تاشكەنتتە وليمپيادا قالاشىعى سالىنىپ جاتىر
وزبەكستاننىڭ تاشكەنت قالاسىندا وليمپيادا قالاشىعى سالىنىپ جاتىر، دەپ حابارلادى وزبەكستان رەسپۋبليكاسى پرەزيدەنتىنىڭ رەسمي سايتى.
بۇل ەلدە 2025-جىلى جاستار اراسىندا ازيا جانە پارا ازيا ويىندارى بولادى. سوندىقتان وليمپيادا قالاشىعىندا بۇل جارىستار باعدارلاماسىنا ەنگەن بارلىق سپورت تۇرلەرىمەن اينالىسۋعا جاعداي جاسالادى.
ونىڭ اۋدانى - 100 گەكتار. وندا 10 مىڭ ورىندىق ستاديون، 2 مىڭ جانكۇيەرگە ارنالعان ۆەلودروم، سۋ سپورت سارايى، جەكە جانە كوماندالىق سپورت كەشەندەرى بوي كوتەرەدى. سونداي-اق 4 قاباتتى اكىمشىلىك عيمارات، 15 اشىق سپورت الاڭى، جۇگىرۋ جولدارى، ساياباقتار سالىنادى. جالپى، قالاشىق اۋماعىنىڭ 54 پايىزى جاسىل جەلەككە اينالادى. ول ءۇشىن 37 گەكتار جەردە جاساندى كولدەر بولادى.
جوبا 70 ەلدە سپورت نىساندارىن سالعان قىتايلىق CAMC Engineering كومپانياسىمەن بىرىگىپ سالىنىپ جاتىر. بىلتىر 9- قاراشادا وزبەكستان پرەزيدەنتى شاۆكات ميرزيەيەۆ وسى قالاشىق قۇرىلىسىنىڭ ىرگەتاسىن قالاعان بولاتىن. بۇگىندە نەگىزگى عيماراتتاردىڭ ىرگەتاسىن قالاۋ جۇمىستارى اياقتالدى. بەس كەشەننىڭ قۇرىلىسى قالپىنا كەلتىرىلىپ، كوتەرىلدى. قۇرىلىسقا مىڭعا جۋىق جۇمىسشى مەن ينجەنەرلەر، ارنايى تەحنيكا جۇمىلدىرىلعان.
كەشە وزبەكستان پرەزيدەنتى وليمپيادا قالاشىعىنىڭ قۇرىلىسىمەن تانىستى. ول قالاشىقتى پايدالانۋعا شەتەلدىك تاجىريبەنى ەنگىزۋ، قاۋىپسىزدىك شارالارىن قابىلداۋ جانە كوركەيتۋدى ارتتىرۋ جونىندە تاپسىرمالار بەردى.
ازيا ويىندارىنان كەيىن كەشەندەر قاڭىراپ بوس قالماي، حالقىمىزعا قىزمەت ەتۋى كەرەك. مۇندا جاتتىعۋمەن قاتار، سپورتتىق ءبىلىم، عىلىم، مەديتسينا دا بولۋى قاجەت. ياعني، بۇل جەر ەل سپورتىنىڭ عىلىمي-تاجىريبەلىك، وقۋ-جاتتىعۋ ورتالىعى بولادى، - دەدى شاۆكات ميرزيەيەۆ.
كەيىن بۇل جەردە جاستار ساياساتى جانە سپورت مينيسترلىگى، سپورت فەدەراتسيالارى، وزبەكستاننىڭ مەملەكەتتىك سپورت اكادەمياسى مەن باسقا دا مەكەمەلەر ءوز قىزمەتىن جولعا قويادى. الاڭداردا ەل تۇرعىندارى دا سپورتپەن شۇعىلداناتىن بولادى.
بالالار سپورت مەكتەپتەرى بولاشاقتا وسى قالاشىقپەن بايلانىستى بولۋى كەرەك. بۇل - بۇقارالىق سپورتتان كاسىبي سپورتقا كوپىر، - دەدى ميرزيەيەۆ ودان ءارى.
قالاشىقتا پاراليمپيادا ويىندارى دا وتەتىن بولعاندىقتان مۇمكىندىگى شەكتەۋلى جاندار ءۇشىن قولايلى جولدار مەن بولەك سەكتورلار ۇيىمداستىرىلادى.
ميرزيەيەۆتىڭ ۇسىنىسى بويىنشا كەشەندە جاڭارتىلاتىن ەنەرگيا كوزدەرى دە قولدانىلادى. جىلدىق قۋاتى 10 مەگاۆاتت كۇن باتارەيالارى 56 مىڭ شارشى مەترگە ورناتىلادى.
تاشكەنت قالاسى بويىنشا وتكەن جىلى ۇسىنىلعان ينۆەستيتسيالىق باعدارلاماعا سايكەس، بيىل ىسكە قوسىلعان جوبالار تۋرالى اقپارات بەرىلدى. بيىلعى جىلدىڭ وتكەن كەزەڭىندە ءوندىرىس پەن قىزمەت كورسەتۋ سالالارىندا 360 جوبا ىسكە اسىرىلىپ، جالپى 20 مىڭ جۇمىس ورنى اشىلدى. سونداي-اق «يانگ حاەت» اۋدانىندا 650 گەكتار اۋماقتا جاڭا بۋىندى يندۋستريالىق ايماق قۇرۋ جوسپارلانىپ وتىر.
وسى كۇنى وزبەكستان پرەزيدەنتى تاشكەنتتىڭ كولىك جانە قىزمەت كورسەتۋ سالاسىمەن، تازالىعىمەن جانە قىسقا دايىندىعىمەن دە تانىستى. ول تاشكەنت قالاسىنىڭ مىرزا ۇلىقبەك اۋدانىنداعى حابيب ابدۋللايەۆ ماحاللاسىندا بولدى.
بۇل ماحاللادا 4400 دەن استام ادام تۇرادى، 50 گە جۋىق ساۋدا دۇكەنى مەن تەحنيكالىق قىزمەت كورسەتۋ ورتالىقتارى، ءبىلىم بەرۋ ۇيىمدارى جۇمىس ىستەيدى. 38 كوپقاباتتى تۇرعىن ءۇي مەن 4 الەۋمەتتىك نىسانعا «مادەني اۋماق» باسقارۋشى قىزمەت كورسەتۋ كاسىپورنى قىزمەت كورسەتەدى.
تۇرعىنداردىڭ بوس ۋاقىتىن ءتيىمدى وتكىزۋىنە بارلىق جاعداي جاسالعان. بيىلعى جىلى اتالار شايحاناسى، امفيتەاتر، Wi-Fi ايماعى سالىنىپ، ىشكى جولدار مەن بالالار ويىن الاڭدارى جوندەلدى.
شەنەۋنىكتەردىڭ نازارى مەن حالىقتىڭ اۋىزبىرشىلىگىنىڭ ارقاسىندا ءوڭىردىڭ كەلبەتى تۇبەگەيلى وزگەردى. «جاسىل كەڭىستىك» جوباسى اياسىندا بيىلعى كۇزدە 2 مىڭنان استام ساندىك جانە جەمىس اعاشتارى وتىرعىزىلدى. ەكى قۇدىق قازىلىپ، جاسىل القاپتارعا سۋارۋ جۇيەسى جاسالدى.
ميرزيەيەۆ وسىندا اۋدان بەلسەندىلەرى، زيالى قاۋىممەن اڭگىمەلەستى. ولار ماحاللانىڭ كوركەيىپ، ەنەرگيا جەلىلەرى جوندەلىپ، قىسقا دايىندىق جۇمىستارى جۇرگىزىلگەنىن ايتتى.
وزبەكستان باسشىسى ەلەكتر قۋاتىن ۇنەمدەۋ، ۇيلەردەگى جىلۋدى ۇستاپ تۇرۋ، وعان ءاربىر ادامنىڭ بويىندا قامقورلىقتى تۋعىزۋ كەرەكتىگىن تاپسىردى.
الەمدەگى كليماتتىق وزگەرىستەر بىزدەن الىس دەپ ايتۋعا بولمايدى. وتكەن جىلعى اياز سونى كورسەتتى. ەندى كليماتتىڭ وزگەرۋىن ەسكەرە وتىرىپ، دۇنيەتانىمىمىزدى وزگەرتۋىمىز كەرەك. ءاربىر ازامات «بۇل - مەنىڭ ءۇيىم، مەنىڭ كورشىم، مەنىڭ ماحاللام، مەنىڭ وتانىم» دەپ ءومىر سۇرسە، ناتيجە ءبىز ويلاعانداي بولادى»، - دەدى شاۆكات ميرزيەيەۆ.
بۇل شاعىن اۋداندا قىس تۇسكەنشە ون ترانسفورماتور جوندەلگەن. ەلەكتر سىمدارى اۋىستىرىلدى. كوپقاباتتى ۇيلەردىڭ كىرەبەرىس دالىزدەرى كۇردەلى جوندەۋدەن ءوتتى، جاڭا ەسىكتەر ورناتىلدى. تۇرعىن ۇيلەردىڭ جەرتولەسىندەگى جىلۋ قۇبىرلارى جاڭارتىلدى.
پرەزيدەنت ميرزيەيەۆكە چيلانزار اۋدانىنا ساپارى بارىسىندا بەرىلگەن تاپسىرمالارعا سايكەس قىسقا دايىندىق بارىسى تۋرالى اقپارات بەرىلدى.
