تاريحي التىن! قازاقستان قۇراماسى شورت- ترەكتەن قىسقى ازيا ويىندارىنىڭ چەمپيونى اتاندى
حاربين. KAZINFORM - شورت- ترەكتەن قازاقستان ەرلەر قۇراماسى قىتايدىڭ حاربين قالاسىندا ءوتىپ جاتقان Ⅸ قىسقى ازيا ويىندارىندا التىن مەدال ەنشىلەدى.
قازاقستان قۇراماسى ەرلەر اراسىندا 5000 مەتردەن كوماندالىق ەستافەتادان چەمپيون اتاندى. دەنيس نيكيشا، گلەب يۆچەنكو، مەرسايد جاقسىبايەۆ جانە ءادىل عالياحمەتوۆ جارىس جولىنا شىقتى.
باستاپقىدا وتانداستارىمىز ءۇشىنشى ورىندى ساقتادى. سوڭعى اينالىمداعى بۇرىلىستا كورەيا قۇراماسىنىڭ سپورتشىسى قىتايلىق سپورتشىمەن سوقتىعىسىپ، قازاقستاندىق سپورتشى مارە سىزىعىن ءبىرىنشى بولىپ كەستى.
ايتا كەتەيىك، بۇل قازاقستان دەلەگاتسياسىنىڭ حاربين قىسقى ازيا ويىندارىنداعى العاشقى التىنى. سونىمەن قاتار، قازاقستان قۇراماسى وسى سپورت تۇرىنەن ازيادادا تۇڭعىش رەت التىن الىپ وتىر.
وسىعان دەيىن، قازاقستان قىزدار قۇراماسى 3000 مەترگە ەستافەتادان كۇمىس الدى.
ەسكە سالا كەتەيىك، شورت- ترەكتەن قازاقستان قۇراماسى ارالاس كوماندالىق ەستافەتادان ەل قورجىنىنا العاشقى كۇمىس جۇلدە سالعان بولاتىن.
