تاجىريبەسى از ادامعا قيىن. بۇرىن سوعىلعان كولىكتى قالاي تانۋعا بولادى؟

استانا. KAZINFORM - كولىك جول اپاتىنا ۇشىراسا، قۇنى ايتارلىقتاي تومەندەيدى. ءبىر قاراعاننان كولىكتىڭ ىشكى كۇيىن انىقتاۋ مۇمكىن ەمەس. ال الىپساتارلار سوعىلعان، ەسكى كولىكتىڭ سىرتىن بوياپ، سالونىن تازالاپ، ونى قىمباتىراق ساتۋعا تىرىسادى. قالاي ساۋداگەردىڭ ارباۋىنا ءتۇسىپ قالماۋعا بولادى؟ كولىكتىڭ بۇعان دەيىن سوعىلعانىن انىقتاۋ مۇمكىن بە؟

بۇل سۇراقتاردىڭ جاۋابىن Massaget.kz ءتىلشىسى Kolesa.kz ساراپشىسى نۇرلىباي جەڭىستەن الدى.

سوعىلعان كولىكتى ساتىپ الۋ نەسىمەن قاۋىپتى؟

جول-كولىك وقيعاسىنان كەيىن كولىك زاقىمدالادى، ءتىپتى ماڭىزدى بولىگى ىستەن شىعۋى مۇمكىن. جالپى بارلىق «زاقىم» ءۇش تۇرگە بولىنەدى:

سىرتقى پانەلدەر بۇلىنەدى؛

كۇش ەلەمەنتتەرىنىڭ تۇتاستىعى بۇزىلادى؛

كونسترۋكتيۆتى تۇرعىدا جارامسىز بولادى.

ءبىرىنشى جاعدايداعى اۆتوكولىكتى ساتىپ الۋعا بولادى. ۇساق زاقىمدار كولىكتەن باس تارتۋعا سەبەپ ەمەس. ال ەكىنشى جانە ءۇشىنشى جاعدايداعى كولىكتەر تۋرالى ويلانۋ كەرەك. مۇنداي تەحنيكانى قالپىنا كەلتىرۋ كەزىندە ساپاسىنا اسا قاتتى ءمان بەرسەڭىز دە، بولشەكتەر جىلدام توزادى. جول اپاتىنا تۇسسەڭىز، كولىك ءتيىستى قارسىلىق كورسەتپەيدى.

وسىعان بايلانىستى قايتالاما نارىقتان كولىك ساتىپ الۋ كەزىندە ونى دۇرىستاپ زەرتتەگەن ءجون.

كولىكتى ونلاين-سەرۆيستەردىڭ كومەگىمەن ج ك و-عا تەكسەرۋ

ەگەر كولىك يەسى اتانعىسى كەلەتىن ادام پايدالانىلعان اۆتوكولىكتى ساتىپ الۋدى شەشسە، تەحنيكانى دەرەۋ ونلاين-قىزمەتتەر ارقىلى تەكسەرە الادى. ەلىمىزدە قولدانىلاتىن سايتتار تەرىلگەن نومىرگە ساي ەگجەي-تەگجەيلى ەسەپ دايىندايدى. وندا:

اۆتوكولىكتىڭ قانشا رەت اپاتقا ۇشىراعانى؛

جول- كولىك وقيعاسى بولعان كۇن، اي جانە جىل؛

كولىك اپاتقا قالاي ۇشىرادى، قانداي جاعدايدا بولعانى؛

قانداي زاقىم العانى جازىلادى.

ەگەر كولىك يەسى جول-كولىك وقيعاسىنان كەيىن ساقتاندىرۋ كومپانياسىنا جۇگىنگەن بولسا، وندا ەسەپتە ساقتاندىرۋ بويىنشا قالپىنا كەلتىرۋ ەسەبى پايدا بولادى، ونىڭ ءجۇرىسى، جوندەۋ ءتۇرى جانە قۇنى كورسەتىلەدى. زاقىمدالعان تۇيىندەر مەن بولشەكتەر تىزىمدەلەدى.

وسى تۇستا Kolesa.kz ساراپشىسى نۇرلىباي جەڭىس ماڭىزدى سۇراقتارعا جاۋاپ بەردى.

كولىكتىڭ جول اپاتىنا تۇسكەنىن ونىڭ سىرتىنا قاراپ انىقتاۋعا بولا ما؟

ماماننىڭ ايتۋىنشا، تاجىريبەسى از ادامعا كولىكتىڭ سىرتىنا قاراپ، ونىڭ سوعىلىپ-سوعىلماعانىن ايىرۋ قيىن. دەگەنمەن دە بىرنەشە ءتاسىلى بار.

«ۆيزۋالدى الىپ قارايتىن بولساق، ەڭ ءبىرىنشى، كولىكتىڭ شىناق بولشەكتەرىندەگى ساڭىلاۋلارعا ءمان بەرۋ كەرەك. مىسالى، قاقپاقتىڭ وڭ جاق ساڭىلاۋى الدىڭعى وڭ قاناتقا تىم جاقىن، ال سول جاعى، كەرىسىنشە، الشاق بولسا، كولىكتىڭ الدىنان سوققى العانىن تۇجىرىمداۋعا بولادى. الايدا ۇمىتپاۋ كەرەك دۇنيە بار، كەيبىر جاعدايلاردا كولىكتىڭ بولشەكتەرى قانداي دا ءبىر ماسەلەمەن شەشىلىپ، قايتا قويىلاتىن بولسا، مۇنداي جايت كەزدەسىپ تۇرادى»، - دەدى ول.

كولىكتىڭ جول اپاتىنا تۇسكەنىن انىقتايتىن ءادىس-ءتاسىل بار ما؟

ەگەر ساتىپ الۋشىنىڭ قولىندا ەشبىر قۇرىلعى بولماسا، ءبىرىنشى شىناق بولشەكتەرىنىڭ بۇرانداماسىنا نازار اۋدارۋىنا بولادى. ساراپشىنىڭ سوزىنشە، بۇعان دەيىن سوعىلعان كولىك بولسا، وعان مىندەتتى تۇردە كىلتتىڭ سىزاتى تۇسەدى.

سونىمەن قاتار كولىكتى وتالدىرعان ساتتە Airbag جارىعى سونبەسە، ول بۇرىن اتىلعان دەگەن ءسوز.

«سوندىقتان وسى سەكىلدى اقاۋ بايقايتىن بولساڭىز، مامانداردىڭ كومەگىنە جۇگىنگەن دۇرىس. باستى نازاردى كولىكتىڭ قاڭقاسىنا جانە لونجەرونعا اۋدارىڭىز. ول جەردە ەشقانداي بالقىتىپ، بىرىكتىرۋدىڭ ءىزى بولماۋى شارت»، - دەپ ءتۇسىندىردى مامان.

بويالعان كولىكتىڭ سىرتىندا قاندايدا ءبىر بەلگى بولا ما؟

نۇرلىباي جەڭىس كولىكتىڭ بۇعان دەيىن بويالىپ- بويالماعانىن اڭعارتاتىن بىردەن-ءبىر بەلگى - بولشەكتەردىڭ زاۋىتتىق ءتۇسى ەكەنىن ايتادى.

«ارنايى ماماندار قانشا جەردەن كاسىبي بوياسا دا، زاۋىتتىق دەڭگەيدەگى ءتۇستى شىعارا المايدى، 99,9 پايىزعا شىعارۋى مۇمكىن، دەگەنمەن جاڭا بويالعان بولشەكتىڭ ءتۇسى ءبارىبىر دە وزگەشە ەكەنى كورىنىپ تۇرادى»، - دەپ ءتۇسىندىردى ول.

كولىكتىڭ بويالعانىن انىقتايتىن ءادىس بار ما؟

ساراپشى كولىكتىڭ بويالعانىن انىقتايتىن ءادىس-ءتاسىل كوپ ەكەنىن جەتكىزدى. ونىڭ ايتۋىنشا، ايقىنداۋعا ارنالعان قۇرىلعىلار دا بار. ونىڭ ءبىرى - بۇگىندە قولدانىستا ءجيى كەزدەسەتىن بوياۋ قالىڭدىعىن ولشەۋىش.

«اۆتو-اۋەسقويلار بۇل قۇرىلعىنى - قالىڭدىق ولشەۋىش (تولشينومەر) دەپ اتايدى. بۇل قۇرىلعىنىڭ پايداسى - كولىكتىڭ لاك بوياۋىنىڭ قالىڭدىعىن كورسەتەدى. كولىك بويايتىن ماماندار تۇزەي الماعان بولشەكتىڭ بەتى بىرتەگىس ءپىشىن الۋى ءۇشىن تەگىستەۋىش جاعادى. ال وسى قۇرىلعى قاي جەردە تەگىستەۋىش بار-جوعىن انىقتاپ بەرەدى. ءبىراق بىلە جۇرىڭىزدەر، قازىرگى ماماندار جاڭا بولشەكتى بويايتىن بولسا، لاك قالىڭدىعىن تۋرا زاۋىتتاعىداي شىعارۋى مۇمكىن»، - دەپ ەسكەرتتى ساراپشى.

وسى تۇستا نۇرلىباي جەڭىس كاسىبي مامان رەتىندە پايدالى كەڭەستەرىن ۇسىندى.

ول قازاقستاننىڭ اۆتونارىعى وتە ۇلكەن بولعاندىقتان، ۇرلانعان، شەتەلدەن زاڭسىز كىرگىزىلگەن كولىكتەر ءجيى كەزدەسەتىنىن العا تارتتى. سوندىقتان تا كولىكتىڭ بوياۋىنا ەمەس، قۇجاتىنا نازار اۋدارۋعا كەڭەس بەردى.

«مەن كولىكتىڭ بوياۋىنا ەمەس، ءبىرىنشى كەزەكتە، ونىڭ قۇجاتىن تەكسەرىپ، تاريحى تازا ەكەنىنە ءمان بەرۋ ماڭىزدىراق دەپ ويلايمىن. VIN- كودى كەسىلگەن كولىك بولسا، ونىڭ زاۋىتتىق ءتۇسىنىڭ ساقتالعانىنان پايدا جوق. مەنىڭ ايتار كەڭەسىم، اۆتوساراپشىعا كىشكەنە اقشا تولەپ، ءوز باسىڭىزدى پروبلەمادان ساقتاپ قالىڭىز»، - دەپ قورىتىندىلادى ساراپشى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى