىرۋ، ىشكى ساياسات سالاسىنداعى جۇمىستىڭ باسىم باعىتتارى، سونىڭ ىشىندە قوعامدىق كەلىسىمدى، ەتنوسارالىق جانە ءدىنارالىق تاتۋلىقتى نىعايتۋ، ونوماستيكا، اقپارات جانە جاستار ساياساتى ماسەلەلەرى تالقىلاندى.
ودان كەيىن مەملەكەتتىك كەڭەسشى ءوڭىردىڭ شىعارماشىلىق جانە عىلىمي ينتەلليگەنتسيا وكىلدەرىمەن كەزدەسۋ وتكىزدى. پىكىر الماسۋ بارىسىندا ەرلان قارين ۇلتتىق قۇرىلتايدا پرەزيدەنت كوتەرگەن الەۋمەتتىك جانە مادەني-گۋمانيتارلىق باستامالار تۋرالى ايتتى.
بۇدان بولەك، مەملەكەتتىك كەڭەسشى قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ كوشپەلى وتىرىسىن وتكىزدى. باسقوسۋدا قازاقستان جاستارىن جۇمىسپەن قامتۋ جانە جۇمىسشى ماماندىقتارىنىڭ مارتەبەسىن كوتەرۋ ماسەلەلەرى تالقىلاندى. كەڭەس وتىرىسى ايماقتاعى ەڭ ءىرى وندىرىستىك كاسىپورىن - «Qarmet» مەتاللۋرگيالىق كومبيناتىندا ۇيىمداستىرىلعانىن اتاپ وتكەن ءجون.
ساپار قورىتىندىسى بويىنشا جاستار ساياساتى جانە مادەني- گۋمانيتارلىق دامۋ باعىتىندا اتقارىلىپ جاتقان جۇمىستى جەتىلدىرۋگە قاتىستى ناقتى ۇسىنىستار ازىرلەنىپ، مەملەكەتتىك ورگاندارعا تاپسىرمالار بەرىلدى.
بۇعان دەيىن حابارلانعانداي، ق ر مەملەكەتتىك كەڭەسشىسى ەرلان قارين شەتەلدىك كوزدەردەن قارجى الاتىن ۇكىمەتتىك ەمەس ۇيىمدار مەن ازاماتتىق بەلسەندىلەر قىزمەتى تۋرالى پىكىرىن ءبىلدىردى.
