تەمەكى ساتىپ الۋعا بىرتىندەپ تىيىم سالىنادى
بريتان ۇكىمەتى شىلىمقورلىقپەن بىلەك سىبانا كۇرەسپەك. قازىر ەلدە تەمەكى تەك 18 جاستان اسقاندارعا عانا ساتىلادى. بولاشاقتا بۇل جاس جىل سايىن جوعارىلاي بەرمەك. ناتيجەسىندە ءبىرشاما ۋاقىت وتكەن سوڭ شىلىم اتاۋلى ەشكىمگە ساتىلمايدى، دەيدى Kazinform ءتىلشىسى.
ۇلى بريتانيا ۇكىمەتىنىڭ مالىمەتى بويىنشا، 5 شىلىمقوردىڭ 4 ەۋى ءبىرىنشى رەت 20 جاسىندا تەمەكى شەگە باستايدى ەكەن. ولاردىڭ نيكوتينگە تاۋەلدىلىگى ءومىرىنىڭ سوڭىنا دەيىن جالعاسادى.
شىلىمقورلىقتىڭ سالدارىنان تۇماندى البيوندا جىل سايىن شامامەن 64 مىڭ ادام قايتىس بولادى.
تەمەكى شەگەمىن دەپ اۋرۋ تىلەپ الاتىن 75 مىڭداي ازامات اي سايىن دارىگەرگە قارالادى.
زيان ادەتتىڭ ەل ەكونوميكاسىنا تيگىزەر زاردابى دا وراسان: جۇمىسسىزدىق، مەرزىمىنەن بۇرىن قايتىس بولۋ جانە ۇلتتىق دەنساۋلىق ساقتاۋ قىزمەتىنە سالماق ءتۇسىرۋدىڭ ناتيجەسىندە جىل سايىن 17 ميلليارد ستەرلينگ فۋنت كولەمىندە شىعىن كەلەدى.
«مەن بولاشاقتا تەمەكى شەگۋ جاسىن جىل سايىن ءبىر جىلعا كوتەرۋدى ۇسىنامىن. بۇل بۇگىنگى ون ءتورت جاسار جاسوسپىرىمگە بولاشاقتا ەشقاشان زاڭدى تۇردە تەمەكى ساتىلمايدى دەگەن ءسوز. ولار جانە ولاردىڭ ۇرپاقتارى تەمەكى شەكپەي وسەدى»، - دەيدى ۇلى بريتانيا پرەمەر-ءمينيسترى ريشي سۋناك.
ۇكىمەت جاڭا زاڭ جوباسىنىڭ شىلىم شەگۋشىلەردى قىلمىسكەرلەرمەن تەڭەستىرمەيتىنىن اتاپ ءوتتى. ءقازىر تەمەكى ساتىپ الىپ جۇرگەن كەز-كەلگەن ادامنىڭ بولاشاقتا دا قۇقىعى شەكتەلمەيدى دەدى بيلىكتەگىلەر.
بۇدان بولەك ەلەكتروندى تەمەكىنىڭ بالالارعا ساتىلماۋى دا قاتاڭ قاداعالانباق. ويتكەنى ءاربىر بەسىنشى بالانىڭ ۆەيپتىڭ ءدامىن كورگەنى بەلگىلى بولىپ وتىر.
«ءاردايىم بالا كۇتۋشى مەملەكەت كەبىن كيۋ - كونسەرۆاتورلاردىڭ ماقساتى ەمەس. ءبارى دە كەرىسىنشە. بۇل قوعام يگىلىگى ءۇشىن جاسالىپ وتىر دەپ ايتاتىنداي جاعداي شىعار. زيان ادەتىن قويا الماي جۇرگەن قازىرگى شىلىمقورلاردان باستاپ بۇل باستامانى قولدايدى دەپ ويلايمىن»، - دەيدى ساياساتكەر دجەننيفەر دجونسون.
جاڭا ساياساتتىڭ ناتيجەسىندە جاستار 2040-جىلعا قاراي تولىعىمەن تەمەكىدەن باس تارتپاق.
ءبىراق ۇلى بريتانيادا تەمەكى بيزنەسىن دوڭگەلەتىپ جۇرگەن ءىرى كومپانيالاردىڭ كىرىستەن ايىرىلاتىنى انىق. وسكەلەڭ ۇرپاقتى بۇل زياندى ادەتتەن ادا ەتۋ باستاماسىن حالىق تا قولداپ جاتىر.
«مەنىڭشە، وسى تەكتەس كەيبىر ماسەلەلەر بويىنشا باقىلاۋدى كۇشەيتۋ كەرەك-اق. شىلىم شەگۋدىڭ ەشقانداي دا پايداسى جوق. سوندىقتان مەن تىيىم سالۋدى تولىعىمەن قولدايمىن»، - دەيدى كوشە جۇرگىنشىسى.
«جاس ەرەكشەلىگىنە بايلانىستى شەكتەۋ قويىپ، بالالاردى قاداعالاۋ دۇرىس. مەنىڭ 14 جاسار ۇلىم بار. ونىڭ تەمەكى ساتىپ العانىن قالاماس ەدىم»، - دەيدى تاعى ءبىر بريتانيالىق.
وسىعان ۇقساس زاڭ جوباسىن 2022-جىلدىڭ جەلتوقسانىندا جاڭا زەلانديا پارلامەنتى ماقۇلدادى.
ول ەلدە 2009-جىلدان كەيىن تۋعان ادامدارعا تەمەكى ساتىلمايدى. دانيا مەملەكەتى دە وسى باعىتتا ارەكەت ەتۋدى جوسپارلاپ وتىر.
