تبيليسيدە نارازىلىقتىڭ بەسىنشى كۇنى نە بولىپ جاتىر
استانا. KAZINFORM - تبيليسي مەن گرۋزيانىڭ باسقا دا ءىرى قالالارىندا ۇكىمەتتىڭ ەۋروپالىق وداققا كىرۋ جونىندەگى كەلىسسوزدەردى 2028 -جىلعا دەيىن توقتاتۋ تۋرالى شەشىمىنە بايلانىستى نارازىلىق شاراسى جالعاسىپ وتىر، دەپ حابارلايدى DW اقپارات اگەنتتىگى.
كوشەدە ونداعان مىڭ ادام بار. پوليتسيا شەرۋشىلەرگە قارسى كوزدەن جاس اعىزاتىن گاز قولدانعان.
نارازىلىق شەرۋلەرى ەل استاناسىندا عانا ەمەس، ەلدىڭ باتۋمي، كوبۋلەتي، وزۋرگەتي جانە باسقا دا قالالارىندا ءوتىپ جاتىر. DW باعالاۋىنشا، تبيليسي مەن ەلدىڭ باسقا دا ءىرى قالالارىندا ونداعان مىڭ ادام كوشەگە شىقتى.
گرۋزيا ءى ءى م مالىمەتىنشە، تبيليسيدەگى نارازىلىق شەرۋلەرىنىڭ العاشقى ءتورت كۇنىندە 224 ادام ۇستالعان.
BBC مالىمەتىنشە، پوليتسيا نارازىلىق بىلدىرۋشىلەردى رۋستاۆەلي داڭعىلىنداعى پارلامەنت عيماراتى مەن ونىڭ ماڭىنداعى كوشەلەردەن ىعىستىرىپ جىبەرگەنىمەن، شەرۋشىلەر ورتالىقتا قالىپ وتىر. ءتارتىپ ساقشىلارى شەرۋشىلەرگە قارسى كوزدەن جاس اعىزاتىن گاز بەن سۋ اتقىشتارىن قولدانىپ وتىر، ولار پەتاردالار اتىپ جاۋاپ بەرىپ وتىر. دەمونسترانتتار قاۋىپسىزدىك كۇشتەرىنەن ءبىرشاما قاشىقتىقتا تۇر، ءبىراق تاراماي وتىر.
بۇعان دەيىن باسپا ءسوز ءماسليحاتىندا گرۋزيا پرەمەر-ءمينيسترى يراكلي كوباحيدزە گرۋزيا ءالى دە ە و-عا كىرۋگە ۇمتىلىپ وتىرعانىن مالىمدەدى.
- مەن بارلىعىن ەۋروپالىق ينتەگراتسيا كەيىنگە قالدىرىلمايتىنىنا، بارىنشا كۇش-جىگەرمەن جالعاستىرىلاتىنىنا سەندىرگىم كەلەدى، - دەدى ول.
كوباحيدزە سونداي-اق وپپوزيتسيا وكىلدەرىمەن كەلىسسوز جۇرگىزۋ مۇمكىندىگىن جوققا شىعاردى.
اۆتور
زارينا تۋعانبايەۆا
