تاجىكستاندا العاش رەت مۋميالانعان مايىتتەر تابىلدى
دۋشانبە. KAZINFORM - تاجىكستاندىق ارحەولوگ 25 تەن استام جەرلەنگەن مايىتتەردىڭ قاڭقاسىن تاپتى، ونىڭ ۇشەۋى مۋميالانعان، دەپ جازادى Asia-plus.
يسكودار كەنتىندە 25 تەن استام قاڭقا، ونىڭ ىشىندە ءۇش مۋميالانعان دەنە تابىلعان. مۇنداي جاڭالىق تاجىكستان اۋماعىندا العاش رەت جاسالىپ وتىر جانە مۇنداي مۋميالار بۇرىن تەك قىرعىزستان مەن قىتايدا عانا تابىلعان.
ايني اۋدانى يسكودار اۋىلىنىڭ تۇرعىنى تاجىكستاننىڭ ۇلتتىق مۋزەيىنە سارى- باستى زيراتىنىڭ اۋماعىندا كونە قۇلپىتاس بار ەكەنىن ايتقان. مۇراجاي ديرەكتورى بۇل جاڭالىقتى ۇلكەن ىقىلاسپەن قابىلداپ، مادەنيەت مينيسترلىگىنەن عىلىمي- زەرتتەۋ جۇمىستارىن جۇرگىزۋگە رۇقسات الىپ، اۋدانعا مامان جىبەرگەن.
- مەن كەلگەن كەزدە ىشكە كىرىپ، بارلىق سۇيەكتەردى قازىپ، زەرتتەدىم جانە ولاردىڭ اراسىنان كەنەتتەن ءۇش مۋميالانعان دەنەنى تاپتىم، ولاردىڭ ءبىرى وتە جاقسى ساقتالعان، - دەيدى ۇلتتىق مۋزەيدىڭ ارحەولوگيا جانە نۋميزماتيكا ءبولىمىنىڭ مامانى مۋحسين بوبومۋللويەۆ.
وسىعان ۇقساس مۋميالانعان مايىتتەر 20-عاسىردىڭ باسىندا قاشقارداعى (قىتاي) تاريم ويپاتىنان تابىلدى، سونىمەن قاتار 1956 -جىلى باتكەن وبلىسىنىڭ قارامىق اۋدانىندا (قىرعىزستان) ايەلدىڭ مۋمياسى تابىلدى. ول 2017 -جىلى قايتا جەرلەندى.
- بۇل سيرەك كەزدەسەتىن جاعدايلار، ءبىراق مۇنداي مۋميالار عىلىمي انتروپولوگتارعا كوپ اقپارات بەرەدى. ويتكەنى ولاردان د ن ق تالداۋىن جانە باسقا دا ماڭىزدى سىناقتاردى الۋعا بولادى. ءسىز ادامنىڭ جاسىن، جىنىسىن، ۇلتىن، ادامنىڭ نەمەن اۋىرعانىن، نە جەگەنىن جانە نەدەن قايتىس بولعانىن ناقتىلاي الاسىز. عالىمدار ونىڭ سىرتقى كەلبەتىن قايتا جاساي الادى، سول كەزدەگى ادامدار قانداي بولعانىن كورسەتەتىن پورترەتتى جاساي الادى، بۇل وتە ماڭىزدى، - دەپ اتاپ ءوتتى ارحەولوگ.
