تابىسىن 53,3 ميلليارد تەڭگەگە جاسىرعان بلوگەرلەر انىقتالدى - كوميتەت

- ءتۇرلى اقپارات كوزدەرىنەن الىنعان دەرەكتەردە ۇسىنىلعان سالىق دەكلاراتسيالارىنىڭ مالىمەتتەرىمەن سالىستىرۋ قورىتىندىسى بويىنشا 594 تۇلعانىڭ تابىسىندا 53,3 ميلليارد تەڭگەگە سايكەسسىزدىك انىقتالدى. ولارعا 13-14 -اقپان ارالىعىندا «كىرىستى تومەندەتۋ» زاڭ بۇزۋشىلىعى بويىنشا كامەرالدىق باقىلاۋ حابارلامالارى جىبەرىلدى، - دەلىنگەن كوميتەتتىڭ بۇقارالىق اقپارات قۇرالدارىنا تاراتقان اقپاراتىندا.

وسى ورايدا مەملەكەتتىك كىرىس ورگاندارى سالىق مىندەتتەمەلەرىن تولىق ورىنداۋ ماقساتىندا بلوگەرلەر مەن جەكە تۇلعالارعا سالىقتىق اكىمشىلەندىرۋدى تۇراقتى نەگىزدە جۇرگىزىلەتىنىن حابارلاپ وتىر.

- باقىلاۋ شارالارىن جۇرگىزۋ كەزىندە مەملەكەتتىك كىرىس ورگاندارى ۋاكىلەتتى مەملەكەتتىك ورگاندارمەن، ۇيىمدارمەن جانە وزگە دە تۇلعالارمەن ءوزارا جۇمىس ىستەيدى. حابارلامانى ورىنداۋ ماقساتىندا دەربەس ەسەپتەلگەن سالىقتاردى تولەي وتىرىپ، قوسىمشا سالىق ەسەبىن تاپسىرادى، ال حابارلامامەن كەلىسپەگەن جاعدايدا سەبەبىن ءتۇسىندىرۋ قاجەت، - دەيدى كىرىستەر كوميتەتىنەن.

وسىلايشا تابىسىن جاسىرعان بلوگەرلەرگە سالىق ماسەلەسىن شەشۋگە 30 كۇن بەرىلدى.

- تابىس الۋ كەزىندە سالىقتاردى تولەۋ قاجەتتىلىگىنە، ونىڭ ىشىندە ءارتۇرلى ينتەرنەت-رەسۋرستارىندا ونلاين- جارنامالاردى جاريالاۋعا (ۇيرەتۋ، ساتۋ، ءارتۇرلى وقىتۋ كۋرستارىن ساتۋ، ۇتىس ويىندارىن وتكىزۋ جانە ت. ب.) نازار اۋدارامىز. اتالعان مىندەتتەمەلەر قازاقستان رەسپۋبليكاسىنىڭ كونستيتۋتسياسىندا جانە سالىق كودەكسىندە بەلگىلەنگەن، - دەپ تولىقتىرىلعان حابارلاما.

ەسكە سالا كەتسەك، بىلتىر توعىز ايدا بلوگەرلەر 1,2 ميلليارد تەڭگە سالىق تولەدى.

سونداي-اق كىرىستەر كوميتەتى بلوگەرلەر تولەگەن سالىق قالاي باقىلاناتىنىن تۇسىندىرگەن ەدى.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى