تاۋەلسىز قازاقستاننىڭ وليمپيادا ويىندارىنداعى العاشقى تۋ ۇستاۋشىسى كىم

1991 -جىلى 16-جەلتوقساندا «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» زاڭ قابىلداندى. ال 7 ايدان كەيىن يسپانيانىڭ بارسەلونا قالاسىندا XXV جازعى وليمپيادا ويىندارى باستالادى. بۇرىنعى ك س ر و قۇراماسى بىرىككەن كوماندا بولىپ ونەر كورسەتىپ، سالتاناتتى اشىلۋ راسىمىندە ءاربىر تاۋەلسىز رەسپۋبليكادان تۋ ۇستاۋشىلار شىعادى. وسى تۇستا ەلىمىزدىڭ كوك بايراعىن كىم الىپ شىعادى دەگەن سۇراق تۋىندايدى.

ارينە، بۇل - ۇلكەن جاۋاپكەرشىلىك. سول كەزدە تاۋەلسىز قازاقستاننىڭ ءبىرىنشى تۋريزم، دەنە شىنىقتىرۋ جانە سپورت ءمينيسترى قاراتاي تۇرىسوۆ، ۇلتتىق وليمپيادالىق شتابتاعى ارىپتەستەرىمەن كەڭەسە وتىرىپ، سپورتشىلاردى ىرىكتەۋگە كىرىسەدى. ويتكەنى تۋدى ەڭ لايىقتى ۇمىتكەر كوتەرىپ شىعۋى كەرەك.

بۇل - بايراقتى باسەكەدە قازاقستاننىڭ ءوز تۋىنىڭ استىنداعى العاشقى ونەر كورسەتۋى. جيىنعا قاتىسۋشىلار ءبىراۋىزدان گرەك-ريم كۇرەسىنىڭ شەبەرى 29 جاستاعى داۋلەت تۇرلىحانوۆتىڭ كانديداتۋراسىن قولدايدى. ول كەزدە تۇرلىحانوۆ ك س ر و-نىڭ 7 دۇركىن چەمپيونى، ك س ر و سپارتاكيادا جەڭىمپازى، الەم، ەۋروپا چەمپيونى، الەم كۋبوگىنىڭ يەگەرى جانە 1988 -جىلى سەۋلدە وتكەن وليمپيادانىڭ كۇمىس جۇلدەگەرى بولاتىن.

ءسويتىپ، داۋلەت تۇرلىحانوۆ وليمپيادا ويىندارىندا تاۋەلسىز قازاقستاننىڭ العاشقى تۋ ۇستاۋشى بولىپ تاريحقا ەنەدى. بارسەلونا ويىندارىندا تۇرلىحانوۆ قولا مەدال جەڭىپ الادى.

قازاقستاننىڭ تاۋەلسىز ەل رەتىندە قاتىسقان العاشقى جازعى وليمپياداسى 1996 -جىلى ا ق ش-تىڭ اتلانتا قالاسىندا وتكەن ەدى. وندا جامبىلدىق جاس بوكسشى ەرماحان يبرايموۆ تۋ الىپ شىقتى.
وسى بايراقتى باسەكەدە يبرايموۆ «قولا» جۇلدە جەڭىپ الدى. جالپى ەسەپتە قازاقستان 11 مەدالمەن 197 ەل اراسىندا 24-ورىنعا تۇراقتادى.

4 جىلدان كەيىن اۋستراليانىڭ سيدنەي قالاسىندا وتكەن كەزەكتى وليمپيادادا دا ەرماحان يبرايموۆ تاعى دا ەلىمىزدىڭ بايراعىن جەلبىرەتىپ شىقتى. بۇل جولى داڭقتى بوكسشى ەل قورجىنىنا التىن مەدال سىيلادى. وسىلايشا، يبرايموۆ - قازاقستاندا ەكى وليمپيادادا قازاقستان تۋىن كوتەرىپ شىعىپ، ەكەۋىندە دە جۇلدەمەن ورالعان جالعىز سپورتشى رەتىندە قازاقستان تاريحىندا ەسىمى التىن ارىپتەرمەن جازىلىپ قالدى.

