تاۋلى ايماقتا تۇراتىن ادامداردىڭ ميىندا ەرەكشەلىك بولادى - زەرتتەۋ

عالىمدار جوعارى جانە تومەن بيىكتىكتە تۇراتىن جاستاردى سالىستىرىپ، بيىك تاۋلى ايماقتاردا ءومىر سۇرەتىندەردىڭ ەموتسيانى تانۋعا كوبىرەك ۋاقىت جۇمسايتىنىن جانە ولاردىڭ مي بەلسەندىلىگىندە ايتارلىقتاي وزگەرىستەر بار ەكەنىن انىقتادى.

بيىك تاۋلى ايماقتاردا ۇزاق ۋاقىت تۇرۋ ادامنىڭ پسيحيكالىق دەنساۋلىعىنا دا اسەر ەتۋى مۇمكىن. زەرتتەۋلەر كورسەتكەندەي، بيىكتىكتە تۇراتىن ادامدار اراسىندا دەپرەسسيا مەن مازاسىزدىق دەڭگەيى تومەن ايماقتارداعىلارعا قاراعاندا جوعارىراق. مىسالى، تيبەت پەن گيمالاي سياقتى تاۋلى ايماقتارعا كوشىپ بارعان نەمەسە جۇمىس ىستەيتىن ادامداردىڭ پسيحولوگيالىق جاعدايىنا بيىكتىك پەن وتتەگىنىڭ تومەن دەڭگەيى كەرى اسەرىن تيگىزۋى مۇمكىن.

دەپرەسسيا كوبىنەسە ويلاۋ مەن اقپاراتتى وڭدەۋدەگى وزگەرىستەرمەن بايلانىستى. بۇل جاعدايداعى ادامدار جاعىمسىز ويلارعا كوپ كوڭىل بولەدى جانە ءيمپۋلسيۆتى ارەكەتتەردى باقىلاۋدا قيىندىقتارعا تاپ بولادى. وسىعان ۇقساس ۇردىستەر تاۋلى ايماقتاردا قىزمەت ەتەتىن اسكەري قىزمەتكەرلەردە دە بايقالادى. مۇنداي ادامدار تەرىس ويلاۋعا بەيىم بولادى جانە جاعىمسىز ەموتسيالارعا ميدىڭ رەاكتسياسى جوعارىراق بولادى.

عالىمدار بۇل اسەرلەردى زەرتتەۋ ءۇشىن ەكى توپ ستۋدەنتتەرىن سالىستىردى. ءبىرىنشى توپقا تيبەت ۋنيۆەرسيتەتىندە وقيتىن 22 ستۋدەنت كىردى. ولار تومەن بيىكتىكتە ءوسىپ، 12000 فۋت (3658 م) بيىكتىكتە ورنالاسقان ۋنيۆەرسيتەتكە كوشىپ كەلگەن جانە كەمىندە ەكى جىل سول جەردە ءومىر سۇرگەن. ەكىنشى توپقا بەيجىڭدە (170 فۋت، شامامەن 52 م بيىكتىكتە) تۇراتىن 24 ستۋدەنت كىردى، ولار ەشقاشان بيىك تاۋلى ايماقتاردا تۇرماعان.

بارلىق قاتىسۋشىنىڭ كورۋ قابىلەتى قالىپتى، ولار وڭقاي، نيەۆرولوگيالىق نەمەسە پسيحياتريالىق بۇزىلىستارى جوق، ءدارى-دارمەك قابىلدامايتىن جانە تۇراقتى ءومىر سالتىن ۇستاناتىن ادامدار بولعان.

دەگەنمەن، عالىمدار زەرتتەۋدىڭ كەيبىر شەكتەۋلەرىن اتاپ ءوتتى. مىسالى، ولار زەرتتەۋگە قاتىسۋشىلاردىڭ ناقتى دەپرەسسيا نەمەسە مازاسىزدىق دەڭگەيلەرىن ولشەمەگەن، سوندىقتان مي بەلسەندىلىگىندەگى وزگەرىستەردىڭ تىكەلەي دەپرەسسيامەن بايلانىسىن ناقتىلاۋ قاجەت. سونىمەن قاتار، بۇل زەرتتەۋ تەك بەلگىلى ءبىر ۋاقىت ارالىعىندا توپتاردى سالىستىرعاندىقتان، ادامداردىڭ بيىككە كوشكەننەن كەيىنگى ەموتسيونالدىق وڭدەۋلەرىنىڭ قالاي وزگەرەتىنىن باقىلاۋ ءۇشىن ۇزاق مەرزىمدى زەرتتەۋلەر قاجەت.

بولاشاقتا عالىمدار ادامداردى ۋاقىت وتە كەلە قاداعالاپ، بيىك تاۋلى ايماقتارعا كوشۋ ولاردىڭ ەموتسيونالدىق جاعدايىنا قالاي اسەر ەتەتىنىن تولىق زەرتتەۋدى جوسپارلاپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى