تەك قاعاز جۇزىندە تىركەلگەن مال تىزىمنەن شىعارىلدى

- اگروونەركاسىپتىك كەشەندى دامىتۋداعى جۇيەلىك ماسەلەلەردىڭ ءبىرى - سالانىڭ ستاتيستيكالىق دەرەكتەرىنىڭ بۇرمالانۋى. مەملەكەت باسشىسىنىڭ تاپسىرماسىنا سايكەس، جەرگىلىكتى اتقارۋشى ورگاندار جانە ۇلتتىق ستاتيستيكا بيۋروسىمەن بىرلەسىپ، مال شارۋاشىلىعى سالاسىنداعى ستاتيستيكالىق دەرەكتەردى ناقتىلاۋ، سونداي-اق مال شارۋاشىلىعى ونىمدەرى ءوندىرىسى مەن مال باسى سانىنداعى ەسەپتىلىككە قاتىستى اۋقىمدى جۇمىس اتقارىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ناتيجەسىندە مال سانى مەن ءونىمى تۋرالى جالعان دەرەكتەر تىزىمنەن جويىلعان.

- شامامەن 1,9 ميلليون ءىرى قارا مال، 3 ميلليون ۇساق مال، 3 ميلليون توننا ءسۇت جانە باسقا دا مالىمەتتەر تىزىمنەن شىعارىلدى. بۇل رەتتە، تىزىمنەن شىعارىلعان مالدىڭ نەگىزگى بولىگى جەكە قوسالقى شارۋاشىلىقتارعا تيەسىلى، - دەپ ناقتىلايدى مينيسترلىكتەن.

ۆەدومستۆو اقپاراتىنا قاراعاندا، 2024 -جىلدىڭ 12 ايىنىڭ قورىتىندىسى بويىنشا ەلىمىزدەگى بارلىق شارۋاشىلىق ساناتتارىندا مال مەن قۇس سانى 2023 -جىلدىڭ سايكەس كەزەڭىمەن سالىستىرعاندا ارتقان.

- بۇل تۇرعىدا ءىرى قارا مال سانى - 7 842,6 مىڭ (%118,5)، ۇساق مال سانى - 20,1 ميلليون (%108,1)، جىلقى سانى - 4 217,4 مىڭ (%109,5)، تۇيە سانى - 281,6 مىڭ (%106,3)، قۇس سانى - 45,2 ميلليون (%102,6)، - دەپ اتالىپ وتكەن اۋىل شارۋاشىلىعى مينيسترلىگى اقپاراتىندا.

پرەزيدەنت قاسىم-جومارت توقايەۆ 2024 -جىلعى جولداۋىندا ەلدەگى مالدىڭ سانى قولدان كوبەيتىلگەنىن اتاپ، قۇجاتتاعى 5 ميلليون باس مالدىڭ ومىردە جوق بولىپ شىققانىن ايتقان بولاتىن.

بىلتىر كۇزدە ستراتەگيالىق جوسپارلاۋ جانە رەفورمالار اگەنتتىگى Kazinform ساۋالىنا جولداعان جاۋاپتا ەلدەگى مال سانىن قولدان كوبەيتىپ جازعان وڭىرلەردى اتاپ كورسەتتى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى