«Telegram» - نىڭ قازاقستانعا جاۋاپتى كەڭسەسى استانادا اشىلاتىن بولدى
استانا. KAZINFORM - سەناتتىڭ جالپى وتىرىسىندا سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ «Telegram» - نىڭ قازاقستانعا جاۋاپتى كەڭسەسى قاي قالادا اشىلاتىنىن ايتتى.
«ءبىز astana حالىقارالىق قارجى ورتالىعىنىڭ بازاسىندا «Telegram» - نىڭ كەڭسەسىن اشىپ جاتىرمىز. كونتەنتتى مودەراتسيالاۋعا جاۋاپتى ناقتى ادام انىقتالادى. ەگەر زورلىق-زومبىلىققا شاقىرۋ نەمەسە ەسىرتكىنىڭ زاڭسىز اينالىمىمەن بايلانىستى زاڭ بۇزۋ فاكتىلەرى تىركەلسە، Telegram ءبىزدىڭ وتىنىشتەرىمىزدى جىلدام قاراپ، ارنالاردى بۇعاتتاپ، جويۋعا كومەكتەسەدى»، - دەدى مينيستر.
بۇعان دەيىن Telegram قازاقستانداعى وكىلىن تاعايىنداپ، كەڭسەسىن اشاتىنى حابارلانعان.
ءبىراق ول كەڭسەنىڭ قاي قالادا بولاتىنى ناقتى ايتىلماعان ەدى.
«ءبىز سونداي-اق Telegram پلاتفورماسىمەن زاڭسىز كونتەنتتى جەدەل جويۋ جانە دەسترۋكتيۆتى ارنالاردى بۇعاتتاۋ بويىنشا بەلسەندى تۇردە ىنتىماقتاستىق ورناتىپ جاتىرمىز. ءبىزدىڭ زاڭناماعا سايكەس، ەندى Telegram ،WhatsApp جانە TikTok سياقتى ينتەرنەت-پلاتفورمالار قازاقستاندا ءوز وكىلىن تاعايىنداۋعا مىندەتتى. Telegram-مەن ولاردىڭ وكىلىن تاعايىنداۋ جانە كەڭسە اشۋ تۋرالى كەلىسىمگە قول جەتكىزىلدى - بۇل كونتەنتتى باقىلاۋدى ارتتىرۋعا باعىتتالعان ماڭىزدى قادام»، - دەگەن جاسلان ماديەۆ.
وسىعان دەيىن جاسلان ماديەۆ 2027-جىلعا دەيىن 3 مىڭنان استام اۋىلعا وپتيكالىق ينتەرنەت جەتكىزىلەتىنىن حابارلادى. سونىڭ ىشىندە 1400 دەن استام اۋىلعا موبيلدى ينتەرنەت تە تارتىلادى. بايلانىس وپەراتورلارىنىڭ ليتسەنزيالىق مىندەتتەمەلەرىندە بۇل اۋىلداردى ينتەرنەتپەن قامتاماسىز ەتۋ ەسكەرىلەدى.
