تاكسي توقتاتامىن دەپ، 7 جىل بوستاندىعىنان ايىرىلعان قىزدىڭ تاعدىرى
ۇرىلار ءبارىن ۇرلاي الادى. ءتىپتى ادامنىڭ تاعدىرىن دا... ولار قولىنا تۇسكەن قۇربانىن بىرنەشە جىل قۇلدىقتا ۇستاۋى نەمەسە دونور رەتىندە ساتىپ جىبەرۋى مۇمكىن. ءبىزدىڭ كەيىپكەرىمىز جاي عانا دوسىنىڭ تۋعان كۇنىنە بارعىسى كەلگەن. الايدا سول ارەكەتىنەن سوڭ بوستاندىقتا جۇتقان اۋانى دا اڭساپ قالدى. Bugin.kz ءتىلشىسى 20 جاسىندا تۇتقىنعا تۇسكەن قىزدىڭ تاۋقىمەتتى تاعدىرى تۋرالى باياندايدى.
1977 -جىل. 20 جاستاعى كوللين ستەن كاليفورنياداعى جاقىن دوسىنىڭ تۋعان كۇنىنە بارعىسى كەلەدى. تاس جولدا تاكسي توقتاتىپ تۇرادى. ءبىرشاما ۋاقىتتان سوڭ، گۋكەر وتباسى وتىرعان كولىك جانىنا كەلىپ، ءجون سۇرايدى. ەرلى-زايىپتى جۇپ زيان تيگىزە قويماس دەگەن ويمەن كوللين سەنىمدى حالدە كولىككە وتىردى.
باستاپقىدا كولىك دۇرىس باعىتپەن جۇرگەن. قىز ەشتەڭەدەن سەكەم الماي، مەيىرىمدى ساپارلاستارىنا قاتتى سەنىم ارتادى. دجەنيس پەن كەمەرون اشىق-جارقىن اڭگىمە ايتادى. الايدا كوللين باستاپقىدا اڭگىمە بارىسىنداعى ءار ءسوزى جەكە باسىنا قاۋىپ توندىرەتىنىن جەتە تۇسىنگەن جوق. كولىك ءبىر كەزدە ورمانعا توقتايدى. ەرلى-زايىپتى قىزدى پىشاقپەن قورقىتادى. ونى كولىكتەن ءتۇسىرىپ، دىبىس ەستىلمەيتىن اعاش دۋلىعا كيگىزەدى. قىلمىسكەرلەر رەد بلافف قالاسىنداعى ۇيلەرىنە بەت الادى. كولليننىڭ بىتپەستەي كورىنگەن ازاپتى كۇندەرى باستالادى.
ەرلى-زايىپتىلاردىڭ ۇيىنە كەلگەننەن كەيىن كەمەرون كولليندى جەرتولەگە سۇيرەپ اپارادى. زورلايدى. ساباپ، قاتتى ۇرادى. وسىدان كەيىن ول كولليندى تابىتقا ۇقسايتىن تار اعاش جاشىككە قاماپ قويعان. قىلمىسكەر جاس قىزدى كۇنىنە تەك ءبىر ساعاتقا بوساتىپ وتىرعان. ول ۋاقىتتا قىزدى زورلاپ، ۇرىپ-سوعاتىن بولعان.
قىلمىسكەر جۇپ ادام سالىنعان قوراپتى توسەگىنىڭ استىنا قوياتىن بولعان. قوراپ تار ەدى. كوللين ءتىپتى اۋا جۇتۋدى ارماندايتىن دارەجەگە جەتەدى.
تۇتقىنعا تۇسكەنىنە ءبىر جىل بولعاندا حۋكەر وتباسى جاس قىزدى قورقىتادى. ولار وزدەرىنىڭ «كومپانيا» دەپ اتالاتىن ادام ۇرلاۋمەن اينالىساتىن ۇيىم مۇشەسى ەكەنىن ايتقان. دجەنيستىڭ كۇيەۋى تۇتقىننان قاشساڭ، وتباسىڭدى ازاپتاپ ولتىرەمىز دەپ قورقىتقان. قىز وتباسىنىڭ اماندىعىن ويلاعاننان قۇل بولىپ ءومىر سۇرۋگە كونەدى.
