تاشكەنتتە 157 جىل ىشىندەگى ەڭ جوعارى تەمپەراتۋرا تىركەلدى
تاشكەنت. KAZINFORM - وزبەكستان استاناسىندا 4 - شىلدەدە كولەڭكەدە اۋا تەمپەراتۋراسى 43,5 گرادۋسقا جەتىپ، سوڭعى 157 -جىلداعى رەكورد جاڭاردى. بۇل تۋرالى Uzb_Meteo Telegram-كانالى مالىمدەدى.
ونىڭ ايتۋىنشا، بۇل كورسەتكىش 1868-جىلدان بەرى ءدال وسى كۇنگە تىركەلگەن ەڭ جوعارى تەمپەراتۋرا سانالادى.
سونىمەن بىرگە، تاشكەنتتىڭ ابسوليۋتتىك تەمپەراتۋرا رەكوردىنا نەبارى 1 گرادۋس جەتپەي قالدى: 1997 -جىلدىڭ 18 شىلدەسىندە قالادا 44,6 گرادۋس تىركەلگەن بولاتىن.
ۇقساس تەمپەراتۋرالىق رەكورد نامانگان وبلىسىندا دا ورناعان بولۋى مۇمكىن - مۇندا 42,6 گرادۋس تىركەلدى. بۇل 2007 -جىلدىڭ ماۋسىمىندا بولعان الدىڭعى ماكسيمۋمنان 0,1 گرادۋسقا جوعارى.
وزبەكستان اۋماعىنا قاتتى ىستىق 2 -شىلدەدە اۋعانستان مەن تۇرىكمەنستان جاقتان كەلگەن. ەلدىڭ وڭتۇستىك ايماقتارىندا اپتاپ ىستىق بولعان، اسىرەسە تەرمەزدەگى تەمپەراتۋرا 43 گرادۋسقا جەتكەن. ناۆويي وبلىسىنىڭ ءشولدى جەرلەرىندە اۋا 47 گرادۋسقا دەيىن قىزعان.
سينوپتيكتەردىڭ بولجاۋىنشا، 6 -شىلدەدەن باستاپ رەسپۋبليكادا كۇن بىرتىندەپ سالقىنداي باستايدى.
ايتا كەتەيىك، وڭتۇستىك كورەيادا اپتاپ ىستىقتان 5 ادام قازا تاپقانىن جازدىق.
اپتاپ ىستىققا بايلانىستى شۆەيتساريا اتوم ەلەكتر ستانتسياسىن ۋاقىتشا جاۋىپ تاستادى.
شىعىس قازاقستان وبلىسىنىڭ قۇتقارۋشىلارى اپتاپ ىستىقتا باسقا كۇن وتۋدەن قالاي ساقتانۋ كەرەكتىگىن ءتۇسىندىردى.
