تاۋەلسىزدىك كۇنىنە وراي قانداي مادەني ءىس-شارالار وتەدى
استانا. قازاقپارات – مادەنيەت جانە اقپارات مينيسترلىگىنىڭ باستاماسىمەن تاۋەلسىزدىك كۇنىنە وراي ءبىرقاتار ءىس-شارالار ۇيىمداستىرىلادى. مينيسترلىككە باعىنىستى ۇيىمداردا تەاتر پرەمەرالارى، كونسەرتتەر، كورمەلەر، عىلىمي سەمينارلار جانە دوڭگەلەك ۇستەلدەر سياقتى ءىس-شارالار دايىندالۋدا.
5-جەلتوقساندا قازاقستان رەسپۋبليكاسىنىڭ ورتالىق مەملەكەتتىك مۋزەيىندە KAU School وقۋشىلارىنىڭ «تاۋەلسىزدىك تۇستەرى: ءبىزدىڭ بالالارىمىزدىڭ ونەرى» كورمەسى اشىلادى. وندا جاس تالانتتار ءوز جۇمىستارىن كورسەتەدى.
6-جەلتوقساندا «تۇمار-ارت» سۋرەتشى-پەداگوگتار قاۋىمداستىعى مەن ولاردىڭ دارىندى شاكىرتتەرى بىرلەسىپ ۇيىمداستىرعالى وتىرعان «اتامەكەن» كورمەسىنىڭ، سونداي-اق 11-جەلتوقساندا مۋزەيدە «تاۋەلسىزدىك - ەل ۇرانى» اتتى مادەني-تانىمدىق ءىس-شاراسى جانە «تاۋەلسىزدىك باستاۋى - جەلتوقسان» كورمەسىنىڭ اشىلۋى وتەدى.
7-8-جەلتوقساندا «تورلەت، ەڭبەك ادامى» رەسپۋبليكالىق اقىندار ايتىسى وتەدى. وعان ەلىمىزدىڭ ءار وڭىرىندە جىل بويى وتكەن ايتىستاردا جەڭىسكە جەتكەن 14 اقىن قاتىسادى.
تەاتر ۇجىمدارى مەرەكە كۇندەرى كورەرمەنگە قىزىقتى ءارى ەرەكشە پرەمەرالار ۇسىنادى. 10-جەلتوقسان كۇنى قۇدىس قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىندا «قوزى مەن بايان» پرەمەراسى وتەدى. عابيت مۇسىرەپوۆتىڭ بۇل تۋىندىسى تەاتردىڭ 90 جىلدىعىنا ورايلاستىرىلعان. 15-جەلتوقساندا ناتاليا ساتس اتىنداعى ورىس مەملەكەتتىك اكادەميالىق بالالار مەن جاس وسپىرىمدەر تەاترىنىڭ رەپەرتۋارى بويىنشا «پريكليۋچەنيە سنەجنوگو بارسا» سپەكتاكلى كورسەتىلەدى. 16-جانە 17-جەلتوقساندا رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترىنىڭ ساحناسىندا «موتىلەك» درامالىق سپەكتاكلىنىڭ پرەمەراسى وتەدى. بۇل - جۇماگۇل سولتيەۆانىڭ پەساسى بويىنشا تراگەديا ەلەمەنتتەرى بار فيلوسوفيالىق دراما. سونداي-اق 16-جانە 17-جەلتوقسان كۇندەرى قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترى «پاراسات مايدانى» سپەكتاكلىنىڭ پرەمەراسىن ۇسىنادى. قويىلىم قازاق ادەبيەتىنىڭ كلاسسيگى تولەن ابدىك شىعارمالارىنىڭ نەگىزىندە («وڭ قول» جانە «پاراسات مايدانى») ساحنالانعان.
10-13-جەلتوقسان كۇندەرى ارالىعىندا «سارايشىق» مەملەكەتتىك تاريحي-مادەني مۋزەي-قورىعى «التىنوردالىق سارايشىق مۇرالارى» جىلجىمالى كورمەسىن ۇيىمداستىرادى. كورمەدە ورتاعاسىرلىق سارايشىققا قاتىستى ەكسپوناتتار ۇسىنىلادى، ولار وسى كەزەڭنىڭ تاريحى مەن مادەنيەتىن تولىق تۇسىنۋگە مۇمكىندىك بەرەدى. 11-جەلتوقساندا ءا. قاستەيەۆ اتىنداعى ق ر مەملەكەتتىك ونەر مۋزەيىندە قازاقتىڭ ۇلى سۋرەتشىسى ءابىلحان قاستەيەۆتىڭ تۋعانىنا 120 جىل تولۋىنا وراي مەرەيتويلىق ءىس-شارالار اياسىندا ونىڭ مەموريالدىق مۋزەي-ءۇيىنىڭ جاڭا ەكسپوزيتسياسىنىڭ جانە سۋرەتشىنىڭ «باعا جەتپەس مۇرا» تۋىندىلارى كورمەسىنىڭ رەسمي تۇساۋكەسەرى وتەدى. «بوزوق» مەملەكەتتىك تاريحي-مادەني مۋزەي-قورىعى قازاق حالقىنىڭ ماتەريالدىق ەمەس مادەني مۇراسىن دارىپتەۋ ماقساتىندا 12-جەلتوقسان كۇنى ەۋرازيا حالىقتارىنىڭ داستۇرلەرىنە ارنالعان حالىقارالىق عىلىمي سەمينار وتكىزۋدى جوسپارلاپ وتىر.
ال 12-جانە 13-جەلتوقساندا «بەرەل» مەملەكەتتىك تاريحي-مادەني مۋزەي-قورىعى «ەل تاۋەلسىزدىگى» ءىس-شاراسى مەن «كوشپەلى تايپالار تاريحى» اتتى كورمە ۇيىمداستىرادى. ءىس-شارا قاتىسۋشىلارى كوشپەلى تايپالاردىڭ ءومىرى مەن مادەنيەتى تۋرالى بىلە الادى.
13-جەلتوقساندا «بوتاي»، «ورداباسى» جانە «جيدەباي-ءبورىلى» مۋزەي-قورىقتارىندا تاۋەلسىز قازاقستاننىڭ مادەني-تاريحي جەتىستىكتەرى تاقىرىبىندا جيىندار وتەدى.
سونداي-اق وسى كۇندەرى كوپتەگەن تاريحي-تانىمدىق ءىس-شارالار، سونىڭ ىشىندە تاقىرىپتىق كورمەلەر، مادەني باعدارلامالار جانە ەكسكۋرسيالار وتەدى.
16-جەلتوقسان كۇنى رەسپۋبليكالىق اكادەميالىق نەمىس دراما تەاترىندا «Katzen Piloten» بالالار تەاتر ستۋدياسىنىڭ كونتسەرتى وتەدى. قازاق، ورىس جانە نەمىس تىلدەرىندەگى اندەردىڭ مادەني الۋانتۇرلىلىگى پەن داستۇرلەردىڭ ۇيلەسىمدىلىگىن كورسەتەدى.
تاۋەلسىزدىكتىڭ ماڭىزىن كورسەتەتىن بۇل ءىس-شارالار قازاقستاننىڭ بارلىق وڭىرلەرىن قامتيدى. سونداي-اق كورەرمەنگە قازاقستاننىڭ باي مادەني مۇراسىن سەزىنۋگە جانە تاۋەلسىزدىك جىلدارىندا قول جەتكىزگەن جەتىستىكتەرىن باعالاۋعا مۇمكىندىك بەرەدى.
