تالعاردا يزولياتوردان قاشقان كۇدىكتى ۇستالدى - پوليتسيا
استانا. KAZINFORM - تالعار اۋدانىندا كامەلەتكە تولماعان قىزدى زورلادى دەگەن كۇدىكپەن ۇستالىپ، ۋاقىتشا ۇستاۋ يزولياتورىنان قاشىپ كەتكەن ايىپتى قۇرىقتالدى. بۇل تۋرالى الماتى وبلىسىنىڭ پوليتسيا دەپارتامەنتىنىڭ باسپا ءسوز قىزمەتى حابارلايدى.
«جەدەل-ىزدەستىرۋ ءىس-شارالارى ناتيجەسىندە 21-قازاندا ۋاقىتشا ۇستاۋ يزولياتورىنان قاشقان كۇدىكتى ك. تەرەڭقارا اۋىلىنىڭ شەتىندە ۇستالدى. ىزدەستىرۋ جۇمىستارى باستالعان ساتتەن باستاپ پوليتسيانىڭ بارلىق كۇشتەرى جۇمىلدىرىلدى. سونداي-اق ىزدەۋ شارالارىنا قوعام بەلسەندىلەرى مەن وبلىس تۇرعىندارى تاراپىنان قۇرىلعان ەرىكتى جاساقتار اتسالىستى»، - دەلىنگەن حابارلامادا.
جەرگىلىكتى پوليتسيانىڭ مالىمەتىنشە، كۇدىكتى قايتادان ۋاقىتشا ۇستاۋ يزولياتورىنا قامالدى.
«كۇدىكتىگە نەگىزگى قىلمىسىنان بولەك قاماۋدان قاشقانى ءۇشىن ايىپ تاعىلادى»، - دەيدى قۇزىرلى دەپارتامەنتتەن.
تالعاردا ۋاقىتشا ۇستاۋ يزولياتورىنان قاشىپ كەتكەن كۇدىكتىگە ىزدەۋ جاريالانعان ەدى.
ارتىنان تالعاردا يزولياتوردان قاشقان كۇدىكتىنىڭ وقيعاسى بويىنشا سالعىرتتىق بابىمەن ءىس قوزعالدى.
اۆتور
داۋلەت ىزتىلەۋ
