تابيعاتتا قاندالانىڭ قانشا مىڭ ءتۇرى بار
جاڭا جيھاز بەن Second Hand دۇكەندەرىنەن الىنعان كيىمدەر قاندالانىڭ پايدا بولۋىنا سەبەپ بولۋى مۇمكىن.
بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا قالالىق سانيتارلىق-ەپيدەميولوگيالىق باقىلاۋ دەپارتامەنتى مەن دەزينفەكسيا ورتالىعىنىڭ ساراپشى - ەپيدەميولوگتارى ايتتى، دەپ حابارلايدى Kazinform.
مامانداردىڭ ايتۋىنشا، ادام قانىمەن قورەكتەنەتىن قاندالانىڭ تابيعاتتا 40 مىڭنان استام ءتۇرى بار. قازاقستاندا ونىڭ 1500 ءىن كەزدەستىرۋگە بولادى.
«ادامدار ءۇي قاندالاسىنا تالانىپ جاتقانىن ايتىپ، ديزەنفەكسيا ورتالىقتارىنا ءجيى شاعىمدانادى. بۇل جاندىكتەر تۇنگى ۋاقىتتا بەلسەندى بولادى. سونداي-اق 4 ايعا دەيىن ءومىر سۇرەدى جانە تەك ادام بار جەردە جۇرەدى. قاندالالار قىرىق كۇن ىشىندە داميدى، ءبىر ۋاقىتتا ءۇش جۇزگە دەيىن جۇمىرتقا سالادى. ولار ءۇشىن قولايلى ورتا - ەسكى اعاش جيھاز. سونداي-اق ەدەن جارىقتارىندا، پلينتۋس ارتىندا مەكەن ەتەدى. قاندالالار ءۇشىن قولايسىز ورتا - جاڭا بەتون مونوليتتى ۇيلەر، ءبىراق ادام جۇرگەن جەردىڭ ءبارى قاندالانىڭ جاڭا ورتاعا بەيىمدەلۋى ءۇشىن جەتكىلىكتى. اپتا سايىن ورتالىققا قالا تۇرعىندارىنان 1-2 ءوتىنىم كەلىپ تۇسەدى، ولار جاندىكتەردىڭ جاڭا جيھاز نەمەسە Second Hand دۇكەنىنەن كيىم ساتىپ العانىن كەيىن پايدا بولعانىن جيى ايتادى»، - دەدى الماتى قالاسى بويىنشا دەزينفەكتسيا ورتالىعى ديرەكتورىنىڭ ورىنباسارى ۆاحيت سەيدۋاليەۆ.
سپيكەر سونىمەن قاتار بولمەنى دەزينسەكتسيالىق جۇمىستارعا دايىنداۋ بويىنشا ۇسىنىستارىمەن ءبولىستى.
«قاندالاعا قارسى وڭدەۋ كەزىندە ءبىرىنشى كەزەكتە قوقىستى جويۋ كەرەك. ەڭ الدىمەن، جيھاز ارتقا تارتىلادى، ىڭعايلى جانە كەدەرگىسىز وڭدەۋ ءۇشىن - بارلىق بەتكى قاباتتار مەن ساڭىلاۋلار دەزينسەكسيا جۇرگىزۋگە قولجەتىمدى بولۋى ءتيىس. ازىق-تۇلىك، ىدىس پەن كيىمدى الىپ تاستاعان ءجون. توسەك-ورىندى قاعىپ، سىلكىپ، دالادا كەپتىرىپ العان ابزال. وڭدەۋ جۇرگىزۋ كەزىندە ءۇي ىشىندە ەشكىم بولماۋى كەرەك. دەزينفەكتسيا جۇرگىزىلگەننەن كەيىن ءبىر كۇن وتكەن سوڭ قاندالالار ولەدى. الدىن الۋ ماقساتىندا ءبىر ايدان كەيىن اتالعان ءۇي-جايعا دەزينسەكتسيالىق وڭدەۋدى قايتالاعان ءجون»، - دەدى ول.
الماتى قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گاۋھار قاتكەنوۆا وڭدەۋ جانە دەزينسەكتسيالىق جۇمىس جۇرگىزەتىن كومپانيانى تاڭداعاندا نەگە ءمان بەرۋ كەرەكتىگىن ايتتى.
«وڭدەۋ جانە دەزينسەكتسيالىق جۇمىس جۇرگىزەتىن كومپانيانى تاڭداعاندا، ەڭ الدىمەن، بۇل نارىقتا بار- جوعىن ەسكەرۋ قاجەت. ەكىنشىدەن، وقۋدان وتكەنى تۋرالى كۋالىكتەرى بار تاجىريبەلى مامانداردىڭ بولۋى شارت. ءۇشىنشىسى، ماماندار ءوز جۇمىسىندا قولداناتىن جابدىقتار مەن پرەپاراتتارعا نازار اۋدارعان دۇرىس. دەزينفەكتسيا، دەزينسەكتسيا، دەراتيزاتسيا قىزمەتتەرى باسەكەلەستىك ورتادا. الماتى قالاسىنىڭ اۋداندىق سانيتارلىق- ەپيدەميولوگيالىق باقىلاۋ باسقارمالارىنىڭ باقىلاۋىندا 36 ساقتاۋ نىسانى جانە دەزينفەكسيا، دەزينسەكسيا، دەراتيزاتسيا قۇرالدارى مەن پرەپاراتتارىن دايىنداۋ، ءوندىرۋ، وتكىزۋ بويىنشا 24 نىسان بار»، - دەپ اتاپ ءوتتى الماتى قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى.
