تاسقىن قاۋپى: ۇيىڭىزگە قىزىل سۋ كەلە قالسا نە ىستەۋ كەرەك
وسكەمەن. KAZINFORM - كوكتەم شىعىپ، قار ەري باستاعاندا حالىقتى ۋايىم تورلايدى. سەبەبى قىزىل سۋ قىسپاققا الۋ ما دەگەن قاۋىپ بار.
«سۋ تاسقىنى كەزىندە نە ىستەۋ كەرەك؟» دەگەن سۇراققا جاۋاپ الۋ ءۇشىن Kazinform ءتىلشىسى ش ق و ت ج د ماماندارىنا حابارلاسىپ كوردى.
وبلىستىق ت ج د توتەنشە جاعدايلاردىڭ الدىن الۋ باسقارماسىنىڭ باستىعى ارمان ناۋرىزبايەۆتىڭ ايتۋىنشا، ەگەر ءۇيىڭىزدى سۋ باسۋ قاۋپى جوعارى بولسا، وندا ءبىرقاتار ەرەجەنى ورىنداۋىڭىز قاجەت.
«ەڭ اۋەلى ءۇيىڭىزدىڭ اۋلاسىن الدىن الا قار مەن مۇزدان تازارتىڭىز. سودان سوڭ قاپ، قۇم، توپىراق، بالشىق دايىنداپ، ءۇيدى قورشاڭىز. ەرتەرەك قامدانىپ، ءۇي جانۋارلارىن قاۋىپسىز جەرگە كوشىرىڭىز. جەرتولەدە ازىق-تۇلىك بولسا ونى دا شىعارىپ الىڭىز»، - دەپ ءتۇسىندىردى ول.
شۇعىل ەۆاكۋاتسيا جاعدايىنا اۋىز سۋ مەن ازىق تۇلىكتى، العاشقى قاجەت بولاتىن زاتتاردى دايىنداپ الۋ شارت.
«ولار - قۇجاتتار، اقشا، ماڭىزدى دەگەن قاعازدار مەن زاتتار. كوكتەم شىعىپ، كۇن جىلي باستاعاندا ۇنەمى بۇل زاتتاردى دايىن ۇستاپ وتىرۋ كەرەك. سەبەبى «اپات ايتىپ كەلمەيدى» دەگەن ءسوز تەكتەن-تەككە ايتىلماعان. ۇنەمى ساق بولىپ، كەز كەلگەن جاعدايعا دايىن وتىرۋ قاجەت»، - دەيدى دەپارتامەنتتىڭ باسپا ءسوز حاتشىسى مارينا ليسكوۆا.
سۋ دەڭگەيى كەنەتتەن كوتەرىلىپ كەتكەن جاعدايدا:
- 112 نومىرىنە حابارلاسىڭىز.
- بايبالام سالماڭىز. ءار ارەكەتىڭىزدى ماقساتتى تۇردە جاساڭىز.
- گاز بەن ەلەكتر قۇرىلعىلارىن ءوشىرىڭىز.
- قۇتقارۋشىلار كەلگەنشە بيىكتەۋ جەرگە شىعىپ الىپ كۇتىڭىز جانە ەۆاكۋاتسياعا دايىن بولىڭىز.
ق ر ت ج م باسپا ءسوز قىزمەتىنىڭ مالىمەتىنشە، تۇرعىنداردى سۋ تاسقىنىنىڭ جاقىنداپ قالۋى تۋرالى ەسكەرتۋ دابىلى قاعىلعان كەزدە قاۋىپسىز ايماققا كوشىرىلۋ ءۇشىن مۇمكىندىگىڭىز بولسا الدىن الا بەلگىلەنگەن ەۆاكۋاتسيالاۋ پۋنكتىنە كەلىپ ۇلگەرۋ كەرەك. بولماسا بيىك جەرگە شىعىپ، توسىپ تۇرىڭىز.
سونداي-اق قۇتقارۋشىلار ءسىزدى دەر كەزىندە تابۋى ءۇشىن نە ىستەۋ قاجەتتىگى ءتۇسىندىرىلدى.
«كۇندىزگى ۋاقىتتا اق نەمەسە اشىق ءتۇستى كيىم كيىپ الىڭىز. ال تۇندە جارىق سيگنالدارىن بەرۋىڭىز قاجەت. قاۋىپ تونبەسە، كومەك كەلگەنشە سول جەردە بولعانىڭىز ابزال. سۋ باسقان اۋماقتان ءوزىن-ءوزى ەۆاكۋاتسيالاۋ زارداپ شەككەندەرگە شۇعىل مەديتسينالىق كومەك كورسەتۋ قاجەت بولعان جاعدايدا عانا قۇپتالادى. ول ءۇشىن قايىققا نەمەسە بورەنە سياقتى سۋ ۇستىندە تۇراتىن باسقا دا ماتەريالداردىڭ ۇستىنە شىعىپ الىڭىز»، - دەلىنگەن اقپاراتتا.
ەۆاكۋاتسيالانۋ كەزىندە قاۋىپسىزدىك شارالارىن ساقتاۋ قاجەت: قايىققا ءبىر-بىردەن كىرىڭىز، قوزعالىپ تۇرعاندا وتىرماڭىز، ورىن اۋىستىرماڭىز، ەشكىمدى يتەرمەڭىز. ال ەگەر سۋعا تۇسسەڭىز، وندا سۋ باسپاعان ەڭ جاقىن جەرگە ءجۇزىڭىز.
سۋ دەڭگەيى تومەندەگەننەن كەيىن:
- عيماراتقا كىرەر الدىندا ونىڭ قابىرعالارىنىڭ قاتتى زاقىمدانباعانىنا جانە قاۋىپ توندىرمەيتىنىنە كوز جەتكىزىڭىز؛
- ىشكى بولمەلەردى ارالاپ جۇرگەن كەزدە تەمەكى شەكپەڭىز جانە وت جاقپاڭىز. تەك ەلەكتر شامدارىن قولدانىڭىز، جىرتىلعان نەمەسە سالبىراپ تۇرعان ەلەكتر سىمدارىنان ساق بولىڭىز.
- ەلەكتر جەلىسىنىڭ جاي-كۇيىن تەكسەرمەيىنشە ولاردى قوسۋعا تىيىم سالىنادى.
- سۋ تيگەن تاماقتاردى سانيتارلىق-ەپيدەميولوگيالىق قىزمەت ماماندارى تەكسەرگەنگە دەيىن ءىشىپ- جەۋگە بولمايدى.