كوپ ۇزاماي كەمەرون مەن دجەنيس بالالى بولدى. وسى كەزدەرى كولليندى وزدەرىنە كومەكتەسۋ ءۇشىن ءجيى بوساتىپ وتىردى. دجەنيس ۇيدەگى قۇلدى ۇناتپايدى. سەبەبى ونىمەن كۇيەۋى جاقىن قاتىناسقا تۇسكەنىن قالامايتىن ەدى. كەمەرون ەگەر كولليندى تۇتقىندا ۇستاماسا، ايەلىن جاشىككە سالىپ ۇستاعىسى كەلەتىنىن ايتادى. دجەنيس سول سوزدەن سوڭ، كوللين تۋرالى جاق اشپايدى.
حۋكەرلەر شاڭىراعىنداعى جاعداي 1981 -جىلى ءبىرشاما جاقساردى. ەرلى-زايىپتىلار تۇتقىنمەن ءبىر مامىلەگە كەلەدى. كەمەرون قىزدى وتباسىنا اپارىپ، ءوزىنىڭ كۇيەۋ بالالارى ەكەنىن ايتادى. كولليننىڭ اناسى مەن اكەسى ونى قانداي دا ءبىر ۇيىم قاتارىنا قوسىلدى دەپ ويلايدى. ۋايىمداعانىمەن پوليتسياعا حابارلاسپايدى. قىزدارى ءوز اياعىمەن كەلگەندىكتەن، جاعدايى جاقسى دەپ سەنەدى.
وسى وقيعادان كەيىن كوللين ستوكگولم سيندرومىنا شالدىعادى. ءوزىن قۇلدىقتا ۇستاپ وتىرعان كەمەرونعا عاشىق بولادى. ول تۋىستارىن كورۋگە مۇمكىندىك بەرگەنى ءۇشىن مانياكقا ريزاشىلىعىن بىلدىرەدى. قىز ابدەن قاجىعان سوڭ، پسيحيكاسى بۇزىلىپ، ءوزىن قىلمىسكەرگە ەسسىز عاشىقپىن دەپ ويلايدى.
ءبىراق قىلمىسكەرگە جابىرلەنۋشىنىڭ مىنەز-قۇلقىنداعى وزگەرىستەر ۇنامايدى. ول قايتادان ستەندى اعاش جاشىككە قاماپ، بۇرىنعىدان دا قاتىگەزدىكپەن قارايدى.
1984 -جىلى كەمەروننىڭ ايەلى شىداي الماي، تۇتقىنعا «كومپانيانىڭ» ويدان قۇراستىرىلعان وتىرىك ەكەنىن ايتادى. ول كولليندى العاش الىپ كەتكەن ايالداماعا اپارادى. ءۇش ايدان كەيىن دجەنيس ەسىن جيناپ، وزىنە كەلەدى. پوليتسياعا باسىنان كەشىرگەن تاۋقىمەتىن باياندايدى. كەمەرون حۋكەر 104 جىلعا باس بوستاندىعىنان ايىرىلدى.
كوللين ستەن بوستاندىققا شىققان كەزدە، ەسى اۋىپ، مەڭ-زەڭ بولادى. ءتىپتى كەمەرونعا حابارلاسىپ، وعان قايتا ورالۋعا ارەكەت جاسايدى. بويجەتكەن ءبىراز ۋاقىت ەمحانادا بولادى. قازىر كوللين وتباسىلى. ءوزىن سۇيەتىن، تاعدىرىنا قۇرمەتپەن قارايتىن ەر ادامعا قوسىلعان. دۇنيەگە ءسابي اكەلىپ، انا باقىتىن سەزىنگەن ايەل. قازىر ول زورلىق-زومبىلىققا ۇشىراعان ادامدارعا كومەكتەسەدى.
