سەگىزىنشى ساۋىردە بولعان كۇننىڭ تۇتىلۋى قولدان جاسالعانى راس پا؟
2024-جىلعى 8-ساۋىردە كۇننىڭ تولىق تۇتىلۋى بولعاننان كەيىن، الەۋمەتتىك جەلىلەردە وسى قۇبىلىسقا قاتىستى ءتۇرلى فەيكتەر تارالدى.
جەلىدە كۇننىڭ تۇتىلۋ بولعان جوق دەپ مالىمدەگەن قولدانۋشىنىڭ ۆيدەوسى پايدا بولدى. ونىڭ ايتۋىنشا، ءبارى ويدان شىعارىلعان، الايدا بۇل - جالعان اقپارات، - دەپ حابارلايدى stopfake.kz.
عالىمدار كۇننىڭ نەگە تۇتىلاتىنىن تۇسىندىرگەن. بۇل بۇرىشتىق ولشەمدەرى بىردەي بولعاندىقتان اي مەن كۇننىڭ بىردەي كەلۋىنە بايلانىستى بولادى. كۇن ايدان شامامەن 400 ەسە كەڭ، سونداي-اق، ادامنان شامامەن 400 ەسە الىس. سوندىقتان جەردەن قاراعاندا ولار اسپاندا كولەمى جاعىنان بىردەي بولىپ كورىنەدى. ناتيجەسىندە كۇن تولىق تۇتىلعاندا اي ونى تولىق تاسالايدى.
2024-جىلعى 8-ساۋىردە بولعان تاڭعاجايىپ تابيعي قۇبىلىستى مەكسيكا، ا ق ش- تىڭ 15 شتاتى مەن كانادانىڭ وڭتۇستىك-شىعىسىنداعى تۇرعىندار تاماشالاي الدى. كۇننىڭ تولىق تۇتىلۋىنىڭ سۋرەتتەرى مەن ۆيدەولارىن الەمنىڭ كوپتەگەن جەلىلىك ب ا ق- تارىنان كورۋگە بولادى.
اەروناۆتيكا جانە عارىش كەڭىستىگىن زەرتتەۋ جونىندەگى ۇلتتىق باسقارمانىڭ (NASA) سايتىندا 8-ساۋىردە بولعان كۇننىڭ تولىق تۇتىلۋى تۋرالى اقپارات كوپ. سونداي-اق ولار كۇننىڭ تۇتىلۋىن تىكەلەي ەفيردە كورسەتكەن.
ايتا كەتەيىك، كۇننىڭ تولىق تۇتىلۋى سوڭعى رەت 2017-جىلعى 21-تامىزدا بولدى. كەلەسى وسىنداي قۇبىلىستى ادامزات 2026-جىلعى 12-تامىزدا كورە الادى.
كوپتەگەن ەلدەردىڭ فاكتچەكەرلەرى كۇن تۇتىلعانعا دەيىن جانە ودان كەيىن ءتۇرلى قاۋەسەتتەردى جوققا شىعاردى. ماسەلەن، جەر، اي جانە كۇن تەڭەسپەگەنى، عالىمداردىڭ ءالى كۇنگە دەيىن تۇتىلۋدىڭ قالاي بولاتىنىن تۇسىندىرە المايتىنى تۋرالى حابارلامالار بولدى. USA Today شىندىقتى جەتكىزۋ ءۇشىن وقىرماندار نازارىنا ەڭ كوپ تارالعان 8 فەيكتى ۇسىندى. جالعان سۋرەتتەر دە جاسالعان.
كۇننىڭ تولىق تۇتىلۋى - بۇل ەرەكشە قۇبىلىس. عالىمدار ونىڭ نە سەبەپتى بولاتىنىن انىقتاعان جانە الداعى ۋاقىتتا قاشان بولاتىنىن بولجاي الادى. دەمەك، كۇننىڭ تۇتىلۋى قولدان جاسالعانى تۋرالى اقپارات - فەيك.
