«تازا قازاقستان» اكسياسىنا 1 ميلليوننان استام ادام قاتىستى
استانا. KAZINFORM - «تازا قازاقستان» رەسپۋبليكالىق ەكولوگيالىق اكسياسىنىڭ ءۇشىنشى اپتاسى اياقتالدى.
مادەنيەت جانە اقپارات مينيسترلىگى باسپا ءسوز قىزمەتىنىڭ مالىمەتىنشە، «جاسىل ايماق» اپتالىعى اياسىندا بۇكىل ەل بويىنشا 330 مىڭنان استام كوشەت وتىرعىزىلىپ، 500 دەن استام ساياباق پەن الاڭ اباتتاندىرىلدى.
استانادا مەملەكەت باسشىسى ۆولونتەرلەر، جاستار ۇيىمدارىنىڭ كوشباسشىلارى، كرەاتيۆتى يندۋستريا جانە عىلىمي زيالى قاۋىم وكىلدەرىمەن بىرگە اعاش وتىرعىزدى. «تازا قازاقستان» اكسياسى اياسىندا 8-27-ءساۋىر ارالىعىندا ايماقتاردا 5 مىڭنان استام ءىس-شارا وتكىزىلىپ، وعان 1 ميلليوننان استام ادام قاتىستى.
29-ءساۋىر مەن 4-مامىر ارالىعىندا قارتتار ءۇيى، ارداگەرلەر، جۇمىس بارىسىندا قازا تاپقان قۇقىق قورعاۋ ورگاندارى قىزمەتكەرلەرىنىڭ وتباسى تۇراتىن ۇيلەر اۋماعىن اباتتاندىرۋعا باعىتتالعان «ونەگەلى ۇرپاق» تاقىرىپتىق اپتالىعى جوسپارلانىپ وتىر.
ءىس-شارالار جامبىل وبلىسىندا 29-ساۋىرگە، الماتىدا 30-ساۋىرگە، اقتوبە وبلىسىندا 1-مامىرعا، شىمكەنتتە 2-مامىرعا، قوستاناي وبلىسىندا 3-مامىرعا، تۇركىستان وبلىسىندا جانە باسقا وڭىرلەردە 4-مامىرعا جوسپارلانعان. جاستار رەسۋرستىق ورتالىقتارى، ۇيىمدار، ۆولونتەرلىك قوعامداستىقتار اكسيا شەڭبەرىندە وتكىزىلەتىن بارلىق ءىس-شاراعا بەلسەندى قاتىسادى.