سيدنەيدە قازاقستان وليمپيادا ناتيجەسى بويىنشا 199 مەملەكەت اراسىنان 22-ورىنعا كوتەرىلدى.

2004 -جىلعى وليمپيادا ويىندارىندا قازاقستان تۋىن دزيۋدوشى اسحات جىتكەيەۆ الىپ شىققان بولاتىن. اتالعان وليمپيادادا ول 7-ورىن الىپ، جۇلدەگە ىلىگە المادى. جالپى قازاقستاننىڭ ناتيجەسى تومەن بولىپ، 201 ەلدىڭ اراسىندا 40-ورىننان كورىندى. دەگەنمەن، جىتكەيەۆ 2008 -جىلى بەيجىڭ وليمپياداسىندا كۇمىس جۇلدەگە قول جەتكىزدى. بۇل - قازاقستاننىڭ دزيۋدو باعىتىنداعى العاشقى وليمپيادا مەدالى بولدى.

2008 -جىلعى بەيجىڭ وليمپياداسىندا قازاقستان تۋىن الىپ شىعۋ مارتەبەسى اۋىر اتلەتيكادان ازيا چەمپيونى باقىت احمەتوۆكە بەرىلدى. باقىت احمەتوۆ سيدنەي وليمپياداسىندا 15-ورىن، افينا وليمپياداسىندا - 7-ورىن العان ەدى. بەيجىڭ ويىندارىندا 415 كەلى ناتيجەمەن 5-ورىن الدى.

2012 -جىلى لوندوندا وتكەن وليمپيادا ويىندارىندا ەلىمىزدىڭ كوك بايراعىن گرەك-ريم كۇرەسىنىڭ بالۋانى، ازيانىڭ ەكى دۇركىن چەمپيونى نۇرماحان تىناليەۆ ۇستاپ شىقتى. الايدا جارىس جولىن 1/8 فينالدان باستاعان ن. تىناليەۆ شۆەتسيالىق ەۋرەن يوحاننان جەڭىلىپ قالدى.

2016 -جىلى ريو-دە-جانەيرو قالاسىندا وتكەن XXXI جازعى وليمپيادادا قازاقستان تۋىن 20 جاستاعى تاەكۆوندوشى رۋسلان جاپاروۆ الىپ شىقتى. الايدا سپورتشى العاشقى اينالىمدا ازەربايجاندىق قارسىلاسى راديك يسايەۆتان 11:2 ەسەبىمەن جەڭىلدى. جۇبانىش كەزدەسۋىندەگى جەكپە- جەكتە تە وتانداسىمىز 29 جاستاعى وڭتۇستىك كورەيالىق چحا دون ميننەن جەڭىلىپ قالدى.

2020 -جىلعى (2021 -جىل) توكيو وليمپياداسىندا ەلىمىزدىڭ كوكبايراعىن پرەزيدەنت قاسىم-جومارت توقايەۆ العاش رەت ەكى بىردەي تۋ ۇستاۋشىعا تاپسىردى. اتاپ ايتساق، جەڭىل اتلەتيكادان وليمپيادا چەمپيونى ولگا رىپاكوۆا مەن بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقابايەۆقا تابىستاعان بولاتىن.

ال وسى جىلى فرانسيا استاناسى پاريج قالاسىندا وتكەن XXXIII جازعى وليمپيادا ويىندارىنىڭ سالتاناتتى اشىلۋ راسىمىندە ەلىمىزدىڭ كوك تۋىن بوكستان قازاقستان ۇلتتىق قۇراماسىنىڭ كاپيتانى اسلانبەك شىمبەرگەنوۆ پەن جەڭىل اتلەت ولگا سافرونوۆا ۇستاپ شىقتى.

اۆتور

كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى