تاعى ءبىر قاراقالپاقستان ازاماتى الماتىداعى تەرگەۋ يزولياتورىنان بوساتىلدى
16- قىركۇيەكتە قاراقالپاق دياسپوراسىنىڭ وكىلى اقىلبەك مۇراتباي تۇندە الماتىداعى تەرگەۋ يزولياتورىنان تاعى ءبىر بەلسەندى - رايسا قۇدايبەرگەنوۆا بوساتىلعانىن ءمالىم ەتتى، دەپ حابارلايدى قازاقپارات.
«وتكەن تۇندە قاراقالپاق بەلسەندىسى - رايسا قۇدايبەرگەنوۆا الماتىداعى تەرگەۋ يزولياتورىنان شىقتى. ول ءبىر جىل بۇرىن نۇكىستەگى نارازىلىق شارالارىنان كەيىن وزبەكستاننىڭ جالعان ايىپتاۋلارىمەن تۇتقىندالعان بولاتىن. جالپى وزبەكستان سۇرانىسىمەن قازاقستاندا 5 بەلسەندى ۇستالدى. ونىڭ 3 ەۋى قاماۋدان شىقتى»، - دەپ جازدى مۇراتباي الەۋمەتتىك جەلىدە.
رايسا قۇدايبەرگەنوۆا - قاماۋدان بوساتىلعان ءۇشىنشى بەلسەندى. بۇعان دەيىن قازاقستاننىڭ وڭتۇستىك استاناسىنداعى تەرگەۋ يزولياتورىنان قوشقارباي تورەمۇراتوۆ پەن جانگەلدى جاقسىمبەتوۆ بوساتىلعانىن جازعان بولاتىنبىز.
بەلسەندىلەر ءبىر جىل بۇرىن وزبەكستان بيلىگىنىڭ وتىنىشىمەن ۇستالعان. ولار كونستيتۋتسيالىق قۇرىلىمعا قول سۇقتى دەپ ايىپتالدى. قازىرگى ۋاقىتتا تاعى ەكى قاراقالپاق بەلسەندىسى زيۋار ميرمانبەتوۆا مەن تىلەۋبيكە يۋلداشيەۆا قاماۋدا وتىر.
2022-جىلدىڭ 1- شىلدەسىندە نۇكىس، مويناق جانە باسقا دا قالالاردا قاراقالپاقستاننىڭ تاۋەلسىزدىگىن جوياتىن كونستيتۋتسيا تۇزەتۋلەرىنە قارسى نارازىلىق شارالارى بولدى. ءبىراق بيلىك وكىلدەرى ونى بيلىكتى باسىپ الۋ امالى دەپ باعالاپ، اكسيا قاتىسۋشىلارىنا قارسى كۇش قولداندى. رەسمي دەرەكتەر بويىنشا، نارازى توپتى تاراتۋ كەزىندە 21 ادام قازا تاۋىپ، 243 تۇرعىن جارالانعان.
